مشكورة خاله قرين ، و ام سفيان ...

بابا المستشار / السلام عليكم ..
انا حاولت اطبق التمرين و مرة مع مرة صار عندي شوية شجاعة و طلعت كم كلمة
لكن احمد راح خربها و كالعادة يزود من عنده ، و سوا اختبار قااااسي جدا بدون ما يقولي
يبغاني ارد عليه ، لكن أنا ما قدرت لان خفت منه صراحة اول مرة اشوفه كذا ..

نفس مشاعري وقت أمي تعصب عليه حسيتها مع احمد وقت عصب ..
ماما لما تعصب لازم اعتذر لها مهما كان عشان اشعر أني أنا الاضعف
وعشان ما تزعل مني وانا احتاجها ، فاعتذر لها عشان ترضي و تخليني أنام عندها
و مع احمد نفس الشي ، اعتذرت له وراضيته ..

احمد بعدين سوي التمرين بطريقة ثانية علي انه هو أمي و أنا ارد عليها
طلبت منه انه يشيل الورقة اللي كاتب عليها اسم ماما لانها قوية جدا و تربكني
بس رفض ، و طبقنا التمرين و قالي قولي الكلام نفسه لامك ..
قلت أني ما اقدر فكان مسجل كلامي وقت التمرين و خلاني اسمعه وقال شفتي انك تقدري
تتكلمي ، سمعته اكثر من مرة ...

لما رحت لماما امل قالت لي روحي جيبي كاسات مع أني جابية لها من قبل
رفضت و صارخت عليه و رديت عليها و قالت لماما شوفي فجر ما تحترمني
و لا تسمع كلامي ، قلت لامي الموضوع و اللي صار ..
و قالت اعتذري لاختك ، قلت لها انها هي المفروض تعتذر مو أنا
زعلت ماما و قالت لي روحي بيتك ...
ما دري حسيت ماما بتبعدني عشان لا تعصب عليه و لانها ما تقدر تسيطر على نفسها

رحت و احمد ما كان موجود ، و لما وصلت اتذكرت أني ناسية مفتاح البيت ...
و احمد مسافر ..
اتورطت و ما فيه الا أني اطلب من خاله ام احمد مفتاح ، بس ما قدرت خجلت اروح لها وخاصة
ان عمي ابو احمد موجود ... تمنيت لو سمعت كلام أمي و لا تكلمت افضل ..!
جلست على الدرج افكر ... ادري بتقول غبية ! بس ايش اسوي أبدا ما اقدر اروح عندهم ..

وهذا الموقف كمان نفس المواقف اللي مرت وانا طفلة لما ماما تطردني من البيت ...!
بس شعوري كان ارحم من قبل و اخف بكثييير ..

طلع ابو احمد و قالي ايش فيك انتي تعبانة ، يا دوب تكلمت و قلت أني ناسية المفتاح
و قلت أني أستني احمد ، تخربطت بالكلام ...
أصر اروح معاه تحت عند خاله ، طبعا ما اقدر اقول لا ..
و خالة و بناتها استغربوا أني جيت .. ما عرفوا ان ماما طردتني

و استغربوا اكثر أني نازلة مع عمي عندهم ، و يقولوا لإبوهم يا بطل كيف جبتها ؟!
راح قالهم أنا عزمها علي العشاء ..
أنا تعبت والله و شوي وأنهار انضغطت كثيييير ، لاول مرة اكون وحدي بدون ماما او امل او احمد
تصدق يا بابا أني ما تكلمت نهائيا ..
و انه أسوء و قت مر عليه ... و لمت نفسي كثير علي اللي سويت و حسيت أني غلطت
وان تصرفاتي كانت صح و كلام أمي صح ...
و امل صح و كل الناس صح وانا غلط ...!

ولما أعطتني خاله المفتاح و دخلت البيت انهرت وبكيت و فرغت كل مشاعري
و أمي دقت عليه بس ما رديت عليها ...

بابا و الله دفعت ثمن التمرين غاااالي جدا ..