ذكرتيني بحالتي مع اختلاف بسيط انها كانت حبيبته قبل الزواج وبعد زواجنا استمر طيفها يلاحقه برغم انه ماحسسني بهالشي ..وشخصية زوجي نفس شخصية زوجك تقريبا في اخلاقه واسلوبه وقناعته ان الكذب على الزوجه حلال ومحافظته على بيته من الطلاق ,,و,,وكانت هي اخذت فتره ترسل وقت زعلي معاه ووقفتها عند حدها بإرسالي على امها رساله بس للاسف ماصارت ترسلي انا صارت ترسله هو والشك للحين لاعب فيني ان بينهم شي بس اللي احيانا يريحني انه الحمد لله ملتزم بالصلاه وفي اخر نقاش معاه قلت انا بعيش حياتي وبربي عيالي واللي علي بسويه واللي يغلط يقدر بمليون طريقه يخبي على اي شخص الا على رب العباد هو اللي كاشف وعارف كل شي وهو اللي بيحاسبه ولازم الواحد يخاف لان هالاشياء دين وسلف جلس يطالع فيني بإستغراب وكن بعيونه ندم وخليته يقلب كلامي وانا ظاهريا رجعت مثل اول احاول اكسبه لصفي بأي طريقه وانا داخلي نار لاني اكتشفت ان عنده جوال ثاني وطبعا انكر وبشده..ويدلعني احيانا فوق العاده بس انا عارفه هالحركات يسويها كنوع من التكفير عن مكالماته لانه حاس بتأنيب الضمير وانا حاسه انه بيرجع بدعائي وبأسلوبي
ونفس الشي اقوله لك طنشي طنشي طنشي ادري صعب وادري نفسيا مو متقبله بس كل ما اتضايقتي اتوضي وصلي وابكي بصلاتي وابكي لما تقرأين القران صدقيني بترتاحين...عيشي حياتك خلي عندك اهتمامات وهوايات اطلعي مع اطفالك للحديقه او لأماكن الترفيه العبي معاهم حاولي حاولي حاولي تنسي وتطنشي سوي اللي عليك من واجبات بنية التقرب لله بإعتبارها عباده
تكفيين طلبتك لا تستسلمين شوفي كم لحظه ضيعتيها بالتفكير بوحده ماتستاهل والله ماتستاهل تهملين نفسك وصحتك علشانها..مقهوره عليك تسع سنين؟؟؟ ماشاء الله على قوة التحمل اللي عندك انا فتره بسيطه واحس نفسيتي وكل شي صار دمار بس الحمدلله خليتها اعلان حرب بالنسبه لي وشلت الاستسلام والضعف من قاموسي ..وانتِ كمان لازم تكون عندك قوة التحدي اذا مو علشانك علشان اطفالك استمدي منهم القوه (المؤمن القوي خير واحب الى الله من المؤمن الضعيف)
هذي الاشكال واضح هدفهم يبغون يخلونك تعيشين بخوف وقلق وتسببين مشاكل لبيتك وتنكدين ع الرجال علشان يحصل الراحه عندها بعد مايطفش ويمل من النكد اللي تسببينه له بس انتِ ماشاء الله عاقله
استغفري كثير وادعي الله وقولي اللهم اكفينيها بماشئت وادعي ان ربي يسخر لك زوجك ويصرفه عن اي احد ثاني وكل ماطلع قولي اللهم استودعك قلب وروح زوجي وكل جوارحه وان شاء الله تشوفين السعاده بس تكفين لاتنكدين على عمرك وتجيبين لنفسك الامراض علشان ناس ماتستاهل لأن اطفالك يستاهلون ان يكون عندهم ام قويه ومتماسكه وماعندها اي علل نفسيه بسبب اللي مايخافون الله