اهلا خالة قرين ..
الله يبارك فيك ،، يا ليت ياخاله ماما تفهم كلامك
و احمد مو مقصر أبدا ..
و يسلم عليك و يقول لا توصي عليه
لانه صار الدادا حميدة ( أبوه مسميه كذا عشان كل شوي
نازل لامه يسألها كيف يبدل لأمير و كيف ينيمه ) ..

....

بابا المستشار ..

- في السابع كنت أعيش ضغط كبير من أمي و ابويا ..
ابويا بياخذني معه عشان عارف ان هذا بيزعج أمي ..
و أمي تفهمه و منعته من أخذي ..
قلت من قبل انهم يتخاصموا علي أنا تحديدا غير عن إخواني
مو لانهم يحبوني لا .. لأني أنا اللي يقدروا يفرضون رايهم عليها
و لان ابويا يعرف ان أمي حريصة عليا اكثر من باقي أخواتي
طبعا دون مراعاة لوضعي او صحتي ..
أتمني احيانا لو كنت مثل امل كان ما تحملت كل هذا و لاحد
منهم حرص ياذيني ..
امل احسها حرة بكل شي مو مثلي أنا ..
ابويا ما يقدر عليها و يسترضيها بالفلوس و يخليها على راحتها
حتي أمي مهما ضربتها و عصبت عليها الا انها تحبها
و يحبونها لانهم ما يقدروا عليها و لا تخاف منهم و تصارخ عليهم
زيهم و عادي عندها أسلوبهم ..
احس ان وجودي بينهم غلط .. !
أي تصرف او حتي كلام من أمي و ابويا يتعبني جدا
بس ما اقدر اعبر و حتي لو قلت كلهم يقولوا لي هذا دلع ..
امل اذا كلمتها تقول انتي غبية مو كذا .. و تشرح لي
بخبث و تقول الناس كذا تفكيرهم لا تصيري بلهه يا فجر
و تعصب اذا فسرت لها اي موقف تقول أحسك تستعبطي يا فجر
و الا انتي فاهمه ..!!

- احمد غير عنهم ، و أنا عنده أعيش بكل حرية و راحة و هدوء
كلامه موافق لفعله مو زي ماما و بابا يقولوا كلام و يتصرفوا خلافه
ما يحتاج اتعب نفسي بالتفكير و أنا عنده و لا اجلس أحلل مواقف
كل شي سهل و بسيط ..

وقت تعبي بالمستشفي كنت محبطة جداً و أمي كانت تزيدني
بكلامها و تقول هذا كله لانك ما تسمعي كلامي ..
و تقول أنا تعبت منك متي ارتاح وكلام كثير ...
فعلا أنا تعبتها و هي كمان تعبتني ..

- بعد ولادتي اللي طبعا ما حسيت فيها لأني كنت مرهقة
اصلا من قبلها ،، و ما وعيت الا و أمير جاي ..
طبعا ما شفته مع أني ارتحت ان خلصت من حملي
و لا تحمست لشوفته و لا كنت حتي ابغي اشوف احمد
كنت ابغي اجلس وحدي و لا ابغي احد ..

- بعد اسبوع او اكثر حنيت لأحمد خاصة ،، لانه اكثر شخص
هادي و ما راح يزعجني بكلام و غيره ..
و معه شفت امير ..
هو قالي ان خالة سمته امير ،، مشاعري كانت غير واضحة
و لا مستقرة فرح على خوف على الم فوق التعب البدني الي كنت حاسه فيه..
امير ما جاء بسهولة أبدا ..
كنت ابغي احمد ياخذه أنا ما اقدر و اضعف من الاعتناء فيه
احمد ما قصر معي أبدا ..
كان جنبي وقت ما احتاجه و كان يطمني و يبعد عني
كل امر يزعجني ..

- اقدر اقول أني ارتحت شوي و حسيت بالهدو لكن ماما و بابا
ما خلوني .. يبغوني اروح معهم ..
خفت كثييير و خاصة من ماما و قوانين ماما و قسوتها
اللي ما راح اقدر اتحملها وانا بكل هذا الإرهاق ..
فضلت اروح مع احمد ،، بيتنا كان هااادي جدا جدا بدون
إزعاج و حرية تامة ..
الى ما طلع امير ،، و جا الإزعاج و التعب ..
احمد كان هو اللي يهتم فيه و يبدله و ينيمه لكن كان يجبرني
أرضعه و أنا أخاف انه يشرق ..
حتي أخاف اشيله الا احمد معي ..
شعور غريب أني اكون ام ،، جميل و غير مريح بنفس الوقت
مخاوف كثيرة عندي ..
فجأة صرت ام و الكل يعاملني على هذا الأساس ..
أنا اقل من كذا احتاج وقت ..احتاج ثقة .. ودعم ..

- أنا مو فاهمة أمي ..
كانت تصر على زواجي و الان تصر تاخذني
كانت تقول احمد يحبك و لازم تحبيه و الان تقول لا
كانت تقول انتي تحتاجي شخص حنون و طيب يوقف معك
و الان تقول اعتمدي على نفسك ..
و اذا كلمتها تقول انتي مو فاهمة شي ..!!

ابغي اكون مع احمد و ابغي ماما تبعد خلاص و بابا كمان
ابغي اكون مثل امل لكن طبعا هذا مستحيل ..
أتمني اتغير نهائيا و اكون اقوي و مو أتحسس من اي شي