قبل رمضان بأسبوعين، جاتني وحدة اشتغلت اسبوع و غابت اسبوع بحجة مرض و كذا ..
طبعا هذه ارسلتها لي (شغالة اشتغلت عندي فترة بس سافرت لمدينة تانية لظرف)..

اللي جاتني، استغربت انها جاية بعباية مخصرة و مزركشة و كعب و منمصة حواجبها و راسمة حواجبها بقلم اسود
و الطرحة ترفع فيه شعرها و تخلي رقبتها كله باااااين و مكشوف و لابسة روب ابيض خفيف نوعا ما ..

قلت يا شيخة، لاتسيئ الظن و يمكن توها عروسة و ما تفهم .. بس بنفس الوقت ما اكون هبلة .. و شوي شوي اعلمها
انه مثلا تلبس طرحة طويلة بالبيت اذا فيه رجال..

المهم، شفتها تاني يوم راحت تستحم و تلبس روب احمرررررر و فيه ورود ..
سكتت لها، عشان ولدي كان يسكت معاها و لانه خلاص رمضان بيدخل و ماني لاقية غيرها..
قلت تمسك ولدي عالاقل و اقدر اقرأ قران و اصلي كويس في رمضان

.
.

شافها اخوي وقت زارني، و قالي انت متأكدة من سلوك شغالتك ؟ و ما عندها حركات لف و دوران
قلتله الصراحة ماني متطمنة لها بس فاتحة عيني و ناوية امشيها بعد رمضان ان ماشفتها قد الثقة
و دائماً اختبر الشغالات و اجربهم من بعيد ..

قالي اخوي ترى تجلس تطالع فيا و تعمل حركات بعيونها و احسها وحدة عندها قابلية للانحراف لاسمح الله
بس ما أحط بذمتي، أنبهك عشان بكرة لاتقولي ضحكت على زوجي وووو الخ

.
.

كلام اخوي، خلاني أتأكد من إحساسي 50 بالمئة بس قلت برضو خليني أحسن الظن، يمكن هي كذا نظراتها ؟
و أنا عموما ما اخلي شغالتي تتعامل مع زوجي بشكل مباشر، و لو يطلب منها شي.. يكون قدامي و أنا أقوله كلمها
لأنهم يخافوا من الرجال.. و لأني طول النهار وراها

كانت جداً كسولة و 24 ساعة تتكلم بالجوال مع رجال، سألتها هذا زوجك ؟ تضحك و تقول ايوة
قلتلها انت عروسة ؟ تقولي ايوة .. قلتلها طيب وقفي الجوال شوي .. مايصير كذا تنامي 11 الليل و تقومي 3 الظهر
و باقي اليوم جوال ؟

المهم .. كنت مريحتها جداً، بس زوجي أنا أتعامل معاه و اخدمه.. مو هي ..
حتى باب غرفتها مرات تتركه مفتوح، و هي تدري انه وقت رجوع زوجي من برة .. و ترقد قدام الباب
اقوم أعدي من قدام غرفتها و ارد الباب، و افتح باب البيت لزوجي و استقبله

عطيتها فلوسها حقة اسبوع كامل، قبل رمضان الي اشتغلته
غابت اسبوع و جات..

في رمضان، اشتغلت 3 ايام .. زوجي قال لي كلميها مايصير كذا طول الوقت تتكلم بالجوال.. صدعت راسي
قلتله ايش اعمل ؟ هما كذا..

تاني يوم برمضان دخلت المطبخ اجهز الافطار و حطيت الألعاب قدام ولدي في الصالة و فتحت التلفزيون و أكلته و شبعته
ناديتها تجلس معاه، و أنا اروح المطبخ و اسمع صوته و كل شوي أعدي و اتطمن عليه
قامت شالته و ودته لغرفتها عشان تأخذ راحتها و تحس اذا جيت عشان اتطمن عليه

قام ولدي بلع شي و كان بينخنق، جريت و طلعت من فمه ورقة قصدير و طالعت فيها بنظرة قوية
قلتلها انتبهي المرة الجاية .. لانها تتكلم بالجوال طول الوقت

اليوم الثالث، قلتلها ما تقوم من الصالة عشان تكون قدام عيني
و نفس اليوم زوجي ماراح العمل و كان نايم بغرفتنا.. و كانت هي في الصالة متسدحة ..
يعني الي يعدي، يشوفها متسدحة و حاطة يدها على خصرها و تقرقر بالجوال

رحت اصحي زوجي للصلاة، مريت من الصالة و صكيت الباب.. قامت احترمت حالها و عدلت جلستها
و في الليل جالسة ساعة تتكلم بالجوال و الغسيل من يومين عالمنشرة ..

قلتلها ماينفع ترى كذا .. وقفي الجوال وقت الشغل و خلصي شغلك اول شي ..
لأني كم مرة لمحت لها و مرة مزحت معها و مرة ضحكت لها .. بس مافيش فايدة

اليوم اللي بعده جابت حجة انها تروح و ماتبغى تشتغل الا بشروط ..
انها تجيني تشتغل بس 4 ساعات في اليوم لحد نهاية رمضان .. و بعد كذا تجي تشتغل عادي
و تقول عشان اخوها مريض و تجلس معاه، و تبغى تأخذ راتب 2000
قلتلها ماتفقنا على كذا ..

المهم صارت تقول ان ما عجبك، خلاص اروح ..

.
.

راحت و قامت تتبلى علي ؟؟؟؟؟

تقول للشغالات عشان لا احد يجي يشتغل عندي، أني اضربها و أني طردتها في الشارع ؟؟؟؟؟؟؟؟
و قالت اهم شي، انه زوجي يتحرش فيها و كلام كذذذذذذذذذذذذب.. لانه ماكان يقابلها اصلا
و هي مقهورة لأني كنت مفتحة عيوني، وولاني ألبس طول الوقت و اهتم بحالي .. فما صار لها الي تبغاه
الله اعلم ايش كانت ناوية ؟

لأني من بعد كلام اخوي، صليت و قلت اللهم أكفنا شرها ... الخ

الشغالة اللي جابتها عندي، لانها تعرفني و تعرف زوجي.. اتصلت زعلانة و تقول ليش كذا تعملوا فيها ؟
حرااااااااام نحن في رمضان

قلتلها خير يا فلانة ايش صار ؟
قالت الشغالة تقول انك كذا و كذا عملتي فيها و زوجك كذا كمان ؟؟؟ ليش كذا ؟؟؟

طبعا رديت عليها، قلتلها انت كم شهر اشتغلتي عندي ؟ و بنفسك شفتي كيف زوجي كان محترم معاك
و لا يتكلم معاك

و بعدك جو عندي 4 حبشيات، كل وحدة تقول لي : ماشاء الله زوجك مرة كويس و مايتكلم أبدا معانا في السيارة
و زوجي حافظ للقران، قولي لصاحبتك اللي ما تخاف الله.. خليها هي اللي تستحي قليلة الادب
تمشي بملابس خفيفة و ما تلبس حجاب كويس و تجلس تطالع في الرجال ؟

ردت علي: و الله انا اعرفك كويس و اعرف زوجك مرة محترم.. عشان كذا زعلت و استغربت ليش كذا تسووا معاها ؟

قلت لها: اخوي انت تعرفيه كيف، صح ؟
قالت ايوة

قلتلها: اخوي بنفسه قالي هذه شغالة مؤ كويسة تطالع في الرجال بس أنا ماصدقته و قلت يمكن ما تقصد
بس أنا اوريها

دقيت عالشغالة الي تبلت علينا، قلتلها ما تخافي الله تجلسي تكذبي ؟
ارتبكت و ماتوقعت انه بيوصلني الخبر

قالت الا أنا ما اكذب، هذا زوجك مؤ كويس
قلتلها : أنا زوجي مالقي يطالع الا في وحدة مثلك ؟؟؟

قالتلي: ليش أنا ايش فيا ؟

قلتلها خمسة حبشيات جو اشتغلوا عندي و كل وحدة تقولي زوجك مرة كويس و مايتكلم معانا
و صحبتك تعرفنا اكثر منك.. أنا أوريك

قالت : فلانة كاذبة أنا ما تكلمت عنكم و لأجبت سيرتكم

رديت عليها: فلانة ما تكذب و اشتغلت عندي كم شهر و أنا أوريك ياللي ماتخافي الله
خافت و لا صارت تدق علي بعدها

و هذيك الي اشتغلت عندي زمان، اعتذرت مني و قالت والله زوجك مرة محترم و أعرفكم عشان كذا استغربت
و هذه موصحبتي مرة.. ولا اعرف سلوكها

.
.

بس عرفت وقتها، ليش لما دعيت اللهم أكفنا شرها .. ربي بعدها عننا ..

.
.