الله يصبرك ويينك
وانا اقرأ كلامك كأني اتذكر كلام صاحبي لي بالضبط
نفس مشكلتك بالضبط بس اللهم اسم الولد غير والا كان قلت انتي زوجه صاحبي
انا بقول لك وش اقترحت لصاحبي
لانه هو فضفض لي بأنه مايحب زوجته او بالاصح زي ماتفضلتي مايكن لها الا الاحترام فقط
قلت له مو عيب ان الانسان يكون صريح ويبين انه مو مرتاح مع شريكة حياته
لكن العيب من كان يعرف هالشيء من البداية ولاتحرك وحل هالمشكلة من بدايتها وطبيعي المسكينة زوجتك هي الضحية لانك باختصار مايهمك مشاعرها كثر اهتمامك برمي اللوم على اهلك وتعيش يومك مرتاح بحجة انو مالك ذنب وتتنصل من المسؤولية
قال لي ان زوجته لما كشف لها مشاعره لها وبين لها سبب المشاكل اللي حصلت انهارت المسكينة
اشفق عليها وبنفس الوقت حس انه خدعها طيلة فترة زواجهم مااتذكر متى تزوجوا لاني لسى من خمس شهور اعرفه وصرنا قريبين من بعد
وهو معي في امريكا مرافق لزوجته، لما اشارني في الموضوع قلت له بعد اللي قلته لي وبعد مابينت هالشي لها
لازم تعوضها مو تعويض بانك تحبها مستحيل انك تجبر الكسر اللي انت سببته بداخلها، تخيل شخص يقول لك انت ماتستاهل ثم بعدها يقول لا خلاص انت تستهل واكثر ... بتحس انه يستغفلك
التعويض هو انك تعطيها كل شيء، بمعنى منت متحكم ومسيطر على حياتها .. اذا والله بلحظة هداك الله وقررت انك تعيد علاقتكم حلو ، اما غير ذلك اذا مافي مجال تفكر تحبها فالله لايهينك لاتدخل في حياتها ابدا خلها تكمل دراستها وتربي ولدها اذا ولدت تكون مسؤول ع نفقة الابن
عموما عزيزتي*خلاصه كلامي من القصة ، امسكي زوجك
قولي له ماني مجبورة عليك دامك ماتبيني من اول وسويت كل اللي علي عشان تعطيني لو جزء بسيط من حبي لك
طالما انك ماتبيني فياليت تلتزم بحقي بالطفل وبحقي في الدراسة .. وياليت تعطين اهلك خبر بالموضوع وباللي صار لكن مايبينون اللي صار لاهل زوجك الا اذا حصلت مشكلة انتي اهم شيء قولي له انا بخبر اهلي وبوضعي معك واللي بيني وبينك ، ماهو ذنبي اذا بترفض اقول لاهلي ماابي اسوي نفس الغلط اللي انت سويته مع اهلك بسكوتك لرغبتهم انا بفرض رغبتي لانني انا المتضررة عكسك انت !! وانت بمقابل عيش حياتك زي ماانت تبي عدا نفقة الولد و تجلس في الغربة معي حتى نخلص الدراسة بعدها رح واجه اهلك وقل لهم باللي تبيه
لاتتنازلين عن اقل من انهاء دراستك، نصيحة نصيحة نصيحة .... الرجال يتعوض لكن الدراسة ماتتعوض
اضمني مستقبلك عشان ابنك، وش لك برجل بعد ثلاث سنوات وبعد انجاب مولود يجيك ويقول والله امي غصبوني عليك خير ان شاء الله عسى ماتكلفت ؟ ذا مب مستهتر ذا يحسب الدعوة طلعة بر
بالعكس اذا هو مصر انه مايبادلك بالحب زي ماانتي تبادلينه لاتعطينه وجه ... قولي له التزامك لي فقط في نفقه الولد واكمال دراستي غير كذا منتب ملزوم علي ولانيب ملزومة عليك كافي بعد ثلاث سنوات تصحصح وتقول لي انا ماابيك خوش مبادئ
هذا اللي اشوفه حل بالنسبة لي
طبعا قولي هالكلام في جلسة هادئة بيني له انك لازلتي شاريته اذا نفسه يصحح الاخطاء
اذا والله ماتبي قولي له مافي شيء يربطني فيك الا نفقه وتربية الولد وانك تكون محرمي في الغربة لين مانخلصين دراستك غير كذا منتي ملزومين ببعض
مااقول الا الله يوفقك ويستر عليك*