نصيحة لوجه الله تعالى لا ترسلي لها ... طريقة تعامل زوجك معها هي تعرفها وراح تميز انه مو هو اللي يرسل ...
فكري وتصوري الوضع ... هي أرملة يعني مو جاهلة ... وهي في سوق العمل يعني طول يومها تصارع عملاء وموظفين وزباين يعني شخصيتها مو سهلة . وهي تطارد رجل متزوج ووصلت فيها الوقاحة تناقشه بأموره الخاصة مع زوجته يعني مو بريئة وما ينفع فيها وعظ ولا تذكير ..
كل اللي ممكن يحصل اذا كلمتيها انها تبدأ تكيد لك من تحت لتحت أو انها تروح على طول وتقول لزوجك وتتمسكن وتقول انها بتتركه وما تحب تدخل بينكم وما ادري شنو وتخليه بطريقة غير مباشرة هو يتمسك فيها ويحاول بروح الشهامة والرجولة عنده انه يدافع عنها وبيشعر بأنها كانت المنقذ والسند له في الوقت اللي كنتي متجاهله مشاعره فيه والحين جا الوقت اللي يكون هو سند فيه لها .خاصة انه تصرفك فيه تجاهل وتهميش له وطعن في شخصيته وكأنه مو موجود .. كيف يعني ترسلي بإسمه ؟؟
ممكن توصلي لها معلومة بطريقة غير مباشرة بانه زواجكم ناجح والحب بينكم موجود وبدون ما أحد يقدر يلومك ....
بعطيكي مثال وانت شوفي ظروفكم وطبقي بناءا على ظروفكم .. طبعا الدعاء واللجوؤ لله أكبر أسباب نجاح أي شيء
البنت اللي قلت لك عنها كانت تتصل على انه شغل وكل مرة يكلمها بحجة مختلفة ويراوغ ومرات يعصب ..
أحيانا أذكره بالله واحيانا ببناتنا وأحيانا غيره ودموع وأحيانا أسكت لما أشوف انه ما راح يتقبل وممكن يعصب ..
المهم كنت أدعي ربنا كثير فسخر لي ربي انه زوجي نام واتصلت أول مرة وثاني مرة فقررت أرد عليها .
بكل وقاحه طلبته مني .. قلت لها بس هو نايم .. خليني اشوفه اذا يقدر يصحى ..
رحت عنده وبدون ما أشيل الموبايل من عند فمي صرت أناديه بصوت نااااااااااعم وتدليع ويا حبيبي ويا عمري يللا قوم فلانه على الخط وبقدرة ربي تحرك زوجي من نومته شوي وتكلم بكلام غير مفهوم ..
ابتعدت عنه ورديت عليها اني حاولت أصحيه لكنه ما صحي ...
من بعدها صار اذا اتصل فيها ما ترد عليه ولا تعطيه وجه . كانت متصورة اننا على خلاف انا وزوجي وانه بينهم حب وخرابيط لكن لما سمعت جزء من حياتي معاه كزوجته انصدمت .
ولما قام من نومته قلت له انها اتصلت وانا رديت وحاولت أصحيك لكنك ما صحيت وانا بالأول تجاهلت اتصالها لكنها ألحت وكل شوي تتصل وخفت يكون عندها شي مهم <<<انا بريئة مسكينة
طبعا تضايق منها ومن الحاحها وانا كملت عليه بكل شوي قصة عن بنت تزوجت فلان عشان فلوسه أو مسكينة أبوها مات وهي صغيرة وعندها عقد نفسية وتبي رجل من عمر أبوها . ومع انه يعرف قصدي لكن يكفيني اني أثرت شكه بنواياها وزعزعت ثقته فيها .
هي الأمر الغير ثابت وانتي الأمر الثابت فالأسهل يستغني عنها اذا شعر انه حياته تلخبطت
الرجال بشكل عام أنانيين واللي ضد مصلحتهم ويسوي لهم مشاكل يكرهوه .. تقدري تخليه يكرهها لانه وجودها بحياتكم يعمل مشاكل ولما يشك بنواياها تجاهه .
مربط الفرس عند زوجك مو عندها .. اذا فعلا جاد انه يبعدها عنه بيبعدها
انتي شدي وارخي على حسب وضع زوجك ..أحيانا ينفع تلومية وتذكريه وأحيانا تحتاجي تشوفي وتتجاهلي حتى ما تكوني نكدية ... انتي ذكية وفاهمة زوجك .
لا تنسي الدعاء ... الدعاء
__________________
