كريستالة ياحبي

كلامك مافيه شي يزعل، بارجع ارد بس عشاني جيت عند امي و مشغولة بينها و بين ولدي ..
باستغل الوقت القصير هذا و ارد ..

قبل امس خرجت من بيت اهلي رايحة لشقتي و بالطريق عدينا أنا و زوجي على كم شقة و عمارة
و دقدقنا على مكاتب العقار بالمنطقة القريبة من منطقة اهلي و اهله بوسط البلد، من العصر لحد العشاء ..
نسالهم عن الإيجار و عن التمليك ..

الإيجارات يا 3 غرف ب 30 الف بالسنة .. او 26 الف ..
او عمارة مافيها غير 5 غرف .. و زي كذا .. و شفنا وحدة مقربعة و حالتها حالة و ب20 الف ..

المهم، بالأخير شفنا شقة واسعة و نظيفة و منطقة حلوة .. و نفس المواصفات اللي ابغاها و ب20 الف ..
طبعا 20 الف كثيرة مرة على زوجي، و شقتنا الحالية ب 12 الف نظيفة و جديدة بس انها بعيدة عن بيت اهلي ..
و زوجي بيدور عن شقة قريبة من اهلي، عشان اقدر أتطمن على امي كل شوي و أخدمها ..
( هذه نقطة تنحسب له ، بجد مرررة شايل هم امي )

قلتله عجبتني الشقة و نأخذها، قام سكتت و بيسوق السيارة .. و فهمت انه جالس يفكر من فين يدبر الإيجار
بس يستحي يقول ( ما عندي فلوس الإيجار ) ..
.
.
*
قلتله : لاتشيل هم الايجار ( الزيادة ممكن اساعدك فيها ) ..
قصدت فرق السعر يعني 8000 و هو يوفر 12 الف ..
و على اساس ندفع نص الإيجار دحين، يعني لو باساعده فراح اعطيه 4000 و بسس

قالي طيب ادفعي انت دحين 10 الاف و بعد 6 شهور أنا ادفع عشرة الاف الدفعة التانية ..
( انحرجت و كنت راح أضعف بلحظة، لأني انحرج من اي شخص يكلمني بذوق .. بس افتكرت النصايح تبعكم
و افتكرت حركاته اذا بعدين قلتله يدفع و جمدت قلبي )

قلتله و أنا منحرجة منه، طيب فرضا سافرنا بعد 6 اشهر ؟
قالي اعطيك كل شهر بيدك، و الله صدقيني .. لانه أنا علي مصاريف نقل العفش، تأثيث البيت ووالاشياء الناقصة بالبيت ..
قلتله و أنا جدا منحرجة .. بس انت عارف انه هذه مو اول مرة .. و نفس الشي وعدتني بموضوع السيارة و غيره،
بس ما شفت شي .. قالي المرة هذه غير ( ما رديت عليه و بديت أجمد قلبي اكثر و افتكر كلامي معاكم و وعدي لكم )

طبعا أنا كمان علي مصاريف اكثر،.

.

المشكلة انه يحزنني شكله، و يتكلم معايا بكل ذوق .. و أنا الذوق و الاحترام هما نقطة ضعفي ..

بس بعدين سرررررحت و صرت افتكر المواقف الكثيرة اللي وقفت فيها معاه و وعدني بكل مرة انه المرة هذه غير و يطنش
و لا يردها لي، و اذا جاته فلوس بيده .. يصرفها على حاله ..

و اذا فكرته و ذكرته بوعوده انه يرد المال .. يعصب و يتنكد و يتهرررررب و الذوق هذاك كله ( يختفي ) و يبدأ يغلط علي بالكلام
و يبكيني ..

و مثلا يقول لي ( بس لا ترجيني .. او مالك دخل فيا، اصرف فلوسي مكان ما ابغي .. او فكينا بسكاتك ) ..
و وقتها اعصب من اسلوبه و تعليقاته و اقوله لا تكلمني بالأسلوب هذا .. لا تضيع الاحترام و المودة ..
و بعد ما يشوفني بكيت من القهر من طريقته بالكلام معاي، يجلس يعتذر و يبرر و يشرح ظروفه و اسبابه و انه ما يقصد و اني حساسة وووو الخ

و مع العلم انه هذه هي مشكلتنا الوحيدة و الحمدلله، بس بباقي الامور متفاهمين جداً و الحمدلله و مافيش احسن منه ..

عشان كذا قررت اصارحه و أتكلم معاه عن موضوع الايجارات ..

.
.

تاني يوم و اللي هو الخميس، الثلاجة فاضية عشان ما قضينا .. و من الصبح اكلت ولدي اللي موجود .. كيكة و اندومي ..
و قبل لا يروح العمل بعد العشاء، سألني تتعشوا شي ؟ قلتله لا شكراً ..
( لأني حسيت انه ما معاه شي، لو معاه فراح يجيب و بإسراف )

فكرت اني اقضي اغراض للبيت، بس قلت أجمد قلبي و هذه مسؤوليته، عشان لا يعتمد علي ..
بنفس الوقت احترت؟ نجلس كذا طيب بدون اغراض ؟؟
.
.

سالته، ما راح نقضي للبيت اغراض ؟
قالي على حسب قرارك، اذا تبغينا ننقل فنشتري على قد يومنا عشان لا يزيد و يترمي ..
يعني بدل من ربع كيلو ، فحبتين او 3 من اي شي ..

قلتله طيب نحن دائماً نقضي بالشكل هذا .. و قام سكت ..
( أقصد اذا جاب شي بفلوسه، و وقت أنا اقضي باشتري و ما ابخل على البيت و الاولاد و عليه ..
و محتارة دحين بالمقاضي؟ احرم حالي و الاولاد لمتى ؟ و اذا أنا اشتريت هو بيتعود.. طيب و الحل ؟
أموت الولدين من الجوع ؟ و عشان كذا كنت اروح لاهلي و من هناك أنا اصرف عالاولاد و نفسي .. )

.
.

قلتله طيب لو بننقل ترى من دحين بأقول أنا ، أنا ما راح ادفع شي للإيجار ..
عصب و قال ( شكراً ) ووبنبرة حادة ووعصبية و مكشر وقالب وجهه ..

لانه اتخيلني زي كل مرة راح الين و أساعده و هو بعد ما أساعده و اذا جات فلوس بيده يصرفها هنا و هنا ..

قالي بس انت وعدتي انك راح تدفعي نص الإيجار ..
قلتله أنا ما وعدتك و لا قلت اني بادفع الإيجار ..
انت اللي قلت و أنا سكتت و ما رديت و لا علقت ..
أنا قلت اني ممكن بسسس أساعد بالزيادة و فرق السعر ..

و بعدين انت اللي وعدت انك راح ( تدبرها ) و لا نسيت رسالتك ؟ و صارت كلمتي أنا ( كلمة رجال ) ؟
و كلمتك انت ( ما يمحوه النهار ) ..

ما عجبه الكلام و بدا يطالع بالتلفزيون زي تصرفاته المعتادة اذا كلمته عن مسؤولياته ..
قلبت بجوالي و طلعت له رسالته ( لانه شكله ناسي .. و بيشوف حاله مظلوم و أنا الظالمة و قليلة الاصل )

الرسالة ارسلها لي كاتب فيها ( أنا بادفع إيجار الشقة القديمة و راح ادبر إيجار الجديدة و لا يهمك و باعمل المستحيل عشانك )
^
عشان كذا قلت لكم انه كلمة ( ادبرها أنا ) تدخل من هنا و تطلع من هنا ..

.
.

المشكلة بيشوف حاله مظلوم دحين و مسكين .. و أنا الظالمة و القاسية ..

بعد كم ساعة ارسلتله رسالة و قلتله خلاص نجلس بالشقة القديمة و الفلوس اللي بتصرفها للنقل و بقية الأثاث، ادفع بها الإيجار ..

.
.

الجمعة جيت اشوف امي و خرجت بالمغرب مع زوجي للسنتربوينت.. اشتريت ببطاقتي ..
قميصين لولدي الكبير و واحد للنونو و كم شي بقارورة الرضاعة .. و العربية تبع النونو و ممكن تعيش لحد ما يصير
عمره 4 سنوات و كلفتني كلها تقريبا 700 ريال ..

( مادري ؟ تصرفي صحيح و لا غلط ؟ لو استنيت زوجي يجيبها لي .. بيجيب لي من محلات ابو عشرة و ما تعيش و مبهدلة
لأني طلبت منه مرة شنطة حضانة لولدي و جاب له شنطة بعشرة ريال و صغيرة مرة الشنطة و ضيقة مايدخل شي فيها ..

المشكلة، انه على نفسه كريييييييييييم )

بالليل قهرني وقت كلمته عن موضوع بطاقتي الصراف تبع بريطانيا ، و من القهر قلتله ( قدر عالاقل اني رايحة اليوم و تاركة امي
عشان اغراض الاولاد )

يقولي العربية ماني مجبر اشتريها .. انت جبتيها عشان راحة نفسك اذا خرجتي للسوق، تحطي النونو فيه ..
قلتله مع السلامة و قفلت ..

------------

الرد اللي فوق ترى باكتبه من امس الجمعة و دحين اللي خلصت منه الساعة 11 و نص الصبح ..
كل ما فضيت جيت كتبت جزء.. امي تعبانة مرة و ولدي الصغير بيدي، كل ماخلصت منه قمت اشوف امي و طلباتها
و أنا و أخواتي و اخواني نتساعد و نتناوب عشان امي

قلتلها امس
( يا بختك يا عم .. خدمة 5 نجوم، و لا الملك عبد الله ؛) )
ابغاها تفرح