فارس... قريت كل اللي صار لكم اول ما نشيت الصبح.. و لكن للأشغال اللي عندي ما قدرت ارد عليك قبل...

الجلسه:
- انا تعمدت انك تطلبها في الجلسه علشان الردود تكون مباشره و ما يكون في وقت يفكرون في رد يكون لصالحهم في مواقف واااضح ان الغلط من بنتهم فيها... لهالسبب اصريت ان زوجتك تكون موجوده في الجلسه
- الجلسه اتسمت بعدم الجديه في بعض المواقف للأسف و خاصة من الأم و الأب و الإحساس اللي ياني انهم بس يبونكم تتصالحون و خلاص مب شرط ان في شي فعلي يصير..
-انت غلطت بطريقة كلامك مع والدها كذا مره و اسلوبك معاه ما كان حلو بالمره في اكثر من موقف... المفروض كنت تحترمه اكثر في بعض المفردات اللي استعملتها...
- هم عارفين ان زوجتك غلطانه في بعض التصرفات و خاصه طريقة معاملتها لك و عدم سؤالها عنك...
- اتوقع امها تكلمها اكثر بخصوص المكالمات بينكم و السؤال خاصة انهم ما عرفوا شو يردون عليك يوم قلت لهم ان بعد ما طلعت انت زعلان المره اللي فاتت هي ما سألت عنك بالمره... و هالشي يتكرر دائما...
- في نقاط ممتازه طرحتها ونقاط يا ليتك ما فتحت فمك و تكلمت فيها...
- كلامهم معاك دل انهم راح يتدخلون مستقبلا بعد الزواج.. لأن في اكثر من مره صار هذا الموقف.. كلما يشوفونكم متزاعلين يبدؤون يتدخلون للإصلاح... و لكن للإسف ما يكون اصلاح فعلي.. فانتبه لهذه النقطه مستقبلا... هالمره الكل قال شكواه على الثاني لأن بعد عقد قران 10 شهور و استمرار نفس المشاكل الواحد لازم يتخذ بعض الخطوات مثل جلستكم امس..
- الموقف اللي قلت ان والدها ما حكم بطريقه عادله فيه.. كان المفروض تذكرها في البدايه مب على النهايه... لأن انت ذكرته بعد ما وعدت انك ما راح تفتح الملفات القديمه...
-ردودك كانت وقحه في بعض المواقف... مثل يوم امها حبت تلطف الجو المتوتر و قالت انهم ما عاشوا الفتره الورديه و انت قلت "دي مشكلتكم"... رد في قمة الوقاحه ما ترد عليه في ناس في مقام امك و ابوك...
- هي احسها تبي تكمل الزواج علشان خاطر امها و ابوها و في نفس الوقت اظن انها بدت تميل لك لأنها مستحيل تمثل الضحه يوم سألها ابوها عاوزه تكملي معاه؟
- طريقة فتحك لموضوع جلستها معاك و الطريقه الغريبه في الجلسه كانت غلط في غلط و لو انا مكان والدها كنت قلت عجبك هذا بيتي .. ما عجبك الباب يوسع جمل... و رده عليك بخصوص الجلسه هو نتيجه فتحك للموضوع بطريقه منرفزه اساسا..




ملاحظات مهمه عليك:
- كلامك عن الطرحه كان غلط سابقا... كنت تقدر تجيبها بطريقه الطف من انك تقول لها انها تفكرك بفلانه اللي انت خطبتها سابقا..
- نبرة الصوت عندك لازم تشتغل عليها... لأن يوم زوجي يقول لي في فترة عقد القران انه راح يكسر راسي... انا راح اقول له "تخسي.. انت منو علشان تكسر راسي... ".. و بجلبها عليك نكد.. أما إذا جابها بهزار (و وااااااااااااااااااااااااااااااااااااااااضح جدا ان اسلوبك في الهزار غلط)... ممكن ارد عليه بمزاح... عموما ان الزوج يقول لزوجته انه راح يكسر راسهاحتى بالمزح امر غير مقبول بتاتا و ينم على قلة احترام للزوجه و اشعار الزوجه بعدم الأمان مع هذا الرجل اللي اختارته زوج لها... و الأسوء من هذا كله ردك على حماتك يوم قلت لها ان الشرع حلل لك الضرب... يا عمي لو سكت مب كان احسن!!!!... يعني رساله وااضحه لأهل زوجتك انا بضرب زوجتي و محد فيكم يقدر يقول شي لأنها زوجتي و الشرع حلل لي.. غلطان و ستيييييييييييييييين غلطان بعد...
- بما انك لخبطت الدنيا في وقت كلامك عن الجلسه المرفوضه من قبلك... فلازم تقبل الجلسه اياها.. و انت عموما ما باقي لي وايد و تسافر و ما راح تفرق معاك وايد.... و احترم كلام والد زوجتك و قدره
- والد زوجتك اعزمه في مكان خاااااااااارج البيت و اشتر هديه بسيطه اعتذار منك على رفع الصوت عليه في وقت الجلسه... و يا ريت تسارع في هذا الشي... لأنك شديت عليه في الكلام...
- انا فاهمه موقفك بالضبط اللي قلته عن سلامها على ولد خالتها... و فاهمه ليش انت رفضت انها تسلم عليه... و حلو انك جلبت الموضوع لصالحك في نهاية الموقف هذا امام امها و ابوها... و لكن انت غلطت انك بعد ما طلبت منها ما تسلم على ولد خالتها.. قمت انت كلمت بنت خالتك عادي... هني غلط... و لكن النقطه اللي انذكرت كانت في صالحك من وجهة نظري لأنك بينت سبب الرفض
-- انت تبي وحده تفرض شخصيتها عليك و تبي الزوجه المطيعه اللي تقول نعم و حاضر... فارس يا اخوي.. ما في وحده منا ما تعرضت لتجارب الطاعه مع زوجها.. إذا انا قال لي ابي زوجه مطيعه تسمع كلامي و ما تقول لا... و الله العظيم رديت عليه "حلو.. انا بسمع كلامك و ما بعارض... بس مب معنى هالكلام اني راح اوافق على كل شي. تقوله.... و نفس ردك المتوقع.. "شو تقصدين؟"... قلت له "يعني إذا في شي بتقول لي كلمة لا فيها... لازم افهم ليش انقالت هذي الكلمه... "... انا وضعي كان اسوء... خطيبي كان منصبه كبييييييييييييييييييييييييييييير و الكل يقول له سمعا و طاعه و فجأه تطلع له خطيبته تقول له انا ما يمشي عندي هالكلام!!!... اتخيل العفاريت اللي لعبت في مخه وقتها... عموما هو قفل الموضوع بمزحه لأنه عرف انها راح تنقلب نكد... ان ايوه يا بنت انا عارف انتي شاطره و تسمعين الكلام.. يلا معليش... و انتقلنا للموضوع الثاني.... شفت كيف هو احتوى الموقف و ما قلبها شجار يا فارس؟؟؟؟ عموما الزوجه المطيعه طاعه عمياء مب موجوده الا في مخيلات الرجال... لأن حتى الزوجه المطيعه اللي ما تقول كلمة "لا" فهي اصلا انسانه ذكيه و تعرف تمشي المركب بشطارتها... كن واقعي في نوع الطاعه اللي تطلبه من زجتك...
- جملة لما بقول حاجه تتنفذ.. اغبى جمله يقولها الزوج لزوجته.. لأن وقتها حتى لو كانت مب عنيده راح تعاندك و تعاندك و تعاندك..
- واااااااااااااااااااااااااااااااايد تحب كلمة "عيب"... اصلا.. العيب انك تقول هذي الكلمه لأن وقعها يكون دايما قاسي على الطرف الثاني... تقدر تقولها بأسلوب ألطف..
- انتو الإثنين تحبون تجادلون وايد... و انت ما بتمشي وايد اشياء...
- البروود الجنسي شي.. و كلمة بارده شي ثاني تمامااااااااااااااااااااااااا
- المواضيع اللي ناقشوتها في الجلسه خلاص تتقفل بالشمع الأحمر و تعتبر الحين الإنطلاقه الحقيقه...



ممكن يا فارس ما تتصل لها إلا يوم هي تتصل لك؟ و وقت ما تتصل ارجووووووووووووووووووك خلك طبيعي و كوووووووووووووووول و روش .... خذ الدنيا ببساطه... خلنا ننتظر الإتصال منها الحين...

قبل السفر شدد على نقطة المكالمات و انك تبي ترسلها مسجات... و خلال الأشهر القادمه راح تكتشف إذا هي فعلا تبيك او تبي تكمل الموضوع علشان خاطر اهلها بس... في الفتره القادمه تكون فتره تقارب بينكم... فتره معرفه خططكم للمستقبل... و خلك لين هين.... و لكن لا تندلق ابدا...