رد : ما الذي يجعلك تضمنين زوجك ؟
بالنسبة لضمان والله ياشيهانة مثل ماقالت الغالية شقردية مافيه احد يضمن حتى قلبه اللي بين اضلاعه بالنسبة لي الحمدالله واثقة فيه بعون الله لأنه اول شئ رجل يخاف الله ويتقيه ثاني شئ من عشرتنا اللي امضيناها مع بعض مالاحظت عليه شئ من هالقبيل وهو بطبعه مايحب يشاهد حتى التلفزيون والجوال انا اللي حطيت له رمز قفل خاص فيه علشان العيال مايلعبون فيه ويجلسون يتصلون على ارقام الناس اللي حاطهم بالجهاز والحمدالله من فضل الله عز وجل ان زوجي مثل الكتاب اقلب صفحاته مثل ما ابغى وعارفته انه مو من حقين هالحركات ولا يحب الدخول للمواقع الإلكترونية ولا متابعة الأفلام ولا غيرة حتى البرامج اللي يجون فيها مذيعات على طول اول مايشوفهم يقفل التلفزيون وجواله عارفة كل شئ يحتويه صح كله صور بناته الصغيرات واولاده وعليها كم مقطع انشودة او شعر لو راح العمل واشتاق لعياله يجلس يقلب في صورهم الين يمل منها ويقفل زوجي عنده رقمين وجهازين كلهم في متناول يدي لاكن ماعمري فتشت وراه او قلبت الصور والمقاطع الموجودة فيها لأني عارفة لو دورت ماراح الآقي غيرىالصور والمقاطع اللي انا نزلتها له وهو اهم شئ عنده جوال يتصل منه وبس ماله بسوالف الواتس والنت والوسائط احيان يرسل لي رسايل نصيه ويالله لو طلعت منه كلمتين ثلاث في الرساله زياده بعض الأوقات مايرسل إلا لو تحركشت فيه انا وارسلت له رساله يرد عليه لاكن اتصال يتصل في اليوم اكثر من مرة اما باقي الأمور احس انه مو مهتم فيها لاكن يسألني عن الأخبار اللي بالصحف ولو فيه شئ يبغى عنه معلومات يكلفني انا بدخول النت والإستعلام عنه او يبغى خدمة اسويها له عن طريق النت يقول بس سوي لي كذا او سجلي لي كذا عن طريق النت احس انه ملول ويكره وسائل التقنية لو جلسنا مع بعض وشاف الجوال بيدي والله يسوي لي فيها سالفة لو جيت اوريه مقطع فديو مؤثر يتابع شوية معاي وبعدين يقول خلاص قفليه ولا يقول لي علميني بالنهاية وش صار ولا المقطع وش السالفة اللي فيه انا ما ابغى اشوفه احكي لي السالفة والموقف انتي وش اللي صار يعني وجواله الحين مافيه واتس والوسائط ضبطها له ومدري وش سوى في الضبط وخربطت عنده وقال مايبغاها مو ضروري تكون شغاله عندي الوسائط اهم شئ النصية ترسل وبس وزمان اول ماجاءت جوالات ابو كاميرا كان يقول لي هالجوالات حرام والصور والمقاطع اللي في الجوالات حرام ماتجوز وكان متعقد من جوالات ابو كاميرا تعقيد يالطيف ورافض يشتريها حتى سمع حكمها وانها سلاح ذو حدين وكل واحد حسب استخدامه لها وبعدين اقتنع ووافق يشتريها
وازيدك من الشعر بيت ريموت التلفزيون مايدري اي زر يشغله او يغير القناة لأنه ماتعود مايحب يشاهد التلفزيون إلا نادرا ولو فيه نشرة سياسية احيان يتابعها
في مكتبه في العمل عنده تلفزيون حاطه شغال على قناة المجد القرآن الكريم على طول حتى ينتهي الدوام
والحمدالله اسأل الله ان يحفظه ويحفظ سمعه وبصرة عن الحرام وان يعصمنا ويعصم ازواجنا عن كل ماهو حرام
وجزاك الله خير وبارك الله فيك غاليتي على طرح هالموضوع الجميل وحفظ الله لك ابنائك وزوجك واسعدك الله في الدارين اللهم آمين .
__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق
اشهد ان لا إله إلا الله وأن محمد رسول الله