رد : محبتكم روح الطير..محتاجتكم [ مستجدات بالرد 30 - 31 - 34 - 288]
صباح الخير يا روح
أتمنى تكوني اليوم بحال أفضل من الأيام السابقة
واسال الله ان يعوضك كل خير عن صبرك
روح
أنت تعرفين كم أعزك وأحبك , وفي جوانب كثيرة أنت مشجع ومحفز لي على أني أمضي وأسير في حياتي صح , ولكن مع كل هذا كلمة الحق لازم تنقال يا روح , مهما كانت قاسية ومرة فلازم تسمعينها ويسمعها هو اذا يبي المركب يستمر ...
روح
شفتي ردك الأخير هذا ؟
اللي قلتِ فيه ما أضمن لك زوجي يقرأ ؟
هذا هو المبدأ اللي مشيتي فيه مع زوجك طوال حياتك واسمحي لي بهالكلام ...
ليش وش ناقصة عن العالم ما يقرأ ؟
وليش أنت عاذرتيه ؟ وخايفة على مشاعره لهالدرجة ؟
خايفة يسمع كلمة تجرحه ؟
خليه يسمع مو هو رجال ؟!!
والرجال لابد يتحمل كلمة الحق والكلمة اللي تمشي بيته صح ؟
مو هو خان ؟
مو هو متكل عليك ؟
مو هو مقصر وطفل من أطفالك تربينه ؟
خليه يفتح عيونه
ومثل ما خرب بيته بيده
لابد يجي هنا ويسمع الكلمة اللي تجرحه نعم ولكنها تداويه
الامر مو بالسهولة يا روح اللي مصورها ( قلبك )
هو عرف يخون ويكتب واتس أب وبرامج ثانية , فليش بكلمة الحق صار ما يحب يقرأ ؟
اسمحي لي كلام مكرر بس أبي عقلك وعقله يسمعونه علشان تعرفين أنت كيف قاعدة تتعاملين معه وكيف هو متمادي في حق نفسه والحقوق اللي عليه ..
روح
اخشى ان يمر عليك العمر وتكبرين وتحتاجين رجل بجنبك ثم تكتشفين بعد سنين ان كل اللي كنتِ تبنيه سراب , وراح تواجهينه بالحقيقة اللي سكتي عنها في شبابك وكانت سبب في تماديه في وقت ما راح يسمعك ولا راح يسمع ويفهم وش أنتِ تقولين ..
راح يشوفك مجرد وحدة ( كبرت وخرفت ) وقاعدة تنكد عليه ان ربي كتب لنا جميعا العمر
ان كنتِ تحبينه حب حقيقي , فاتركيه يسمع كلمة الحق يا روح اتركيه يتصرف , خليه يثبت نفسه ولا ينتهي موضوعكم بصلح فقط , بل توضع النقاط على الحروف وتنتهي كل ماهو سبب للكدر في حياتكم , الموضوع أكبر من المكالمة اللي كلم فيها هذه البنت , الموضوع حياة قائمة غير سوية ...
ايه يا روح حياتكم مو سوية والموازين فيها مقلوبة وفيه سببين اثنين لهالحياة لا ثالث لهما والتقييم عليكِ :
1- اما انك أنت تكوني مرأة قوية وطموحة وبانية نفسك بنفسك , ومن قوتك تبين رجل يبقى تحتك وخاضع لك يمشي على القوانين اللي أنتِ تبينها قوانين روح الطير , تعطينه بكيفك وتمنعينه بكفيك ..
2- أو أنه رجل مراهق وطفل ( بعقله ) اتكالي وكسول وماله أهداف في الحياة , لقى صرافة آلية تصرف عليه بالمقابل يمشي على ما تبي , وراح يجي يوم يبحث عن أنثى تشعره بقوامته من خلال تحمله لمسؤوليتها ...
فكري بحياتك صح
وتأكدي لو ضيعتي هالفرصة فما راح تلقين فرصة أحسن منها علشان تستقيم حياتكم ...
الجميع مجمع على استبعاد الطلاق , ولكن الرجوع ما يكون بالسهولة اللي وصلتيها بردودك الأخيرة , لازم يعمل ويبني نفسه ويثبت نفسه بالفعل مو بالقول
روح تقولين زوجك وقف معك وقفات وهذه تشكر له وأهمها وقفته مع الوالدة الله يرحمها وهذا دليل حنيته وقلبه النظيف
ولكن بعض منها هو ملزم فيها كزوج وولي أمر , مثل وقفته معك بولادتك فما أعتقد ان هذا مو من واجباته
مو معقول الرجل يعرف المرأة وقت الشهوة فقط ووقت الولادة والالم والتعب والتربية ما يدري عن شي !!
.
.
.
.
نجي للأخ زوج أختنا روح
يا أخي رجولتك تحتضر وتئن صارلها سنين تستنجدك من داخلك وأنت مارد الطفولة والمراهقة اللي معيشة في داخلك للآن كاتم على نداء الرجولة اللي فيك , ويوم عن يوم تكبر هالمارد بداخلك باتكاليتك..
والله العظيم ما نبي نجرحك
ولكنك يا اخي الكسل والاتكالية متفنن وتعرف تخليها تنفذ اللي تبيه أنت , اما الكلمة اللي تغيرك وتبني حياتك أنت وزوجتك ما تعرف تنطقها ولا تقولها ..
سنين وروح تحاول تحكي معك وتحل مشاكلك وتفتحون صفحات , والنتيجة انك تمشيها بكم كلمة ثم تعود حليمة لعادتها القديمة صمت واتكال وتسويف ...
الله أعطاك أروع الفرص وأفضلها , ولكنك مع الاسف باتكاليتك وكسلك ضيعتها ,
كمثال سفركم لبريطانيا
نعم نعرف ايجابياتك زين , حنون وعاطفي وصبور وهادئ ومالك بالمشاكل , بس الزوجة تبي فعل , تبي رجل بجنيها ..
مع الأسف أنت حارمها وحارم نفسك من أروع شعور ممكن يعيشه رجل وامرأة ( سويين ) ..
أنها تشعر بقوامته وهيمنته عليها , وتشعر هي بأنوثتها وانكسارها تحت جناحك ..
ان يشعر هو بقوته وقدرته عليها , ويشعر بأنوثتها وضعفها واحتياجها له ..
6 سنين كافية جدا أنها تخلق منك انسان مختلف تماما مع مراة مكافحة مثل روح , على فرض ان روح ما تسعى للهيمنة عليك
نعم نتفهم طريقة تربيتك وانكسارك في بيت أهلك وطفولتك , ولكن 6 سنين مع غربة وتجارب حياتية مختلفة بنظري كافية انها تغيرك وتصقلك وتخليك انسان مختلف
واذا انته ما غيرت اللي بنفسك , فتأكد ان مافي أحد بغيرك ..
أخي الكريم
أننا نعرف هنا جميعا أنك انسان خيّر وبينك وبين الله - بنظري - شعرة مانعتك من كثير أغلاط كبيرة انجرف فيها كثير رجال يعيشون مثل حالتك , الله يريد لك الخير وحنا نبي لك الخير
ولكن الاهم من هذا أن تريده أنت لنفسك حقيقة وليس مجرد كلام , ومجرد ما تخطي خطوة واحدة حقيقية وصادقة نحو الحق راح تلقى الهبات الرحمانية تهل عليك من كل صوب
فكر بحياتك , وما مضى من استهتار ولعب كافي لأن يجعلك تستيقظ من سباتك العميق
أخيرا
يمكن كلامي قاسي شوي , بس أتمنى أنكم تشوفونه بعين البصيرة