السلام عليكم ورحمة الله وبركاته
الشكر لله ثم لكل من سطر بيديه نصيحة أوتوجيه أو دعوة.. الله يجزبكم عني خير الجزاء وأحسنه.. ويثقل بها
موازين حسناتكم..
الله يسعدكم في الدارين ويصلح لكم نياتكم وذرياتكم ويرزقكم من خيرات الدنيا ونعيم الآخرة..
الله يرزقكم طمأنينة القلب وراحة البال وسعة الرزق..
اتأخرت عليكم أطمنكم لأن الردود القاتلة أتعبتني جدا وصرت مو قادرة أكتب ولا أرد..والحمد لله الردود
الإيجابية استفدت منها كثيرا كثيرا....
المهم
بفضل الله زوجي رجع واليوم كملنا تسعة أيام مع بعض..
وبعد رجعته بيومين أخذني السوق اشترى لي هدية..وخيرني فيها..وهذه أول مرة يسويها.
يمكن حس بتأنيب الضمير خرج من البيت في الوقت اللي أنا شايلته فيه على كفوف الراحة..
يمكن حس بالغلط المفترض كان يمتص غضبي بطريقة غير ترك البيت..
بإيش حس الله أعلم
مدري المهم أول مرة يجيب لي هدية بنفس.
أنا طلبته أولاده ما أشوفهم ولا يدخلون بيتي حتى تهدأ نفسيتي..
طبعا هو زعل وقال مايدخلوا عندك مدى الحياة...
قلت له افهمني ولا تضغط علي..أنا محتاجة وقت..
تخيل الوضع كان بالعكس (مافي شي ضروري ولا أمر مهم) واللي عندي يمهدوا لي اتصال بأبوهم في الخفاء
ايش يكون شعورك وردة فعلك..؟؟!!إنت ماترضاها لنفسك..
ثم
هي وأولادك عارفين من يوم تزوجنا ما أرد على أي اتصال منهم بجوالك..لكن في فترة مرضك أنا اللي بأرد..
اتعمدت الهانم تتصل في هذا التوقيت وهي عارفة مسبقا ممكن أنا اللي أرد بحكم إنك مريض!!
طليقتك لو ناوية خير لما اتصلت وأنا اللي رديت كان كلمتني عادي وطلبتك وكلمتك بكل ثقة؟؟!!!
الأصول أصول مايختلفوا عليها اثنين..
ليش تخبي اتصالها بك عني؟؟
الحركة اللي سوتها استفزازية بحتة حبت تقهرني وتخرب العلاقة بيننا مو أكثر...خصوصا بعدما الأولاد شافوا
عن قرب علاقتنا مع بعض.
أنا حرمة وأفهم كيد الحريم..محد اجبرها تتنازل عن عرشها..ولما صار لغيرها حلي في عينها.
واللي يقولوا مافيها شي هذا أبو أولادها تحمد له بالسلامة..
إن كان من باب حفظ العشرة كان أرسلت له سلام مع الأولاد وانتهينا..لأنها صارت أجنبية عنه.
ثانيا من وقت اتطلقوا وزوجي رسم معها خطوط العلاقة..
أي شي يخص الأبناء هم يتصلوا يتفاهموا مع أبوهم بأنفسهم..حتى في أحلك وأصعب الظروف والمشاكل اللي
تمر بيهم هم يتصلوا بأبوهم ويرسلوا رسايل.. هم رجال مو أطفال..
حتى لو في شغلة والأمر يتطلب حضورها في دائرة حكومية هو يبلغ الأولاد وهم يبلغوا أمهم وتروح.
عمره زوجي ما كلمها مباشرة لا على رقمها ولا على رقم أولادها ولا أرسل لها..
فكيف تتجرا تتخذ خطوة كهذه وطليقها راسم حدود التواصل..
اليوم تحمد له بالسلامة وبكرة تشتكي له من الولد وبعده تشاوره وبعده تطلب مساعدته
وبعده وبعده وبعده
إلين قلبه يحن وأنا أجلس زي الهبلة متفرجة..أغني ياليل ياعين .
ليش أنا مو شايفة كثير من المطلقات ميتات يتشققن يدوروا الحيل عشان يرجعوا.
قسم المطلقات بكل المنتديات بلا استثناء تعج بقصصهن ورغبتهم بالرجوع..
غير الأمثلة الحية الواقعية اللي قدام عيوني.
ليش أنتظر أسكت اتفرج الين يطيح الفاس بالراس..وأعدي اتصالها على خير وسلام..
ما أقول الي سويته صح.. بس سكوتي غلط.
واللي يقول لي فكري يمكن رجعتها أفضل..أقول
أنا ما ضحيت تضحيات مالها أول من آخر عشان أتكافأ بحرمة يجيبها ويحطها فوق راسي..
كان ممكن من البداية آخذ واحد متزوج ساعتها أكون عارفة أنا داخلة على ايش وأتحمل الغثاء اللي يجيني..
أنا ماعندي استعداد أتحمل غثاء حرمة ثانية بعد ما اتزوجت مطلق فاضي...
والطلاق أرحم لنفسيتي في هذه الحالة..
إما هي وإما انا.. والخيار له... ماني رامية نفسي ولا فارضتها عليه..
بعد ما ذقت الحرمان (المادي) بكل صوره و أشكاله آخرتها يرجعها ههههههههههههه حلوة.
واللي يقولون نفقتهم على أبوهم
نعم نفقتهم عليه لما كانوا صغار محتاجينه..وقت الحاجة الفعلية انتهت.الحين هم بالغين راشدين أصحاء أشداء
بكامل وعيهم وعقلهم يشتغلوا المفترض هم اللي يصرفوا على أنفسهم و يعطوا أمهم..وأبوهم رد للجميل.
دحين محتاجين أبوهم عشان يكونوا أنفسهم ويترفهواعلى حسابي..(بحرماني من حقوقي الشرعية كزوجة)
وأمهم بصراحة مو زوجي مسؤول عنها لا شرعا ولا عرفا ... وليها يتكفل بها..
وكلها كم سنة واالأولاد حيكونوا في عداد المتزوجين
لا أنا ولا زوجي مو مسؤولين نأمن لها حياتها..
إن كان من باب حفظ العشرة يبغى يحسن إليها..ما أخالفه بس يكون بعدما يقوم بواجباته نحوي..
زوجي زي اللي يصلي النوافل وهو الفرض ما أداه..
أنا ممكن أجلس زوجي مجلس رجال وجبرا راح يصرف علي
لكن انا مو حابة أحطه بهذه الموقف ..
حدي معه أصبر عليه المدة اللي وعدني بها .. بعدها لو ما صرف علي وأعطاني
يكون لكل حادث حديث..
واللي يقول مالك دخل في علاقتهم بأبوهم..
أنا ماتدخلت في هذه العلاقة من قريب ولا بعيد..لكن بقولكم ليش تدخلت وإنتوا نوروني
لما زوجي سوى العملية ...وقت خروجه من المستشفى المفترض واحد فيهم يجي يوصل أبوه للبيت الكل
اتملص وماحضر ..أنا صراحة انصدمت جدا من موقفهم..
هذا أبوهم ليش القسوة ليش؟؟
يعني لو أبوهم مقصر يكون سبب للقسوة
لكن بقسوا عليه وهو مدلللللللللللللللعهم آخر دلع....
زوجي يحبهم وقلبه يتشقق عليهم وشايلهم وحامل همومهم كأي أب..وقت حاجته يتخلوا عنه..!!!
زوجي بتلك الحالة والآلام ساق السيارة 80 كلم ورجعنا البيت (( رفض نركب أجرة أو نرجع مع سواقي))
يكابر ويعاند إنه متعافي مافيه شي..ومو بحاجة لأحد..
ثاني يوم رجوعنا انتكست حالته وصار وضعه سئ جدا ..
يعني لو زوجي محتاج مستشفى أولاده أولى يشيلوه..انا ماعندي أحد غير سواقي.
صراحة ماقدرت أتحمل الوضع نفسيا.ليش يهملوا أبوهم وهو محتاجهم وربي حسيته مكسور وحزين..رغم إنه
ماباح لي بشئ.
أرسلت لهم كلهم رسالة واحدة مضمونها:
(((( اتوقعت زيارتكم بس ماحد فيكم جاء ولا اتصل يطمن على أبوه ..
أبوكم يحبكم ويموت فيكم لا تحرموه من طلتكم الحلوة عليه وأنتم مأجورين من الله..))))
الكبير اتصل بعد رسالتي بعدة ساعات ..أبوه فهمه وضعه منتكس..برضه مافكر يجي يشوفه..
الثاني اتصل ثاني يوم وطلبني وكلمني وهذه المرة الأولى يطلب يكلمني.. حب يفهمني إنهم مو مقصرين وحبوا
يتركوا ابوهم عشان يرتاح ووو........الخ
قلت له صحيح مو مقصرين وفيكم الخيروالبركة بس الإنسان لما يكون مريض يحب يشوف أحبابه حوله وأنتم
في الاول والأخير اجركم من الله.
والباقين حتى اتصال ما اتصلوا..
وماجوا كلهم إلا عاشر يوم العملية..
حبيت أوضح هذا الشي عشان تكون الصورة واضحة..وهل هذا يعتبر تدخل فيم لا يعنيني؟؟
أرجوا أن يكون ماكتبت شمل تساؤلات الكل..
لو سمحتوا اللي يبغى يرد بكلمة طيبة ودعوة ونصيحة يكتب . إذا غلطانة في أي شي انصحوني نوروني...
واعفوني من قراءة الردود الجارحة المميتة القاتلة..اللي في مكفيني ومو ناقصة هم..
شاكرة وممتنة تفاعلكم..الله يجزيكم بجنات النعيم.
لكم مني أطيب الأمنيات وأصدق الدعوات ودمتم بخير