يا أخي وش فيك تو الناس وسع صدرك إذا شجعت مافيها شئ بالنسبه إنك خايف إن تعلقا في المباريات رأح يأثر على حياتها ما أعتقد أبد ولا أتوقع ليش لأني أنا شخصيا كنت قبل الزواج ماتفوتني ولامبارة في الدوري السعودي ولماتزوجت زوجي بصراحه كان مايحب الكوره ولايدانيها بعيشة الله وكان يكره اليوم إللي تقام فيه مباراة بس زوجي كان مايعترض على تشجيعي وكان يحترم رغبتي في التشجيع ومايمنعني من متابعة فريقي وحتى الجرايد كان يجيبها لي ولو طلعنا نتمشى برى وهو يدري إن فيه مبارة في هاذا اليوم كان يخلينا نرجع بدري علشان هو عارف إني أحب أتابعها ومع الوقت والعيال صرت أتابع مباريات الأنديه الثانيه على خفيف يعني مو مثل قبل بس طبعا فريقي المفضل وأخباره أتابعها بقوه لحد الآن وكمان صار عندي مشجعين لفريقي المفضل عيالي كلهم يشجعون نفس الفريق إللي أنا أشجعه وحتى زوجي صار يتفاعل معانا ويشجع نفس فريقنا وهو بنفسه يشرف على ترتيب الجلسه في البيت قبل بدء المباراة زوجي أحسن شئ تعجبه مباريات المنتخب يتابعها
وكلنا نتابع المنتخب بس أنا أحب أشوف فريقي كم جمع نقاط وكم سجل أهداف وكم عليه وفي أي مركز هو ومن أقرب منافس له بالدوري كمان أخبار التعاقدات وكم لعب وكم تبقى له وأذكر مره كانت فيه مبارة مهمه لفريقي وكانت مع أشد منافسيه مباراة ديربي وخرب راس السيفر من فوق السطوح وراح زوجي وجاب له مهند س بمئه وخمسين ريال رغم إن خرابه مايحتاج كل هاذا المبلغ بس هو عارف إني أحب أتابع هاذي المباراة قام ضبطه بهاذا المبلغ ولأنه أحترم رغبتي وخلاني على راحتي الحين لويقول لي خلاص ماتشجعين ولاتشوفي المباريات عادي عندي يستاهل لأنه بالأول إحترم رغبتي مستعده أنفذ له كل إللي يطلبه بس الحمدالله زوجي إنسان متفهم وماعمره غصبني على شئ ما أريده أو حرمني من هواية أولعبه أنا أحبها وللعلم أنا عمري حاليا 36
وزوجي في أوآخر الأربعينات وحالنا مازال كما هو لأنه يا أخي
الفريق إللي هيه تشجعه مايلعب إلا 90 دقيقه مع وقت بدل ضائع إن طال 5 دقائق وإن قصر 3 دقائق كل هاذي من 24 ساعه وطبعا الفريق هاذا مايلعب مباراة أخرى إلا بعد حدود خمسة أيام أو ستة أيام والحين صارت المباريات بالأسبوع مره يعني 95 دقيقه بالأسبو ع مو خصاره في زوجتك تخليها تاخذ راحتها فيها
وتمارس هوايتها أنت يمكن إنك متضايق من سالفة دخولها للمنتديات الرياضيه بصراحه إذا كان مضايقتك هاذي النقطه فمعاك حق المنتديات الرياضيه ماتصلح وأنا ما أدخلها نهائيا أتابع أخبارالدوري عبر القنوات الرياضيه أو الشريط الإخباري
إللي أسفل القنوات أو أتابعها عن طريق جريدة الرياضيه تلاقي فيها كل المعلومات بالنسبه للمنتديات ماهي حلوه
ولاتصلح بتاتا أنت حاول تجلس معاها وتفهمها على أخطار مثل هالمنتديات بس بعد الزواج بيكون أفضل لكم الحين أنت لو واجهتها بهاذي الطريقه رايحه تحس بأن الزواج حبس في قفص وحرمان من حريتها وبتجلس تفكر في حياتها معاك وحياتها في بيت أبوها وتقارن عيشتها إللي عندك باللي عند أهلها عند أهلها كانت تمارس هواياتها بكل حريه وبدون قيود وفجأه تحس نفسها عند رجل يكون هو الآمر والناهي لها في كل شئ أ كيد البنت بيجيها إحباط
من تصرفاتك وردات فعلك تجاه ماتفعله هي من تصرفات أنت إذا شاركتها في هوايتها رايحه تحس بإهتمامك فيها وحبك وقربك لها يا أخي مافيها شئ هاذي رياضه والرياضه حلوه وهاذي رياضة الجيل الجديد فشارك زوجتك هواياتها ولاتنسى إن رسولنا الكريم كان يتسابق هو وزوجته عائشة رضي الله عنها وزمان كان فيه بر وخلاء الواحد ياخذ راحته في كل رياضاته من مشي وركض ولعب وغيره لاكن حنا الحين ماعندنا إلا التنطط كل مافريقنا سجل هدف نطينا نطه حتى النطه تبغونا نحرم أنفسنا منها هاذي رياضتنا أنت الحين لاتشغل بالك فيها ومثل ماقلت لك ساعه ونصف بالأسبوع لو أخذتها من وقتها طوال الأسبوع في متابعة فريقها ماراح يصير شئ ولاراح تتأثر حياتكم بشئ من هالوقت القصير حنا عندنا عيال وبيت وزوج ومسؤليه بس أحس إن وقت المباراه عادي مثله مثل متابعة أي برامج بالتلفزيون فلا تضايق نفسك
في التفكير بهاذي الأشياء لأنها فعلا راح تنعكس ردة فعلها على حياتك الزوجيه مع زوجتك
فعيش حياتك وربنا يتمم لك على خير ويوفقك في حياتك ويرزقك الذرية الصالحة اللهم آمين .

__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق




اشهد ان لا إله إلا الله وأن محمد رسول الله