رد : خساره يازوجي ,, بيطلقني عشان ماضي؟
السلام عليييكم ،، امس خالتي اتصلت فيني وعلمتني ان زوجي كاتب بتويتر للمصوره ابيك تشرفينا بزواجي وتسويلي خصم،، هو يظن اني اتابعه للحين وانا صارلي يومين ما اتابعه بديت صفحه جديده بحياتي طلعته من قلبي قبل بالي يعني لاذكرته قلت هذا مو كفو اتابعه واتتبع اخباره لو انه بغاني جاني يدل مكاني لكنه هو مايبي وكل شي يدل على انه مايبي ابد ،، من ناحيتي شقتي اللي اخذوها ومن ناحية كلامه وتصرفاته وكذبه وظلمه لي وانه يقول طحت عليها انسان باعني وباع سمعة بنت خاله وعياله وش ارجي منه ماوراه خير،، المهم قالتلي خالتي هالكلام انه متفق مع مصوره بالخصم عارفه انو مو مازوج الحين الا لما يطلقني عارفه ان قصده يبيني انجن واتصل فيه وابكي واترجاه يحسبني للحين انا الاولى اللي ماتغيرت يحسبني انسانه بدون كرامه بعد كل اللي صار بتصل لا انا تغيرت انا قبل كنت بعز الصدمه كنت ابكي وابيه كنت احسب اذا سويت كذا بيصدقني وبيعرف الحقيقه طلع لا اول كنت افكر بقلبي والحين بعقلي ،، صح يوم قالتلي خالتي بكييت ورحت لابوي وعلمت ما اكدب عليكم بكيت ايه مو غيره او اني ابيه بكيت على ايامي حسافه ضيعتها مع شخص ضنيته يحبني مثل ما احبه رحت لابوي وعلمته بكل شي وجلست ابكي وابكي بحرقه على العشره اللي ماصنها ،، ابوب جلس يطالع فيني وساكت وخلاني اقول كل شي بقلبي يوم سكت قالي باقي كلام ماقلتيه قلت لا خلاص،، قال انا ساكت ابيك تطلعين كل اللي بقلبك ويكفي انك قلتيها بلسانك يا يبه كنت احسبه كفو طلع مايستاهلني قال هذا اعتراف حلو عشانك انسانه لك كرامه والحب مايوكل لقمه بهالزمن وايش هو الزواج الزواج ان ماكان استقرار وتفاهم وثقه واحترام مايسمى زواج وانتي افتقدتي الثقه والاحترام من زوجك واهله نصيحتي لك وانا ابوك انتي بناي ولاودي لك بالطلاق لكنه يابوك عذا ماله امان اليوم يمشي حياته معك وانا عايش بكره الله ياخذ امانهيدوسك دوس هذا انتقام ورجالك فيه صفت الحقد لو انه رجل عن جد وحق وحقيق كان قال لو زوجتي خانت ابجلس معها بشوف وش اللي دفعها تسوي كذا وش انا اللي قصرت فيه لكنه يا ابوك رجالك مايحبك رجالك راعي هوا يحسبك من صديقاته الطايشات يسمعك كلمه كلمتين لغرض معين مثل الحيواان يبي يفرغ يجي يسمعك كلام ويمشي اللي يحب مايصدق بحبيبه ع طول اللي يحب يلتمس عذر وعذر مو يسمع خبر ويكذب الكذبه ويصدقها قال تخيلي ترجعين له كل اهله ابوه واخوانه بعد هالسالفه بيطلعونك بنظره ثانيه بيصدقون ولدهم وبنظرهم انتي المذابه انتي الانسانه اللي سوولك المعروف وستروا عليكم مثل ماقال زوجك برجعها بستر عليها،، وغير كذا حياتك ماراح تستقر بيتدخلون اهله فيها ومصيرك مطلقه وانا ابوك احفظي كرامتك تطلقب ومعك طفلين ولا عشر ،، والله بالسما تكفل برزق كل دابه بالارض ولاتنقصين من شانك وتقولين مين بياخذني وانا مطلقه الله رزقك زوجك الاول ماعليه عسير يرزقك الثاني ،، وان مارزقك وشو الزواج وش لك بالهم والنكد عندك طفلين يسوون كنوز الدنيا وراتب بيدك وسواق وشغاله وعز احسن من فقر رجالك،، وطيشه،، ان ضقتي وانا ابوك ابكي وابكي وطلعي اللي بقلبك وجرحك يابوك بينزف بينزف بس اذكري مصيره بيلتئم وهذا انا اكبر مثال عندك يوم مات جدك بكيت وانكسرت وحرنت وحسبت الدنيا سوا والنهايه قربت والدنيا مالها قيمه بس شوفيني عذاني عايش قدامك مات ونسيناه،، اصبري وادعي ربك يجبر كسرك ويعوضك بعيالك واساليه الخير وربي مايخيب رجاك وان طرا عبيك زوجك وعماتك قولي حسبنا الله ونعم الوكيل والدنيا دوراه مصير الحي يتلاقى مصيرهم بيبكون دم وندم ع اللي سووه،، وقالي خوالك بيروحون عمره بحجزلك تروحين معهم هالاسبوع وادعي بالحرم باللي تبين وادعي ربي يمسح ع قلبك ويفتح ع بصيرتك ،، وجدتي امس جتنا وشافتني وقالت وش اخبارك وتسولف معيوحسينها متحسفه بس تهتم بعيالي وتقول لاحد يضربهم وكذا وبعدها قالت ان جا رجالك لاتطلبين الطلاق لاتيتمين عيالك قلت جده جزاك الله خير هالشخص انتهى من حياتي والله يرحمه لاعاد تجيبين طاريه عندي لان طاريه يلوع كبدي مدري ليه كنت صابره عليه اثاري بعده عنه راحه وماكنت ادري قالت الخريم يصبرن على رياجيلهم وانا ماجاك ربع اللي جاني من جدك قلت هاذي انتي مو انا انا مافي شي بيصبرني عليه وكرامتي فوق كل رجال،، وانتهى الموضوع ياجده لاتناقشيني ولا اناقشك ،، وسكتت،، بس هذا اللي صار ومرات كل ماتذكرت انه بيتزوج اقول بنفسي حتى انا بشوف حياتي والدتيا ماتوقف ع بشر ،، ودعواتكم لي،،