روح حبيبتي ..

طبعا بكون غبيه اذا قلت ان سبب خيانة زوجك هو انتي .. لكن بنبهك لشي .. انتي اعطيتي زوجك الحنان والحب
والحب والعطف وصرتي له الام والابو والاخ والاخت وكل شي .. وهذا شي طيب .. لكنك شلتي حتى مسئولياته
كلها .. عودتيه على الاخذ .. ما يهون عليك تشوفينه حزين او تعبان او متبهدل على طول تفزين له وتحلين مشكلته
صرت انتي الرجل .. حتى قراراته انتي تتخذينها عنه .. وهو مرتاح جذي ..
والحين نفس الشي تبين انتي تحلين المشكلة لانه مو هاين عليج .. المشكلة هذي هو يحلها يا روح مو انتي ..
قلت لك قبل اذا تذكرين اعطيه مسئوليات البيت الصرف العيال .. لا تاخذين المسئوليات كلها ولا تتركينها كلها
لكن الامور اللي تعتبر من مهامه كزوج واب ورب العايله لازم هو يقوم فيها .. وبعدين حسيت من كلامك ان زوجك
عنده عقدة نقص علشان جذي يكذب وايد ..

حبيبتي التفكير المشوش اللي تعانين منه لانك تفكرين تسامحينه وتفكرين تعاقبينه .. ما يستوي تركزين على شئين
يا تسامحين يا تعاقبين .. علشان ترتاحين .. ولا تمثلين القسوة والكره لان هذا مو طبعك .. صدقيني بتتعبين من
التمثيل يوم من الايام .. خليك مثل ما انتي على طبيعتك طيبة وحنونه لكن ما ترضين بالغلط .. وما ترضين باستغلال
هذي الطيبه ..

انا مؤمنة بأن الله سبحانه وتعالى كتب لك هذي المصيبة علشان يصحى زوجك ويتغير .. ( رب ضارة نافعه )

سامحيه لكن لا تصرحين .. خلي الحزم موجود في امور والجديه موجوده في امور لين تتاكدين من تغييره
واغلقي الموضوع هذا خلاص فتحه ما يجدم ولا يأخر .. الحين الدور عليه قولي له
انا دوري انتهى ومو مسئوليتي اني احل المشكلة .. انت اللي عملت المشكلة وانت تحلها .. اذا قال كيف : قولي
له اثبت لي مع الايام انك تغيرت .. بإيدك الحين تحافظ علينا او تخسرنا .. اثبت لي انك تستحق الفرصة اللي بعطيك
اياها ..

اعينيه على العبادات خاصة الصلاة وفعل الخير ... اعمال الخير تطهر القلب والروح يا روح

اصري على موضوع التغيير .. اعطيه مسئوليات .. وحتى لو صعبت عليه خليه يتصرف .. وراقبي من بعيد
صدقيني انا واثقه انك تعرفين متى تتدخلين وتساعدينه .. حددي له مسئولياته وشيلي ايدك وشجعيه .. تغييره الحين
بإيده مو بإيدك انتي ..

واستمري بالدعاء خاصة بقيام الليل ان الله ينور لك ويصلح امورك ويسعدك ويهدي زوجك .. ويريح قلبك وينسيك
المشكلة هذي ..

وريحي نفسك يا روح .. والله ان الدنيا ما تسوى .. اعتبريها بداية لك ولزوجك علشان العيال يتربون في بيئه
طيبه والله انهم يستاهلون وانتي تستاهلين السعادة والراحه ..

واطلب منك تركزين على كلام اخواني ولهان والبليغ واختنا الصائمة لله..
والاحترام موصول لكل الاخوان والاخوات بارك الله فيهم ..

هذا رأيي المتواضع حبيت افيدك فيه حبيبتي .. احتمال يكون صح واحتمال غلط بس اشهد الله على كلامي ان هذا بيكون
تصرفي لو كنت مكانك .. واكيد انا متواجده ومتابعه معاك للاخر بإذن الله

ربي يفرج همك ويسعدك مع زوجك وعيالك في الدنيا والاخره يالغاليه.