اعتذر عن عدم الرد عليكم بردود مفصلة كلٍ على حده ... لمتابعتي لمشاكل الاعضاء و محاولة تقديم حلول لهم و أملي في ذلك انني ان لم استطع تعديل حياتي لعلي اكون سبباً في سعادة غيري ...
يا إخوان يا خوات ... لو تكون نفسيتي عال العال حتى و إن كنت راجعاً من العمل ... بمجرد ما ادخل البيت ينقلب حالي مو مني لا ... ادخل البيت صراخها و كلامها على الأولاد و تكشيرتها و منظر البؤس الذي تكون فيه هذا عدا الهيئة فلا تسريحه و لا روج او كما اقول لها دائماً ... كحل و لا حتى كحل ... و أنا لم أتضايق او أزعل دون أن أنبهها و أطلب منها ... فغدة مرات طلبت منها ان تلبس و تتعدل و تترك البؤس و تترك العبوس و التذمر ... و تضحك لأني ما عمري ضحكت معها ... مو مبالغة او تكبير للأمور هذه الحقيقة طيلة اكثر من 15 سنه ما ضحكت معي مو انها ما تضحك لا تضحك مع خواتها بالتلفون تضحك مع العيال بس بمجرد دخولي تسكت ...
في احد الردود قيل لماذا لا تسافروا ... وان استطعت للخارج ... عرضت عليها ان نسافر للخارج ... قالت وع اعوذ بالله الله لا يبلانا .. قلت ليه قالت الايدز و الامراض ... قلت كيف قالت إيه اللي يروحون برا يمكن يجيهم إيدز قلت من الهوا ... قالت من الاكل و الا ( تكرمون الحمامات ) وع وع ... قلت طيب نخلي العيال و نروح لمكة كم يوم و جده كم يوم ... قالت انت تحب نفسك !!! تمشي نفسك و ما عليك من غيرك اهم شي روحك يا شينك أنا ما احب كذا و الله وناسة عيالي اهم من وناستي ... أنا في ذهول و قلت تصدقين فعلاً أنا اناني احب نفسي قالت إيه أشوا انك قلتها من نفسك أنا يوم قلتها لك قبل كذا قمت تكلم علي و تلف و تدور تقول ما هو صحيح بس أشوا اللي اعترفت على نفسك بس الشكوى لله مدري وشلون تعدل الله يعين ... طبعاً كنت في قمة الروقان و اصبحت في قاع الإحباط و قلت تدرين نامي و على قولتك الواحد لازم يحب غيره مثل ما يحب نفسه فعلا كلامك صح و إن شاء الله بروح بعد بكره ... قالت إيه رح أنا ماني زيك احب نفسي و اهم شي أونس نفسي و الله ما استانس وهم محشورين !!! و تجي بالسلامه طبعاً أنا متأكد انها لا تعرف معنى الأنانية و لا تعرف قيمة تجديد الحياة الزوجية بسبب جهلها ...
اما الاخت اللي ردت و قالت السفره و ماني عارف ايش ... و أعطيها اللي هي تبي ... باختصار أعطيتها كل شي كل شي بلا مبالغة ... إلى درجه علبة موية اللي تجي 3 او 4 لتر ما تشيله .... طبعاً تقول المره ما يصير تشيل ...
و اللي يقولوا جيب شغالة جبت عدة شغالات بس اقتنعت انهم بالنسبة لي خسارة على الفاضي ... الكشه نفس الكشه و العبوس و النكد هو هو و اللامبالاة هي هي و لا فيه اهتمام بشي ابداً و لا تتزين و لا غاب صراخها ... ما غير نوم 24 ساعه ... و الحاجة الثانية الخوف من ذنب يلحقني منهن ... فتعطيهن تعليمات اول ما يجون ... لازم تصحى 5 الصباح بما فيه الخميس و الجمعه و العطل ... ما تنام الا و هي مخلصه كل شي و غالباً ما يخلصون شغل الا عالساعه 2 ولازم تصحى 5 يعني تنام 3 ساعات ...
قلت لها لا هذا حرام ... الشغل للساعه 11 و لو فيه اي شي تخليه و تكمله الصباح ... و تصحى 6 مو 5 لانه الأولاد ما يصحوا الا 6 وبعد ما يروحوا الاولاد للمدرسة تنام ل 9 او 10و الظهر ترتاح من 2 إلى 4 و اي وقت ما عندها شغل خليها ترتاح ... و تكون ردودها ترحم الشغالات و الناس كلها و قسوتك علي !!! المهم اقتنعت ان مالها داعي و خصوصا لا هي موظفة و لا تتعب نفسها من الاساس .... تنام لو هي صاحيه من نومة 10 ساعات ...
كنافه كذابة ... حمداً لله على سلامتك ... كل واحد جالس بظلاله ... واحد نايم و جايز له الظلال و الثاني يتحرقص و خايف يطلع من الظلال و يلقى نفسه بشمس القوايل ...
يبي له ظلال و يهفهف عليه الهواء و بشرط يكون كله ورود و كل ورده أحلى من الثانية ما يكون ظلال و السلام ... و المشكله مشكلة مجتمع فرض علينا شختك بختك ...
ما دعاني للكتابة ... هو انها من ذاك اليوم اللي قلت لكم انها نايمه بغرفة العيال ... طبعا تتكلم لا مو تتكلم ... تسأل بس و أنا اجاوبها على سؤالها و احيان اطنش ... غبية و كرهتها و العن يوم عرفتها فيه ... اللهم اجعل عقاب أعدائي زوجات مثلها ...*