هما على حسب كلام زوجي، ما يتكلموا عني قدامه ..
و زوجي كان يقولي ، كم مرة يعترفوا قدامه .. إنه نحن عارفين أصلاً بنت الناس مالها ذنب .. و إنت الغلط منك ..

.
.

بس الحكاية كيف ؟
معليه تحمليني شوي ..

هما متضايقين من زمان و من قبل زواجنا ، من تصرفات زوجي و دايم ينتقدوه عالصغيرة و الكبيرة ..
و على أمور تافهة .. بس كذا هذا طبعهم ، بيعاملوه كأنه طفل لحد دحين و يبغوه يسمع كلامهم ..
يعني لا تصاحب فلان، ارجع البيت ساعة 9 و لا نقفل الباب، صليت بالمسجد و لا ما صليت
( و هما أصلا ما يصلوا بالمسجد .. لا أبوه و لا أخوانه .. بس كذا فرض رأيي و تسلط )

زوجي ما يرد عليهم ،.
لإنهم سليطيين اللسان و من الناس اللي يقلبوا الكلام عليك بأي طريقة و أتوقع ممكن يمدوا يدهم عليه ..
ففي كل الحالات، زوجي بيطلع مذنب و غلطان ..

علشان كذا اختار راحة باله، و صار أصلاً ما يسمع أي شي يقولوه و يتعامل بالضحك و التريقة ..
بروووووووووووووووووووده و تطنييييييييييييييييييييييشه ( يقهرهم و يستفزهم ) .. عشان يريح راسه ..

.
.

تزوجني، و أنا مادري و الله عن طريقة حياتهم و لا عن كل الحكاية هذه .. و على نيتي ..
و كنت أتمنى إني يكون عندي أهل زوج مثل الأهل،،

لدرجة إني وقت انخطبت، يوم عرفت إنه أبو زوجي عايش ( انبسطت ) لإنه أبوي مات و هو صغير و كنا صغار ..
و أبو زوجي كان يحنّ عليا عشان عارف إنه أبوي ميت، و عشان سمع عن تربية أمي لنا من الناس و الجيران ..

.
.

يعني هما أصلا من قبل زواجنا ، عارفين إنه ولدهم كذاب، عشان يتجنب عقابهم و يبعد نفسه عنهم ..
و أنا ما كنت أدري ..

من أول يوم في زواجنا و من فترة الملكة و هما ينادوه ( تيس لحرمتك ) ..
و هو يقولهم ( أشيلها فوق راسي، مثل ما هي شايلتني فوق راسي ) ..
و يعاندهم أكثر بالتطنييييييش ..

.
.

شافوا إنه ما منه فايدة ..

صاروا يستفزوني و يحرقوا في أعصابي و يسمعوني كلام كل ما زرتهم ..
مثلا ( بأي يوم لو أبو الزوج، رعل من زوجة الولد .. ترى غصبا عن ولده يطلقها و يحكوا لي قصة سيدنا إبراهيم ) ..
و أول مرة ما فهمت و أخدت الحكاية بحسن نية، و كررتها حماتي علي ثلاث مرات و بدون مناسبة ..
و بعدين فهمت إنه تهديد ليا ،،، يبغوا يلووا ذراعي و يخوفوني منهم ( عشان يهددوني بالطلاق بأي وقت )

ياليت إني غلطت عليهم ؟
بس كذا هما متعوديين عالتسلط و ماهم عارفين كيف يمسكوا نقطة ضعفي ..؟؟؟؟

لإنهم كذا يتعاملوا مع سلفتي ( كل مرة يقولولها ،، ترى لو ما سمعتي كلامنا، ترى نشتكي لأخونا و يطلقك )
و هي هبلة تسمع كلامهم و تخاف .. لإنه زوجها يسمع كلامهم ..

أنا كلامها ما أثر فيا ، و زدت عناد و ما سكتت ..
و أنا اللي صرت أهددها بالطلاق، و هما اللي صاروا يهدوني و يقولوا لي ( فكري في ولدك و استهدي بالله )
عشان أبين لهم إنه الطلاق ماهمني و لا أنا من الحريم اللي يخافوا منه ..
و من يومها تابت حماتي تقولها قدامي أو تجيب سيرة طلاق ..

تويي عروسة و تجيب لي سيرة الطلاق ؟
مثل العريس اللي يذبح بسة قدام عروسته عشان يخوفها ..

.
.

زوجي كان يقول:
أنا لإني ما عندي إحساس قدامهم ، و لا ينفع فيا أي شي و هما عارفييييني و فاقدين الأمل فيا ..
عشان كذا يستفزوكي و يحرقوا دمك ،، عشان يخربوا بيننا ..

بس إنت خليكي مثلي باااااااااااااااردة و طنشي ..

.
.

و اللي أثبت لي كلام زوجي ..

إنه مرة نزلت من بريطانيا ، و أبو زوجي جلس معاي و يعطيني محاااااااااااااااااااااااااااااااااااااااااضرة عن مواضيع
مالي علاقة فيها ، و عن الأصول و المسئولية ووو إلخ ..

قلت له و لأول مرة ..
يا بوي .. انتوا كلامكم كذا معاي، تحسسوني إني انسانة مقصرة و لا فيا شي ..

قام ضحك لإني فهمته أو مادري إيش السبب ..
و قالي :

مو نحن وقت نكلمك و نقول لك أي شي .. مو علشانك إنت ..
علشان الكلام لزوجك أصلا .. ( يعني الكلام لك و اسمعي يا جارة ) بما معنى المثل ..

و قالي أبو زوجي:

بس عشانك انسانة قد المسئولية، فدايماً تلومي نفسك و تعتبري الكلام موجه لك و تحسي بالذنب ..
هذا لإنك انسانة ثقة و قد المسئولية ..

و نحن عارفين إنه مالك ذنب ..
بس لو نحن موو واثقين فيك، ما أقول لك الكلام هذا .. بس عشان زوجك نبغاه يحس ..

( طبعا أبو زوجي أنا أعزه كثير ، بس أم زوجي كانت تنقهر وقت تشوفه يتكلم معاي و تعمل لي مكايد )

.
.

يمكن اللي خلاني أفكر أرجع علاقتي معهم ..

إني بديت أرسلت لهم هدايا بسيطة مرة مع ولدي ( بإسم ولدي ) .. وقت سافرنا سياحة قبل سنة ..

.
.

و بعد ولادتي الصراحة - و كان مر على مقاطعتي لهم - مدة سنة كاملة ..
اتصلوا كلهم و باركوا لي و أرسلوا هدايا ( بإستثناء أمه و أبوه ) ..
و أمه أرسلت لي ( مرق و أكل ) .. فقلت لزوجي ( بأتصل عليها و اشكرها ) بس زوجي رفض ..

( أتوقع لإنه زوجي يدري إنها راح ترمي كلام )
و أنا نفسيتي أصلا كانت تعبانة عشان مرض أمي و معرفتي إنها ما حتعيش ..
و أمي ماتت الله يرحمها بعد ما خلصت الأربعين .. يعني كانت أمي في المراحل الأخيرة من مرضها ..
و ما كنت متحملة أي شي و زوجي كان مراعي الشي هذا ..

.
.

في العزا أمه كمان ارسلت لنا طبق ..
و كلهم عزوني و أبوه حضر العزا ..

.
.

بس زوجي يبغاني بعيدة ..

بعد العزا ، و بعد ما طاحت سرة ولدي .. كنت بأخد ولدي و أزور أمه و أبوه ..
بس زوجي رفض .. قالي ( ما تروحي ) ..

و أنا كنت بأروح ، لإنهم بدأوا هما ..

.
.

مع إنهم قبل لا أقاطعهم ..

وقت ولدت ولدي الأول، شفت مواقف منهم و لا أحد فيهم جاب هدية ..
و حماتي ما جات زارتني حتى و لا باركت لي ..
و خلاني زوجي أزورها أنا من تاني يوم لولادتي ( كنت هبلة ) ..
و مع إنه كانت علاقتي معهم كويسة و لا عمري وقتها كنت رديت عليها ..

بس بعد ما قاطعتهم باركوا لي في ولادتي و أرسلوا هدايا و مرق وو إلخ ؟؟؟؟؟

.
.

عجزت أفهمهم ..

.
.

بأجاوب على أسئلتك بس أأكل ولدي بيبكي توه صحي ..