اسأل الله ان يشفيك ويعافيك وينزل عليك الهدوء والسكينة وراحة البال واسأل الله ان يعيذك من الشيطان الرجيم من نفثه وهمزه ولمزه يارب

اختي جمانه اريد ان اسألك وقت ماتعصبين على اطفالك هل تمدين يدك عليهم وتضربينهم او ترمين عليهم من الأشياء اللي حولك لأن بعض الأوقات العصبية تحول الإنسان لشخص آخر يمكن يأذي نفسه ومن حوله وقت مايعصب بدون مايحس بنفسه

انا قبل كنت عصبيه وكنت اضرب اولادي وهم صغار وكنت في اليل لما اشوف اثار الضرب بجسدهم كنت اجلس ابكي عليهم واحس بغصة في نفسي عليهم واجلس ابوسهم وهم نايمين
كنت اضربهم بغير شعور وعلى اشياء تافهة احيان وشفت ضربي وعصبيتي عليهم غيرت سلوك اطفالي صاروا عنيفين وعدوانين
بزيادة فتلاحقت نفسي وعاهدت الله اني ما عاد اعامل اولادي بهاذي الطريقة واحاول قدر المستطاع اسيطر على نفسي واعصابي ويشهد الله اني كنت كل ليلة في آخر اليل افرش سجادتي واصلي وادعي ان الله يهديني ويصلح حالي مع اولادي وينزل رحمته ورأفته في قلبي لأرحم اولادي واشفق عليهم واحن واعطف عليهم كنت ادعوا الله بصدق واخلاص وادعوه وانا باكية راجية متذللة خاشعة والحمدالله ربي نزع العصبية والعنف اللي كنت احمله داخلي نزعا وابدلني هدوء وسكينة حتى اثناء المشاكل الحمدالله التزم الصمت وافكر بهدوء حتى الاقي حل
للمشكلة الحين بعض الأوقات تتغير فيها عندي النفسية
مثلا وقت الدورة اذا تعبت في بدايتها احس بشوية ضيقة واحب اني اعتزل وما ابغى احد يكلمني او يناقشني في اي شئ

وبعض الأوقات ما احس بهاذا الشعور الا عندما تكون دورتي بأخر ايامها يعني مرة اتعب في بدايتها ومرة في نهايتها على حسب احب اعتزل عن عيالي ولو فيه نقاش في اي موضوع اقول لهم اخروه الحين لأني لو تناقشت وحالتي النفسية تعبانه
رايحة انفعل واعصب لا كن اطلب منهم انهم يأجلون كل شئ لوقت آخر حتى عيالي الكبار صاروا لو عندهم شئ يبغونه يجون يقولون لي هاه ام سلطان اليوم رايقه ولا مزاجها متعكر
لأنه صاروا يلاحظون ان فيه ايام تمر بالشهر وانا معتزلتهم وطفشانه وما اسولف معاهم فتعودوا على انهم يفهمون اللي انا اريده منهم اجلوا النقاش لوقت آخر الا اذا كان هناك شئ مهم
طبعا لازم اناقشه معاهم

واتفق معاك العصبيه طبع مو زين ويدمرك انتي قبل مايدمر نفسية اطفالك وش نستفيد لو جلبنا لأنفسنا امراض الضغط والسكر وعقدنا نفسيات اطفالنا الطفل يتعلم كل شئ من والديه
وانا والله لما شفت اولادي وهما صغار كان عندي ولدين كانوا
كل واحد يضرب الثاني اعوذ بالله وكانه يهودي مو اخوه يضربه بعنف ولما سألتهم ليش تسون كذا كان يقول لي الكبير وهو باقي حتى ماوصل سن المدرسه انا ذاك يقول ابغى اربي اخوي مثل ما انتي تربينا انتي دايم تضربينا وانا بصير مثلك علشان اخوي يخاف مني وماعاد يمد يده على العابي قلت في نفسي صبر وبالله المستعان
جبتهم عندي وجمعتهم وكنت عندي خيزران قد قطعت جلودهم فيها ونزلتها والله ان اول ماشافوها في يدي انهم كل واحد
فيهم راح ينخش ورى اخوه خايفين لا اضربهم وكانوا يصيحون خلاص يا امي ماعاد نكررها والله انا نبطل ماعاد نتضارب كانوا يحسبون اني بضربهم فيها قلت في نفسي الله لايسامحني وين قلبي واحساسي ومشاعري يوم اني كنت اضربهم واعصب عليهم
ومسكتهم وحضنتهم وبوستهم وقلت لهم خلاص حبايبي انا وانتم
بنعقد اتفاق من اليوم ورايح ماعاد فيه ضرب ولا صياح ولا عصبيه
انا بكسر الخيزرانه الحين وبرميها قدامكم وفعلا كسرتها ورميتها
والله انهم لما كسرتها طلعوا نفس طويل من صدورهم وانا اشوفهم وكانوا فرحانين ومن هاذاك اليوم اني ابتديت ادعي الله ان يرفع عني اللي انا فيه ويصرف عني كيد الشيطان والحمدالله
تغيرت بشكل كبير في تربيتي ومعاملتي لهم واثمر الشئ اللي اعلمهم عليه واقول لهم عليه احسه اثمر وجاب لي نتيجة مرضيه ولله الحمد والشكر الحين ما اقول لك اني ما اضربهم لو ضربت
اضرب لو كرر الخطأ ثلاث مرات اول مرة اعفي واسامح يكرر الخطأ اعاقبه عقاب عملي اخليه يؤدي اي شغل في البيت لحاله
يخطئ ثالث مرة اعاقبه بالضرب على حسب غلطه بس مو ضرب عنيف ضرب تأديب احكم عليه مثلا ضربة ضربتين على حسب فداحة غلطته وما اضرب الا اذا كان غلطته كبيرة ومؤثرة
يعني اشوفها تعرضه او تعرض غيره للخطر وفيها مضرة على
نفسه وعلى اخلاقة ودينه اضرب على هاذا الأساس لاكن لو كان مجرد هواش واختلاف مع اخوانه على العاب او شئ بينهم اعلمهم بهدوء وكمان اشوف من الغلطان ويعتذر من اللي غلط بحقه واكلفه بعمل في البيت يعمله بدون مساعدة احد من اخوانه
والحمدالله تمشي الأمور على مايرام .

وربنا يصلح عيالنا وعيالكم يارب ولي بإذن الله رجعة للموضوع

علشان اوضح لك اني انا ماكنت كذا من البداية لاكن الحمدالله بعد

ماربنا استجاب لي دعوتي ووفقني والله اني صرت اخاف عليهم من نسمة الهوا وصرت متعلقة فيهم بجنون لو مرض اي طفل فيهم باليل ما اذوق النوم يروحون المدارس اجلس اعد الثواني متى يرجعون للبيت ويوم عن يوم اتعلق فيهم بزيادة الله يصلحهم ويحفظهم ويخليهم لي يارب ويخلي لك اولادك ويصلحهم ويهديهم ويحنن قلبك عليهم وربنا ينزل رحمته في قلبك على اطفالك وتكوني احن واعطف ام على اطفالها يارب .

__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق




اشهد ان لا إله إلا الله وأن محمد رسول الله