رد : أعظم إنجاز يحققه الأبوان
ماشاء الله تبارك الله سلمت يمينك غاليتي نور الإيمان كلامك جميل ورائع بارك الله فيك ومهما كان قيمة الأخ لا تقدر بأثمان والوالدين هم المسؤلين الرئيسين في قرب الإخوة والأخوات من بعضهم البعض وزيادة الحب والألفة في مابينهم واكثر مايمزق روابط الإخوة بين الأبناء هو المقارنة وتفضيل احدهم على الآخر وعدم العدل بينهم في الهدايا والعطايا والمصروف حتى بالكلمات الحانية يلزمنا ان نعدل بينهم ولا يزعلون ويحطون في انفسهم عندي بنتين واحدة اكملت 6 سنوات وماشية بالسنة السابعة والثانية ماشية بالسنة الخامسة لاحظت ان لما اجلس اذاكر للبنت الكبيرة دروسها واتابع حلها للواجبات الآقي البنت الصغيرة تراقبني في حركاتي وكلماتي مثلا اختها كتبت الحرف او الكلمة صح اقول لها ممتازة حبيبتي شاطرة واعطيها بوسة الصغيرة تنط عليه وتقول بوسيني وقولي لي حبيبتي مثلها وانا شاطرة وتجيب لي دفتر وتجلس تخربش فيه وتقول شوفي انا حليت الواجب مثل ريناد قولي لي شكرا طبعا الحين صرت اقول لهم كلهم الثنتين ونقضي وقت المذاكرة كله بوسات ومدح طبعا الحين الصغيرة لو قامت بعمل طيب وجميل امدحها وابوسها وتروح تدور لأختها الكبيرة ركض وتدور عليها إلين تلاقيها بالبيت وتقول لها تعالي يالله بسرعة علشان ماما تبوسك مثلي انا اعطتني بوسة وقالت لي شكرا حبيبتي عاد هاذيك تجي تصيح وانا بوسيني وقولي لي حبيبتي مثلها
لما يتصافون يصيرون حبايب والله الا حظ عليهم امر وميزة في البنات على وجبات الأكل كل وحدة فيهم تقسم لثانية من اللي عندها من اكلة او فاكهة رغم ان الأكل والحمدالله واجد وكثير لاكن كل وحدة تطعم الثانية من اللي عندها والكبيرة تروح للمدرسة وتشتري لها ولأختها اي شئ تشتريه تقسمه بالنصف بينهم الله يصلحهم ويهديهم ان شاء الله تعالى
بالنسبة للأولاد تذكرين سالفة سلطان ومنصور ابشرك الحمدالله صاروا احباب وصار سلطان يحرص على اخوه منصور ويخاف عليه ويراعيه كثير لاحظت عليه لو الجو مطر او غبار ما يخليه يطلع ينصحه ويقول له لاتطلع برى الجو مو زين لك لو طلعت راح تتعب اي شئ تبغاه من برى انا اجيبه لك كمان صار حنون عليه ويذاكر له دروسه ومرة من المرات في القريب كان هذا الكلام منصور راح للمسجد يصلي المغرب مع اخوانه وفي اثناء الصلاة فيه اولاد جيراننا في المسجد كان لما الإمام يسجد هما يضربون من منصور من الخلف على ظهره متعمدين وسلطان شافهم سكت لهم الين خلصت الصلاة وطلع لهم برى المسجد وانتظرهم وهما طلعوا بيضربون منصور مستقصدينه كذا لقافة بدون سبب وسلطان انتظرهم الين طلعوا وتضارب معاهم وضربهم ضرب خلاهم ينسون شكل منصور وطبعا اول مرة سلطان يضارب في حياته كلها وحتى انا ماتوقعتها منه لهدوئه وطيبته وطيب اخلاقه فجاء ابو واحد من الأولاد المضروبين ونادى ابو سلطان واشتكى عليه من ضرب سلطان لولده طبعا هنا كانوا جماعة المسجد حاضرين وشهدوا بالحق ان ولده وصاحبه هم الغلطانين وهم اللي ابتدوا وضربوا منصور وسلطان اقتص لأخوه منهم وكل الحاضرين قالوا لأبو الولد ولدك غلطان وملقوف حتى في الصلاة داخل المسجد مايريحنا بالرغم من ان عمره عشر سنوات وسلطان اخذ حق اخوه من ولدك وصاحبه وحنى عمرنا ماشفنا على سلطان واخوانه اي غلط او زلل سوى في المسجد او الشارع ماشفنا منهم إلا كل خير كلهم وانت امسك ولدك وعلمه خله يتأدب ويحترم حرمة المساجد هاذي بيوت الله ولها حرمتها وإبنك واصحابه حاطينها ملاهي او حدائق ترفيه عاد ابوه استحى وسكت وقال يصير خير ان شاء الله
والحمدالله والشكر لله الحين صاروا يحبون بعض وقلوبهم على بعضهم اكثر واصبحت مشاكلهم اللي راحت من الماضي وهذا بفضل الله عز وجل ثم بمساعدتك ووقفتك معاي الله يجزاك خير مانسيت معروفك هذا وتوجيهك لي ونصايحك الله يحفظك يارب
طبعا هناك نقطة مهمة قد تجد الأبناء يكبرون ويتزوجون وينجبون ابناء والأباء معاملتهم ماتتغير لأبنائهم قد تجد ان احد الأبناء هو الأقرب لأمه وابوه رغم قلة بره وطاعته لهم لاكن سبحان الله يفضلونه ويحبونه اكثر من اللي يبرون فيهم ويطيعونهم ويقومون برعايتهم قد تجد بعض الأباء والأمهات هالك بيموت على فراشه وكل اولادهواللي يحبونه متجمعين حوله وهو يوصي جيبوا لي ولدي فلان ابغى اشوفه قبل ما اموت وولده مايدري عنه وين هو فيه يموت الشايب او العجوز ونفسه معلقة بشوفة هالإبن بالرغم من انه مو مهتم فيهم ولا يقوم بحقوقهم وابنائهم اللي حولهم مايشوفونهم شئ قدامهم وهذا شئ يأثر ويحز في النفس بين الأبناء الباقين
وهناك بعض الأباء يكلف احد ابنائه فوق طاقته ويطلب منه طلبات فوق قدرته مثل يطلب منه المال وهو ظروفه صعبة او يحمله بديون من البنوك والولد يطيع ابوه علشان يطلب رضاه عليه ويشوف هذا من البر والواجب عليه انه يعطي ابوه اللي يطلبه منه ولما يعطي ابوه اللي طلبه منه يجد ان ابوه يفضل احد اخوانه او بعضهم عليه ويمتدحهم ويثني عليهم بالرغم انه لو طلب منهم شئ يتحججون له ويعتذرون عن تنفيذ مطالبه وتلاقيه يموت عليهم ويحبهم وهذاك الإبن مسكين يتحمل كل شئ علشان يتقرب من ابوه ويكسب محبته ورضاه ويشوفه فضلهم عليه رغم انه هو احسن وافضل منهم بطاعته وبره بوالديه
واحيان يكون هالإبن ميزانيته ضعيفة ومرتبه قليل واخوانه احوالهم وظروفهم احسن منه وتجد الأب يطلب من اللي احواله صعبة ويترك اللي احوالهم ميسورة لأنه عارف ان هذا الإبن راح يطيعه ويعطيه اللي يريده علشان ينال رضاه والباقين عارف انهم ماراح يعطونه شئ لاكن مايحز في النفس ويكسر الخاطر هو طاعة الإبن الغلبان لوالده في كل شئ والأب هذا لا يراه يساوي شيئا عنده ويعتبر ان ماقام به ابنه تجاهه هو واجب عليه وتجد انه يفضل ابنه اللي يتمرد عليه ولا يعطيه شئ فيقربه ويدنيه منه ويحبه اكثر ويبعد عن الإبن المطيع له والبار فيه ويفرق بينهم في المعاملة وهذا شئ مؤثر على نفسية الأبناء
وتصير عندهم حساسية تجاه اخوانهم اللي هم اقرب لأبيهم منهم بالرغم من مبادرتهم وسرعتهم في تلبية طلبات ابائهم وامهاتهم لاكن يرون انهم هم الأدنى منزلة عند والديهم واخوانهم الأعلى منزلة منهم والأقرب الى قلوب ابائهم التفرقة في المعاملة بين الأبناء والمقارنة بينهم هي اللي تقتل محبتهم لبعضهم البعض
قد تجد ين إبن او إبنة مدللين بين ابائهم ويفضلونهم الأم والأب على سائر اخوانهم تجد نظرت باقي الأبناء لهائولاء الإخ او الأخت المدللين والمقربين من الوالدين مختلفة فهم يغارون منهم ويتمنون الوصول للي هم فيه من اخوانهم من محبة في قلوب ابائهم ولاكنهم لايبوحون بذلك ويجعلونه سجين بين اقفاص صدورهم ولو عارضوا او اعترضوا على معاملتهم تجد انهم يسمعون كلام جارح وقاسي من بعض ابائهم فيفضلون الصمت الذي يقتل محبة اخوتهم في قلوبهم ببطئ شديد
وهناك الأخ او الأخت الواشي على اخوانه عند الوالدين تجده ينتظر اي سقطه لأحد إخوانه لكي ينقلها للوالدين علشان هو يكبر بعيونهم واخوه يسقط من نظرهم ولو الوالد او الوالدة يتخذ موقف حازم في مثل هالمواضيع من بدري راح يحافظ على تواصل ابنائه ومحبتهم لبعضهم البعض حتى لو مثلا وصل لأحد الوالدين خبر سيئ عن احد الأبناء من احد اخوانه يجب عليه حل الأمور بروية وتأني وان لايفضح الأخ عند اخاه حتى ما تتكون هناك بينهم عداوات وتكبر في المستقبل واي خلاف بين الأبناء يجب احتوائه ومعالجته بأسرع وقت ممكن ومسح اثره من النفوس حتى لا يتراكم في القلوب ويصير فيه حقد وكره بين الإخوان واخيرا الوالدين هم بإمكانهم ان يقربوا ابنائهم من بعض وبإمكانهم يبعدوهم عن بعض بالتربية والمعاملة واهم شئ يأتي في تربية الأبناء هو العدل والإنصاف بين الأبناء وزرع الإحترام في نفوسهم لبعضهم البعض واحتواهم جميعا في دائرة واحدة ومعاملتهم سواسية بدون تفضيل احدهم على الآخر وزرع روح التعاون والبذل في ما بينهم منذ الصغر .
هذا وجزاك الله خير وبارك الله فيك غاليتي نور الإيمان وسلمتي على ماخطته اناملك .
*
__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق
اشهد ان لا إله إلا الله وأن محمد رسول الله
التعديل الأخير تم بواسطة أم سلطان1 ; 08-11-2012 الساعة 05:37 AM