صباح الفل و الهنا و الجمال على احلى بنات فى الدنيا

يا رب يكون الكل بخير و فى احسن حال

معلش مكنتش عارفة ارد عليكم الفترة اللى فاتت كنت مشغولة و تسألونى بأيه اقول معرفش اليوم بيعدى بسرعة رهيبة و اخر اليوم اقول كنت عاوزة اعمل كذا و كذا طب معملتوش ليه؟ نسيت....!!!!!!!
معلش سامحونى بقى ....... السن


حبتدى النهاردة من صفحة 19 معلش اذا كان فى قبلها رد المفروض يترد سامحونى بقى


نورااااااااااااااااااااااااااااااا

لما قريت مشاركتك نطت فى بالى جملة " و اديتهم العنوااااااااان" ههههههه
معلش ذى شكة الد"ن"بوس حتعدى عليكى الايام متلطشة و مش حتعرفى مين اللى بيلطش و اللطشة اللى جاية جاية منين و لأى اتجاه
بس بعد شوية الدنيا حتتظبط و نصيحة اخصلى من يوسف على اقرب حضانة حيتعلم و يتبسط و انتى حتعرفى تاخدى نفسك لأن بجد صدقينى مهم ليكى و لكل اللى حواليكى
بس ليكى دعواتى الصادقة و اللى من القلب ربنا معااااااااااااااكى


فلونا اضم صوتى لصوت زهورة عاوزة اعرف عرفتى ازاى انك حامل و وقع الخبر عليكى و على جوزك و كل حد ماشى فى سكتك
يالا عاوزة تفاصييييييييييل التفاصيييييييييييييييل


مرموسة ايه الشراسة اللى انتى فيها دى
يا تبقى قطة يا نمرة؟
تروحى و ترجة بالف سلامة و امانة عليكى اذا فى بحر فى الحتة اللى رايحاها تقوليله كوكار بتسلم عليكى و بعتالك بوسات اااااااااااااااد كدة



نعومة
الف حمد لله على سلامتك
يا رب تكونى اتبسطى فى سفريتك انا كمان ان شاء الله مسافرة الشهر اللى جاى مصر و ان شاء الله تكون سفرية حلوة دى كمان



منوووور تروحى و ترجعى بالف سلامة
و نصيحتى ليكى خلى اجازتك ليها برنامج تستفادى منها غير انك تنامى و ترتاحى طبعا
تروحى و ترجعى بالف سلامة


غموضة الحلوة
ياتى على حمودى ابو اربع شهور دا
ربنا يحميه يا رب
و يكرمك و يرزقك كل ما تتمنيه يا رب


زهورة الحلوة
قوليلنا روحتى فين جوا المملكة؟ معلش انا معرفش ممكن تتفسحو فين جواها انا اسمع ان جدة حلوة بس فين تانى؟
ممكن دليل سياحى حضرتك؟
بالنسبة للست كرمة هى لحد دلوقتى مطلعتش ولا سنة توحد ربنا بس عاااااااااادى شكلها حتطلع ذى كريم و السنان تطلع كلها مرة واحدة بس هى بتحب تقف جدا يعنى نيجى نقعدها مترضاش خالص عاوزة تفضل واقفة بس مش لوحدها طبعا
يالا احتمال بقى تمشى بدرى اهو حد من عيالى يعمل حاجة بدرى لان شكلى بقى وحش قوى
اما بالنسبة للاستاذ كريم
راح الحضانة من اول الشهر دا و انا بجد لمست تغيير فيه كبير عن الاول فى شخصيته و تعامله مع الامور و حتى فى لعبه و كمان انه يستحمل انى انا او باباه منكنش موجودين معاها يعنى لما كنت باخده و انزل و احطه فى كرسى العربية لحد ما الف عشان اركب انا كمان كان يعيط لوقتى ممكن انزل و اسيبه فى العربية مع باباه و عادى الموضوع يمر مررو الكرام
فبجد موضوع الحضانة دا اختراع اكثر من رااااااااااااائع و كمان بنخلص من الزن و العفرتة كام ساعة الواحد ممكن يعمل اى حاجة بروقان حتى الطبيخ
انتى بقى قوليلى اخر تطورات الاستاذ الصغير


حلم حياتى

ربنا يفرح قلبك و يطمن بالك ذى ما طمنتينا على رونا بجد انا كنت قلقانة عليها جدا
اخر اخبارك ايه؟ ما الجديد تحت الشماميس؟

ابتسامة القمر
ربنا يقومك بالف سلامة و تفرحى ببيبى جميل معافى بأذن الله


منمن
انا حكون فى مصر فى الخريف يالا تعالى بقى و انا افسحك هناك


مخملية الاحساس
انتى بجد مخملية الاحساس
انا عمرى ما قريت مشاكرة من حد بكل الاحساس الجميل و الصادق دا
كأنى بقرأ لكبار الكتاب
ربنا يكرمك و يفرح قلبك
بس سؤال انتى ليه مش مشاركة معانا هنا؟
هو احنا وحشيين؟



باقى البنات بحبكم فى الله

__________________
ربنا يحفظلى اولادى من كل سؤ
فَأَنْبَتْنَا فِيهَا مِنْ كُلِّ زَوْجٍ كَرِيمٍ /اللهم ارزق اخواتى بالذرية الصالحة