عفوا ... خطأ مطبعي بالاية الكريمة والصحيح " وأفوض أمري الى الله ... "

بخصوص موضوعك يا أمل أتخيل اللي صار كالتالي

انت قريبة لزوجك من جهة والده ... ووالده شخصيته قوية حتى أمام والدته وهذا لصالحك .

لما صارت المشاكل بينك وبين زوجك وخاصة لما انتقلتوا لبيت أهله وصارت مشاكلكم مكشوفه لهم وبالذات لما تركتي البيت ورحتي بيت أهلك ... صارت والدة زوجك تهون عليه وتقول له اذا زوجتك متعبتك اتركها وخذ بنت خالتك وهذا احنا مجربين أختها وعايشة معنا ومرتاحين معها (( كلامها منطقي جدا وأي أم بتقوله لولدها ))

وبالرغم من دور والد زوجك برجعتك لكن أتصور لو انه زوجك ما يعزك ما كان قال لك عن مخططاته . كان تزوج بدون ضجة خاصة انه والده استسلم بموضوع زواجه الثاني .
ودليل ثاني على رغبة زوجك بالاصلاح هو طلبه منك التودد لوالدته .. وإلا ليش يهتم اذا تحسنت صورتك أمام أمه أو لأ .
طبعا حبه لولدكم برضه دليل على حبه لك
وبما اني أعرف انه زوجك مو من النوع الحقود أو اللئيم وما أظن انه يذلك إذا شاف منك التسليم له . وكل مشكلته انه يحس انه صغير بنظر كل اللي حواليه . وما ساعدتكم الطريقة اللي بدأتوا فيها حياتكم .. كانت بداية صعبة جدا لكن صار الوقت اللي تقدروا تتجاوزوها وتنسوها

اقتراحي

من رأيي تقعدي معاه (( حافظي على نبرة صوتك منخفضة وعيونك ما تركزيها عليه )) واطلبي منه انكم تعطوا زواجكم فرصة جديدة ... قولي له شنو رأيك نبتدي من جديد .. انت تنسى أخطائي وأنا بعد أنسى (( وقفي عند كلمة أنسى وما في داعي تقولي أخطاءك بوجهه احتراما له ))
اذا سألك عن السبب قولي له لأني ما أحتمل جفاك معي وأتمنى رضاك علي .. (( كبري راسه )) وكمان عشان أولادنا ما يتشتتوا .

ايش طلباتك مني ؟؟؟ أتوقع بيقول احترام لي ولأهلي وووو ..... مهما طلب وافقي له وقولي له على راسي وبعدين نشوف كيف نحصل حقوقك منه .
إذا ناقشتوا موضوع أمه وأهله .. قولي له أنا بخدمهم على قدر ما تساعدني صحتي وحملي كرمال عيونك لأني أشوفك تستاهل تكون زوجتك أحسن وحدة بين زوجاتهم .
وطالباتك انتي ؟؟؟ تودني .. تناديني باسمي .. وتقدر وضعي الصحي والنفسي .. ((( قوليلي يا خاله عن طلباتك اللي ودك تطلبيها منه ))) ...

اذا ذكر شيء غلطتي فيه لا تكابري وتحاولي تبرري غلطتك .. بكل اختصار قولي فعلا غلطت .. معاك حق وما أكررها باذن الله .. وشوفي كيف الموضوع بينتهي بقلوب شرحة وبأسرع بكثير من لو كابرتي وناقشتي .

إذا عاتبك بموضوع روحتك لأهلك وضحي له السبب باختصار شديد عشان ما تتناقشوا فيه وعلى طول انتقلي لموضوع حبك له وركزي على انك بالرغم من أنك رحتي لكنك تحبيه .. مافيها شيء ولا فيها مذلة انك تقوليله أنك تحبيه خاصة انه روحتك لأهلك معناها انك كارهته فالأمر يحتاج انك تأكدي على محبتك له .
لا تجيبي سيرة الزواج الثاني لانه مو وقت التفاوض عليه الحين .. لازم نمد جسور بينكم بالأول وبعدها تقدري تموني عليه بهذا الطلب ... الحين الوقت بكير .

اتفاقكم هذا بيخلي محاولتك لكسبه أسهل لانه معاملته لك بتكون أفضل وبيتعاون معك .

__________________