رد : سهر الازواج
سهر الأزواج خارج المنزل آثارة مدمرة على الأسرة حتى وإن ماكان في الحاضر في المستقبل راح ينعكس اثر السهر على حياتهن الأسرية وتبين سلبيات السهر خصوصا إن بعض الأزواج يعتبرون منازلهم بمثابة فندق لهم ياكلون ينامون يبدلون ملابسهم والوقت اللي يقضونه سهرانين بالإستراحة اكثر من اللي يقضونه في بيوتهم مع اطفالهم وزوجاتهم مو مشكلة اللي الله ابتلاه بالسهر مع اصحابه يسهر لاكن بحدود المعقول ويحدد ايام بالأسبوع او الشهر يلتقي فيها اصحابه ويسهر معاهم لاكن كل ليلة سهران مع اصحابه او حتى عطلة نهاية الأسبوع اسرته اولى واحق بسهره وجلسته معاهم وكثير من الزوجات ماتصدق بعطلة نهاية الأسبوع تبغى تطلع وتتمشى مع زوجها وعيالها كفاية انها مخنوقة في البيت طوال الأسبوع من حقها تطلع وتشم هوا مثل خلق الله ليش الواحد مايرتب اموره ويخصص ايام لطلعاته وسهراته وايام لسعادة اسرته هم لهم حق فيه انه يجلس معاهم ويطلع ويسهر معاهم لاكن هناك الكثيرىمن الأزواج يكونون متعودين على السهر خارج البيت من قبل الزواج وبعد الزواج بعضهم يستمر في هاذي العادة والبعض الآخر يتخلى عنها والغريب جدا إنه فيه هناك ازواج مايسهرون لا في البيت ولا في استراحة تدرون وين يسهرون عند باب عمارتهم اللي يسكونون فيها عندنا جار في نفس شارعنا يسنتر عند باب عمارته من بعد صلاة العصر ومايدخل بيته إلا الساعة2 باليل ولده مسكين شغال عنده قهوجي براد شاي رايح براد جاي دلة قهوة طالعة ودلة نازله وكل من مر بالشارع يضيفه ويجلس معاه يسولف مسوي مركاز عند باب عمارته وكل اللي بالشارع يمر عنده يقضي له وقت شوية ويسولف معاه ويروح لبيته وكمان عقب مايطلعون الناس من المسجد تصير احتفالية عند جلسة جارنا والمشكلة انه ينادي الناس كل ماشاف احد جاي من برى وقف سيارته بالشارع ورايح لبيته يناديه يفلان تعال خلنا نسولف وندردش شوية ماشاء عنده كرم وضيافه حاتمية
غير شكل
طبعا اللي متعود يسهر دائما مو شرط يسهر برى مع اصحابه بعضهم يسهرون في بيوتهم لوحدهم عندهم مجالس خاصة فيهم ويسهر لحاله فيها اما على النت او التلفاز يعني اللي يحب السهر راح يسهر يسهر سوى داخل البيت او خارج البيت طبعا بعض الأزواج مايحب ضجيج الأطفال عنده والسوالف فيفضل السهر لوحده وتلاقيه جالس في بيته لاكن معتزل عن اسرته يسهر في هدوء وانا شخصيا لا امانع سهر زوجي نهائيا لاكن بشرط يسهر مع رفقاء صالحين وطيبين مالهم بسوالف التدخين والأغاني والأفلام والمسلسلات ولا بضياع الوقت في لعب شئ تافه اهم شئ اعرف انه يسهر مع رفقة تزيد تقوي ايمانه وتمسكه بدين الله رفقه لو شافت فيه خلل عنده تصلحه له مو رفقه تفسده وتخربه وتجره معاها لدمار والخراب والبلاوي لاتقولون مو طفل وهو كبير وعنده عقل ويعرف الصح من الغلط لا هاؤلاء اخلائه والقرين بالمقارن يقتدي والرفقة الطيبة اثرها يوضح ويبين على الشخص وكمان الأصدقاء مثل نافخ الكير وحامل المسك مهما تحرزت ومهما حاولت تمسك نفسك وعندك صديق سئ لابد من أن ينالك شئ من شراره ومن سوء اخلاقه اقل القليل لو وقع في موقف محرج صاحب السوء هذا واستعان فيك وطلب فزعتك اكيد راح تفزع له وتوقف معاه بداعي الصداقة لاكن ما تنتبه انه بفزعتك ووقفتك معاه إنك ظلمت ناس ابرياء او سلبت حق مومن حقوق صاحبك واعنتاه على شئ سيئ ومنكر على فكرة الكثير من الأصدقاء السيئين يورطون الأصدقاء الطيبين في بلاويهم ومصايبهم
معليش اخوي ابو خليفة قلبت موضوع السهر لموضوع عن الصداقة لاكن هذا الحاصل اكثر الأصدقاء اللي يفضلون السهر بالإستراحات كل سهراتهم سلبية وعلى اشياء تافهه ومضيعة للوقت ولو قضوا وقتهم مع اهل بيتهم كان افضل لهم من الجلسة بالإستراحات.
__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق
اشهد ان لا إله إلا الله وأن محمد رسول الله
التعديل الأخير تم بواسطة أم سلطان1 ; 18-07-2012 الساعة 08:56 AM