بأقول شئ أخير ، معليه أحس من كثر ما ضغطي اترفع هذه اليومين ،.
إني بأولد خلاص ..

أنا أدري إنه كان ممكن أقول من البداية ، الشئ اللي ما أرضاه لنفسي .. فما أرضاه لغيري ..
لإني أعرف نفسي ، ما أتقبل يكون زوجي خاطب قبلي ، و رحم الله امرئ عرف قدر نفسه ..

بس ما نقدر ننكر إنه كل وحدة لها شروط في الزواج ، تختلف عني و عنك و كل انسان له شخصية تختلف
عن الثاني .. و الدليل إننا في المنتدى هذا، نقراه هناك اللي ممكن تقبل بمتزوج و اللي ترفض ، و اللي
ممكن تتزوج مطلق و اللي ترفض و اللي تقبل إنها تتزوج بشخص أصغر منها و اللي ترفض ..

مثلا ..
قلت لها مرة من المرات، أهم شرط عندي إنه زوجي ( يصلي و يحافظ على صلواته ) و أزعل مرة لو أهمل
في صلواته ، و هي قالت ( لا .. مو مهم ، لإنه مو صغير و هو اللي يتحاسب في الاخرة و أنا مالي دخل
فيه .. ربي يحاسب كل شخص لوحده )

و قريبتي مثلا ، عندها الراتب شئ مهم و أساسي ، و أنا عندي أهم شئ أخلاق الرجال و طيبته و تعامله
معاي و مع الناس ..

فما أقدر أحكمها و لا أحكم غيرها ..
و أنا ما جبت لها شخص ( سكير و لا تارك لصلاته و لا عاق لوالدينه و لا صايع و لا عجوز و لا ضراب و غيره )


.
.

و زي ما قلت ، بإني يوم شفت قريبتي و من المرة الأولى ، سألتني كم عمر بنته ؟ و حكت لي عن زميلتها
اللي تزوجت مطلق و مبسوطة ..فرديت عليها و قلت لها ، ما عرف و الله كم عمر البنت .. بس بأخذ
التفاصيل كلها من زوجي ..

فما ردت و لا اعترضت ؟ و لا قالت لي وقتها ( لأ لا تسأليه .. و ما أبغى مطلق و انتهينا ) ..

فعلشان كذا ، أخذت التفاصيل من زوجي المرة الثانية يوم كلمني ..
و هي لها حرية الرفض و القبول ..

.
.

و أنا و الله اسفة عالعنوان يا صبايا ، و إني حددت العمر ،.
و ما قصدت إنه بس اللي عمرها 28 تدخل هنا و ترد زي ما فهمتوا

بس قلت ، أبغى أعرف ؟ يمكن أسأت لقريبتي من غير ما أدري ؟
يمكن إذا وحدة في نفس عمرها و نفس وضعها ، بتنقل لي مشاعرها ؟
يمكن أقدر أعرف فين الغلط اللي عملته و من غير ما أدري ؟؟؟

.
.

و اللي صار اليوم طبعا .. إني تكلمت مع أختها الكبيرة و هي اللي فتحت لي الموضوع ..
و فهمت منها إنه هي و أخوانها و أخواتها فهموا ( غلط ) و كل واحد فسّر من راسه ..
و قلت لها ( تعالوا أسألوا .. تكلموا .. مو من حق أي شخص يتكلم و يحكم من عنده و قبل لا يسمع مني )
و حكيت لها كل شئ ..

في البداية قالت لي :
( ليه تغصبوا البنت إنها تتزوج مطلق ، و ليه تقولوا لها اتركي وظيفتك ؟ و ليه و ليه و ليه .. )

رديت عليها بكل اللي قلته لكم .. و قلت لها إنت ما كنت موجودة ، فكيف تحكمي من كلام تسمعيه من هنا
و هنا .. و إني لو ما حسيت أختها متحمسة و تسألني عن عمر بنته و كذا و لا لو لاحظت إنها تضايقت..
كنت قفلت عالموضوع ..

و بعدين أنا مجرد إني جيت و سألتها و ماحد غصبها ،، الرجال لسى و لا يدري حتى عن الموضوع ..

و لا حتى جاء و اتقدم .. بس ما حبت أمك إنه يجيب أهله و بعدين تعتذر و تقول اسفين و بنتي رفضت و
تبغى تشتغل ؟ حتى أمها ما غصبتها .. بس خاصمتها عشان مصلحتها و الكل يدري إنه أمها كلامها قاسي
و كبيرة في العمر ..

المهم ..
في الأخير ، قالت لي أختها الكبيرة :
( و الله إنك ما غلطتي أبدا ، و بالعكسسسسس مواصفات الرجال مرررررة ممتازة .. و خاااااااااااااااصة يوم
عرفت إنه صاحب فلان - قريبنا - ، الصراحة تطمنت أكثر ،، و لإنه قريبنا هذا بالذات .. انسان ثقة و نعرفه ما
يصاحب أي شخص إلا و يكون متأكد من أخلاقه و تربيته .. و زوجك لو فتح الموضوع ، فكلميني و أنا أقنع
أختي ، و من جد خسارة .. و أختي تسرعت بالرفض ) ..

قلت لها :
( خلاص الموضوع اتقفل نهائي من يومها، و أنا ما حأتدخل مرة ثانية في مواضيع زي كذا ) ..

.
.

و طبعا ،، اللي قالوا إنه الشخص يستاهل زوجة تعوضه عن طليقته ..
فمعاكم حق و هذا نفس كلام أم البنت .. قالت لي :

( خلاص اعتذري من زوجك ،، و أنا زي ما أبغى مصلحة بنتي .. كمان ولد الناس زي واحد من أولادي و
أتمنى مصلحته و يستاهل إنه يتزوج وحدة تهتم فيه و تهتم في بنته .. و بنتي ما تنفع له .. و من بعد اليوم
خلي أخوانها و أخواتها ينفعوها و أنا شلت يدي منها .. خليها لا تتزوج و بكرة لا تقول أمي السبب ..لإنها
مسؤولة عن نفسها ) ..

.
.

هذا اللي حصل ..