السلام عليكم ..
المستشار الكريم ..
مو عارفة من وين أبدا ؟! و لا عارفة إش الي يستحق أن يذكر والي مو لازم يذكر ؟!
ابغى أحمد يتكلم عني لانه فاهم ، ماعندي اي رغبة للكلام عن اي شيء..
كله زي بعضه تكلمت أو ما تكلمت ...
أحمد يلح علي بالكلام وانا مو قادرة اركز علي شيء محدد اتكلم فيه ..
في أواخر رمضان وضعي كان سيء جدا من الناحية النفسية والجسدية ، اعتزلت الكل حتى احمد مع انه كان دائما جنبي
ماكنت حاسه باحد كنت احسني مشغووولة جدا مع ان ماعندي شيء؟!
اذكر إني كتبت كثير بالم وصعوبة وماتنبهت لنفسي الا وانا ابكي بحضن احمد بعد معاناة بعدها بدات اشعر بالهدوء وشيء
من الراحة و النوم الغير مزعج والحياة الطبيعية سوالي احمد حفلة زي ماوعدني وجابلي هدايا مو وحده ، أعطاني احساس
بالأمن أكثر و ثقة أكبر .. " مشكور، مشكور ياحمد "
بدات وحام على الليمون وهنا احمد كله يفضحني و ما يجيبلي الا من عند اهله ..
الى ماراح ابوه وجابلي كرتون ليمون ، يعني العالم كله عرف بسبب احمد ..!
بعدين سافر وانا رحت لماما ..
ماما كانت بتروح لجده تجلس عندها الى العيد انا ماحب اروح عند جده ، ما ارتاح هناك ابدا بعض خالاتي وبناتهم واولادهم عندها وفوق هذا جده كله تصارخ بسبب وبدون سبب وما تبغى احد يسوي شيء الا بإذنها..!واذا عصبت منا ماما تعصب معها
حتى لو ماسوينا شيء يستاهل ..!
فرفضت اروح مع ماما لها ، ماما راحت ثلاث ايام ورجعت وهي زعلانة مني تقول جده زعلانة لأني ماجيتها ولان ماما " مدلعتني على حد قول جده " ومخليتني على كيفي وبالبيت لوحدي مع الشغاله وهذا غلط ؟؟!!
بعدين خالي قال لماما انه جاني بالبيت وهي مو موجودة وقالها ماني مصدق اني شفت فجر ..وسالتني ماما اش ضيفتيه
قلت لها ولاشي لانه هو رفض وزعلت وصارخت علي ..اصلا انا يادوب كنت جالسة معاه من الخجل عاد تبغاني اضيف ..!
وتقولي ليش يكلمك وما تردين عليه ؟ قلت لها انه هو يتعمد يخجلني و يقولي ليش كل ماجيت ماتخليني اشوفك ..
و معقول الطفلة فجر الي دائم متخبيه وراء امها حامل ؟! كيف ارد عليه ..!
يعني ماما كانت زعلانة مني و مشحونه بس متحمله ...
بعدين جت أمل وكملت ...
ماما تقول لنا لا تروحوا من البيت قبل تنظفوا غرفكم ، أنا كل مرة انظفها بس امل لا ..
جت أمل ودخلت غرفتي وجلست فيها بتنام تقول غرفتك نظيفة وانا ما اقدر اجلس بغرفتي لأني مانظفتها و انا اتحسس منها
قلت لها لا ، اطلعي منها ، رفضت تطلع وقالت روحي نامي عند ماما..
جت ماما من شغلها و قالت لنا اش فيه وقالت لي تعالى عندي ، رفضت وقلت حرام ياماما انا الي انظف غرفتي دائم وهي لا ، و تجي تاخذها وطلعني منها ..! عصبت علي وقالت انتي صايره ما تسمعي كلامي و تردي عليه بعد ..
اذا اختك الكبيرة قالت لك شيء اسمعي كلامها ولا تردي عليه ، و صارخت على امل وقالت لها روحي نامي وانتي اجلسي بالصالة وخلوني اسمع لكم صوت ..!
امل زعلت وجلست تقول كله منك انتي الي عصبتيها علينا ولو ماما مو موجودة كان عرفت اتصرف معك ...
رجعت لغرفتي وقلت لها والله ما تجلسي فيها جت ماما و ضربتني ...!
وقالت لي كلام كثير .. وتقول ياليتك زي امل ...
ماما على بالها كل شيء يجي بصراخ وقوة وامل زيها ، ماما عارفة ان امل غلطانة لكن هي تبغى تنهي الموضوع وقالت لي تعالى عندي وزعلت لما ماجيت وصارت مشكلة وهي مضغوطة اصلا ..
كرهت تصرفات ماما وعصبيتها والقلق الي تعيشنا فيه ، حتى لما جاء احمد ، قالت له فجر تعبانة وهي ما سالتني .!
ماهي اول ولا اخر مرة ماما تضربني فيها ..
احمد ما قصر بشي سوا الي يقدر عليه ، و ساعدني بالي يقدر .. كفاية وجوده جنبي ..