ياهلا بالمسداني وشهر مبارك عليك موضوعك جميل جدا أختي العزيزة شوفي ياقلبي أنا زوجي وظيفته عسكري وبالرغم من تعبه في الدوام ورجعته متأخر أحيانا مايجي من العمل إلا بعد صلاة العصر وكمان صايم وتعبان بالسكر ولاكنه مايقصر معي أبد والله لا في رمضان ولا غير رمضان إنه دائما يساعدني ولو كان عازم أحد يفطر عنده والله إنه يستأذن من العمل بدري ويجي يساعدني بالمطبخ الله يحفظه لي يارب ونوع المساعدة يقطع الخضار والدجاج ويضبط العصيرات ولو فيه شئ ينخلط بالخلاط يخلطه وكمان يطبخ اللحم والمرق ويضبطه أحسن مني كمان ويطبخ أي أ كلة يعني تقريبا يساعدني بكل شئ ماعاد لف السنبوسه هاذي مايعرف لها مرة لفها لي كلها تفككت بين الزيت وكانت محشية جبن وتعالي وشوفي الزيت كيف صار كأنه طراطيع مايعرف يشدها زين ومن وقتها حلفت عليه ماعاد يلف حبه لاكن يقليها بين الزيت عادي مافيه مشكلة بالنسبة لتحضير
انا أصرف الأكل بالصحون والعيال يشيلوه يحطوه على السفره لاكن لو فيه شئ ثقيل وحار زوجي يشيلة عن العيال لأني أخاف ينكب عليهم ونفطر وسفرتنا مانرفعها إلا بعد مانصلي المغرب زوجي يفطر شوي هو والعيال بعدين يرو ح يصلي بالمسجد المغرب وبعدها يرجع هو والأولاد ونواصل فطورنا وعقبها نرفع الصحون للمطبخ وبعدها دلة قهوة مع صحن حلا وبراد شاي نعناع مع صحن معجنات ويارب لك الحمد والشكر أسأل الله أن لايغير علينا يارب .
بالنسبة لتخفيف من أشغال المطبخ بإمكان الوحدة مننا تنجز بعض الأشياء بعد ماتقوم تصلي الظهر بإمكانها إعداد الحلا وتحطه بالثلاجه وكمان الجلي والكريمة وتقطع الخضار والبصل إللي بتطبخ منها وتبشر الأشياء إللي بتستخدمها بالحشوات وتحطها بالثلاجة وتجهز العصيرات وتجهز بعض الطبخات الخفيفة وإللي تحتاج سلق وتحطها في الثلاجة وتلف السنبوسه ومايبقى عليها إلا إنها
تحط القدور على نار هادئة وتبدأ تحط الأشياء إللي قطعتها وجهزتها مسبقا من لحم أو دجاج أو خضار أو سمك وبكذا يخف عليها الشغل شوي بعد العصر
بالنسبة لغسيل المواعين أغسلها بعد صلاة التراويح هيه فعلا متعبه شوي وزوجي مايقصر أحيان يساعدني فيها وأحيان أنا أرفض لأن أحسه يحوسها حوس مايرتبها مثل ما أنا أبغى بس يشيل قهوته ويجلس يسولف معي بالمطبخ حتى أنا أخلصها وأرتبها وعقبها نرجع نكمل سهرتنا بالصالة لاكن إذا كنت تعبانة مالي غير زوجي يغسلها والله يعيني الملاعق والشوك والسكاكين أجلس أدور وراها ساعة يخلط الحابل بالنابل المواعين الزجاج مع المعدن مع البلاستيك كلها مخبصة تخبيص أقول له ليش كذا يقول أهم شئ تكون نظيفة وبس ماله داعي الترتيب
الله يجزاه خير هو مايقصر لاكن الرجال لودخلوا المطبخ لابد تكون فيه حوسة شوي أنا بصراحة ما أكره شئ عندي إلا لما أعد وجبه وأتفنن في إعدادها ويكون نفسي يطلع لها شكل خاص ويجي زوجي وهيه على النار ويقوم يحوسها حوس يحط ملح ويحرك زود فلفل وبهارات ويحرك ويخرب عليه شغلتي وآخر شئ يقول طبختك حلوة بس زاد ملحها شويه أو ماحطيتي بهارات زيادة
أحيانا أطفش وأتركه يحوس لحاله حتى يشبع من المطبخ ويطلع من نفسه وعقبها يفضى لي الجو وأشوف أشغالي بس ما أحسسه إني متضايقة من دخلته معاي المطبخ لأني مستفيدة منه في بعض الأوقات بالذات في تقطيع البصل وهو كمان مايستغني عن شغل المطبخ من قبل الزواج هاذا طبعه حتى عند أهله بالرغم من أمه وأخواته أربع بنات بس
يحب شغل المطبخ وكمان لو طلعنا البر هو يطبخ لنا والحمدالله مايقصر أبد الله يحفظه لنا يارب .
__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق
اشهد ان لا إله إلا الله وأن محمد رسول الله