والله يالطيبه حياتي غامضة وأنا نفسي ماني فاهمة مسببات المشاكل اللي أنا فيها
أفكار تروح وتجي وظنون
ماعندي شي ملموس يوجهني الوجهة الصحيحة
حاولت المس كل جوانب حياتي أشوف وين الخلل
بذلت جهد إني أحل مشاكلي
سواء كان السبب حسد/ إكتئاب/ ملل أو وجود عنصر انثوي
كل شي منسد بوجهي لأني لو جلست معاه أبي أفهم وش اللي صاير
جوابه اسئلي نفسك!
وش خطاي يافلان؟؟
مهملتني؟؟
بأيش مهملتك؟؟
ماعنده جواب!
يجي يقول أهتمي بالبيت بنظافته بالعيال!
بيتي نظيف ومرتب وأنا قايمة بواجبي أقلها عشان ماتقولون تمدحين قايمة فيه بنسبة 80%
كل شي تمام بس وش اللي يبحث عنه!
فكرت نفس تفكيرك
يمكن بخاطره وحده ثانية
هالنقطة أخاف منها أخاف بس يظل زي ماهو بسلاطته وبنفس الوقت متهني
يعني بس أنا الخسرانة
لكن بخاطري لو ببقى بمكانتي ببيتي مع عيالي ومصروفهم قسم بالله ماعاد لي خاطر فيه الله يهني سعيد بسعيده
مره قلت أنت شكلك تبي مبررات عشان تتزوج لان هذي تصرفات ممكشوفة
قال لو بتزوج ماعندي في أحد
قلت ايه مو مهتم باحد بس تخاف تخسر أنت حياتك ربح وخسارة والخسارة ماهي بحسبتك
قال مايهمني أتزوج شهر واطلق! واتزوج شهر وأنبسط واطلق..
طبعاً وقفت كلام..لأن مستوى الحوار حيل متأزم!
أرجع أقول وضعي ذبحني
لاعرفت وش برأس الرجال ولا وش يبي ولا أنحلت الأزمة بيني وبينه
واي حوار معه ماراح أفهم وش اللي أصلاً مسبب أزمته النفسية معي
بالعكس يلف ويدور بالحوار ويحط المشكلة زي ماذكرت بامور تافهه
وحتى هالأمور التافهه اللي مطفشته حسب كلامه
حاولت إني أهتم فيها وقسم بالله تعبت ومع ذلك يسكت كم يوم
بعدين أي شي تافه يحصل يفجر قنبلة
مثال/
سافر 4 أيام قبل أسبوع
طبعاً رايح لمهمة عمل ومعه مرافقين ووضعه مايساعد يكلمني
صرت ما أكلمه إلا لو أتصل ومارديت
تاركته على راحته وطبعاً لمن أكلمه ردوده رسمية حيل وكلام طلاسم عشان معه واحد ملقوف ومايمون عليه
عادي قدرت الوضع بس كان همي يتصل فيني إذا وصل للمطار هنا...
في سفرته كان وقتي أغلب النهار أروح لوحده تقرأ علي
يعني أول مايطلعوا العيال من المدارس اراجع لهم سريع سريع وأأكلهم وأمشي قبل صلاة العصر
وارجع مع المغرب هلكانه تعبانة من المشوار
يادوب أخذ شاور واصلي واقعد مع الأولاد واسترخي وانا أتصفح اللاب
ومتعودة أن حديقة البيت يسقيها زوجي شايلتها من الحسبة وكنت منشغلة فكرياً بسالفة اللي أقرأ عندها وقناعتي فيها!
صح أخطيت بس ماجت ببالي أبد وكلها 3 أيام ورابع يوم وهو هنا!
طبعاً الرجال قال بجي على 2 وأكدت يكلمني إذا وصل..
مادريت إلا سبع البرومبة واقف عند الباب سبحان الله كنت حاسة!
نزلت فتحت له الباب الداخلي هلا فلان عسى ماشر زعلان علي!
ليش ماطمنتني إنك وصلت بإبتسامة وقميص نوم عنابي مالت على حظي
على طول بدأ
أنا لمن أكلم وبرسمية أعرفوا عندي ناس لاتتصلين ولا تكلمين أنا تعبان لي يومين مانمت
قلت على هونك وقربت منه أسلم وقلت الحمدلله على سلامتك نورت البيت
وثاني شي انا ما أتصل أنا أرسل أسأل وحتى رسالتي ماترد عشان كذا أتصل أتأكد يمكن مو جاي وأنتظر كذا!
أنصدمت جداً من أسلوبه مع أنه مو شي جديد
بس توقعت عشاني أقرأ عند وحده يمكن تخف حدة الخلافات!
طلع حظي خايب معه!
من بكرة قعد يسقي الحديقة ويتحلطم
ليش الزرع ميت ماسقيتوه!
ماهمكم إلا نفسكم ودلع وبس وقع يرمي كلام
قلت الله يهديك نسيته ماجاء ببالي
بعدين أي إهمال البيت زي الوردة والأمور ماشية تمام جت ع الحديقة!
يعني ماشفت أي شي زين بس شفتها!
قال لا ماشفت
قلت المشكلة بعيونك!
وتركته
ومر من عندي يسب ( وجه ودر) يعني أعتقد معناها يسد النفس!
قلت من وين يبي وجه يفتح النفس وكل حياته مشاكل وسب
ماشاف وجهه كان عرف وجعي يجيب العافية
زوجة مايلمسها
ماينام معها
مايضحك معها على نكتة
مايقبل منها أي نكتة ومقلب
وش يبي يشوفها!
هالكلمة خنقتني حيل
زوجي أبو عيالي على كل اللي شفته منه يقول هالكلمة لي
عصبت قلت عيب عليك هالكلام والله عيب ترمي الكلام بالشكل هذا
عيب عقب هالعشرة عيب عيب
العيال نزلوا وهو سكت ماعاد رد بحرف ومشى عقبها عادي كن ماصار شي..
هذي حياتي كل يوم!!