المشاركة الأصلية كتبت بواسطة المتفائل بالله

السلام عليكم ورحمة الله تعالى وبركاته

اخوي مالك
دامك محافظ دينياً وتحب ان زوجتك تكون مثلك محافظة على التعاليم الدينية ليش خطبت من عائلة منفتحة؟؟ ليش ما اتجهت للعائلات اللي تخدم مشروعك الديني؟؟ تاخذون البنت وهي متربية تربية اهلها اسنين طويلة وتبونها بيوم وليلة تتغير على هواكم؟؟ ظلم ياخوي وميصير ودامك رضيتها زوجة وانت تدري انها من عائلة منفتحة تحملها يامالك إليين ربي يسخرها لك وللي تبية!!

اخوي
اول شي ممكن تسوية عشان زوجتك تطيعك وتسمع كلامك هو أنك أتخليها تحبك!! مو تخليها تخاف منك!! أبني المحبة بالأول وبعدين تعال شرع وسن قوانينك اللي تبيها في زوجتك ، وصدقني بتسمعلك بكل حب وبتحاول ترضيك بأي طريقة ، وخلك لين معها وسمح وحنون وعطوف خصوصاً في مواضيع عادية مثل مواضيعكم عشان تجذبها لك وتحسسها بالأمان وبالتالي تحبك ، واذا ماعجبك كلامها اسمعة وطوفة (تراها صغيرة)!! يعني خذها على قد عقلها!! هي تبي تحس انها تشاركك القرار بما انها زوجتك!! والا من صدقك تبي تدخل حرمة اجنبية بيتك ادربك انت وياها؟؟ والله حتى الأوروبيات مايسوونها مع ازواجهم ههههه عطها جوها ياخي وحسسها بأهميتها وبأهمية أرائها!! ما بينقص منك شي اليا ونستها!!

وبعدين ياخوي شنو تفرض سيطرتها!! داخلين حرب انتم والا زواج؟؟ لاتاخذك الهواجيس وافكار المجتمع الذكوري المتخلف اللي احنا فيه وتقول انك لازم تحكم سيطرتك ع زوجتك حتى في الامور العادية واذا ماسويت كذا زوجتك راح تسيطر عليك وماتحسسك برجولتك وقوامتك وووووالخ.

سيطرتك تفرضها في امور قوية!! في امور حساسة!! في امور فصالة!! مو بالامور العادية مثل الامور اللي تمرون فيها!!

أبني المحبة بينكم الحين وخلك ذكي!! لاحبتك البنت والله والله لو تبيها تلبسلك الثوب مقلوب البستة!! ثم لاتفكر بسلبية في كل شي بينك وبينها!! خلك إيجابي وأحسن الظن في كل شيء!! وخل ثقتك بنفسك قوية!! وحط أبالك انها أنثى يعني هي الاضعف مو انت!!

لاتخوفها منك بعدين تسكر عواطفها عليك!! وان سكرت عواطفها وربي بتتعب اكثر!! وانت ماتزوجت الا انك تبي هالعواطف وهالمشاعر اللي عندها عشان تتحد مع المشاعر والعواطف اللي عندك وتسوون من هالشي علاقة زوجية متينة وصحيحة وسعيدة.

انت الحين في بداية زواجك اللي لازم اتسوية الآتي وبالترتيب:.
1- اتعرف على زوجتك من كل النواحي وتعرف شنو تحب وشنو تكرة
2- تعرف حقوقها الزوجية اللي عليك (والكتب كثيرة)
3- تبني علاقة حب معها مبنية على الاحترام والتقدير والعطف والرحمة (أهم نقطة)
4- تعطيها كامل حقوقها اللي عليك النفسية والمادية (وخصوصاً النفسية)
5- تبدأ في أعطاء تعليماتك اللي تبيها بزوجتك مثل الحجاب والملبس وووالخ

تدري ياخوي يامالك انت لو تبتدي من 1 إلى 5 بترتاح معاها كثير وبتحس بالسعادة بس اعتقد ان مشكلتك هو انك تبي تبتدي معها من 5 إلى 1 وهذا غلط وبيتعبك كثير وبيتعبها وبتدخل عليكم التعاسة!!

وانت ماشاءالله تبارك الرحمن رجال كبير وهي صغيرة ف لازم اتوسع صدرك عليها لأبعد الحدود!! تراك ربان السفينة والقائد والراع والمسؤول ورب المنزل ف يعني لازم يكون للعقل والمنطق في تعاملك الشيء الكبير والكثير.

الله يوفقك.