ياهلا ومرحبا بالجميع دون استثناء

يا خواتي ويا اخواني
والله العظيم أني مو شديد أبداً مع زوجتي وبالعكس رحيم ورؤوف فيها وودود لأبعد الحدود ، لكن ردة فعلي الأخيرة سويتها لأني أعرف أن مالها علاج إلا بالطريقة القمعية هاذي وعندي أسبابي وراح اوضحها الآن واعرفكم ليه انا سويت كذا.

1- عدم سماعي للموضوع كان سببة أني ما ابغى اعرف السبب عشان مايزعجني انا شخصياً ويسوي مشكلة بيني وبين زوجتي !! لأني متأكد أن أمي ماتهاوش خواتي وزوجتي إلا أمام خطأ واضح ، وأنا أعرف أمي عدل ، ف رحمتاً بزوجتي ماحبيت اسمع المشكلة!!

وغير كذا أنا أمامي مشكلة حساسة جداً ويهمني أخلصها بسرعة عشان ماتكبر وخصوصاً ان زوجتي "صغيرة" وماتفقة الأمور وحتى ردود افعالها ماتجمل.

2- انا احب اسمع لزوجتي كثير ودايماً اذا بغتني تلقاني سواء برخا او بشدة ، لكن ما ابغى اعَود زوجتي أنها تشتكي من أمي لأن لو عطيتها مجال وطبطبت عليها وقلت لها ماعلية امي كبيرة وكذا!! هالشي بيعطيها الذريعة بعدين أنها ممكن تتجرأ على أمي خصوصاً انها حاطة أبالها أني مطبطب عليها (والطبطة هاذي عند بعض الحريم معناتها ان الحق معاج مو مع امي) وبتعتبرها اشارة خضراء مني انها تتمادى وتاخذ راحتها مع أمي بدون ماتعمل لأمي حساب ولا تعملي انا!!

لأني بالطبطبة هاذي سلمتها تصريخ تقل أدبها بكيفها وهذا اللي ارفضة بتاتاً انه يصير ، ناهيكم أن حريم اخواني اربعة عايشين معانا بنفس البيت ، ف إذا وحدة منهن شافت الثانية تتمادى على أمي بتصير امي طوفة هبيطة قدام حريم اعيالها والسبب هو كثرة التطبطب!!

3- أمي عمرها 63 سنة الله يطول بعمرها ويطول اعمار امهاتكم ويرحم موتاكم ، وزوجتي 21 سنة ، ف ماتجي ورع أمس وتفكر مجرد تفكير انها تشتكي من امي اللي هي بمثابة جدتها!! وهذا سوء تصرف منها لان المفروض تبلعها وتسكت (في حال امي غلطت) وتحترم شيباتها وكبر سنها او على الاقل تسكت عشاني وهذا من الأدب.

4- زوجتي من النوع اللي ماتخبي شي على امها وخواتها ، وامها من النوع الحار والمتسلط احياناً لدرجة ان اعدلاي كلهم يشتكون من تدخل ام زوجتي في حياتهم ، وانا ولله الحمد مبعد هالشي هذا عن حياتي لأني ما أحتك مع أهل زوجتي ، ولأن أهلي كذلك مالهم تدخل مع اهلها بالرغم من اننا البيت الواحد ، ف تخيلوا لو ان المشكلة كبرانة ومتدخله امها في هالمشكلة أيش بيكون دوري أنا ؟؟ وايش بيكون موقفي؟؟؟ ماكان عندي حل إلا كذا !!

5- امي ما هاوشتها مع خواتي إلا أنها عادتها مثل بنتها واكثر ، وماهاوشتهن إلا تبي مصلحتهن ، وحتى خالاتي حاشهم كلام من أمي (على قولة أختي) ف ليش ما احسنت النية وقالت بالعكس تمون ودامها اجمعتني مع بناتها هذا يعني انها عادتني بنتها ولولا غلاي ماهاوشتني!! ليه تقدم سوء الظن على حسن الظن!!

والله ان امي تغليها من غلاي وتحبها من محبتي وتحترمها من إحترامي وأمي إنسانة طيبة جداً وغير متسلطة وتحترم زوجات أعيالها وازواج بناتها بشكل مبالغ فيه ، وتستحي منهم مستحى مو طبيعي ، وبعمرها ماتدخلت بحيات أحد فينا ، وبالعكس اذا شافت اعيوبنا تسترنا سواء كنا اعيالها او زوجات اعيالها ، ف اللي يحط أباله أن امي من الحموات المتسلطات فهو غلطان ، أمي جداً فقيرة حال وعلى نياتها.

ف عشان كذا انا قمعت ، ولاتلوموني والله انه مو طبعي الشدة ، لكن بعض الظروف تحتاج للشدة مثل الظرف هذا.

__________________
استغفر الله واتوب إليه