صح ظروفي اول نفس ظروفك استمريت ببيت اهلي 3 سنوات ادرس ومعي طفل .. وماكنت ابدا اطلب منه
فلس و مكافأتي الجامعية كفتني و زيادة الحمدلله و ساعدت منها اهلي كمان.. سبحان الله كل ما عطيت كل ما ربي بارك لي فيها...

صح كمان زوجي متحمل مسؤلية اهله و يرسل لهم مصروف شهري يكفيهم و زيادة.. و زواج اخوه و تكاليف تصليح البيت
كانت كلها على زوجي ربي يرزقه ..و برضو يساعد اخته المتزوجة من وقت للثاني .. و بامانة كانت تجيني اوقات ازعل مو لانه يصرف عليهم بالعكس دام معاه الله يرزقه كمان و كمان.... بس زعلي لانه مايرسل لي من حاله .. لازم اطلب ..هو طبعا واحذ الامر عادي
اذا احتجت و قلت بيرسل لي .. و اذا سكت انا و ماطلبت فاهو سااكت ... بس انا كنت استحي اطلب و اصلا مو متعوودة اصلا اطلب من اي حد
فاكانت عقدة لي ..
بس صدقا حبيبتي ماعملت مشكلة و لا شي وسكت وقلت بكرة بنتقل و استقر عنده و اشوف

و الحين لنا تقريبا سنة مستقرين مع بعض و الحق يقال مو مقصر معااي بشي اذا طلبت مية عطاني 500 .. و انا كمان بطلت حساسية و صرت اطلب مصروف واذا شي ناقصني ما استحي منه زي اول ..

و طبعا لازال يصرف على اهله و الحين يدوروا عروسة لاخوه الثاني و اكيد تكاليف العرس من و الى على زوجي
و اخوه الثالث نفس حالة اخت زوجك ماجاب مجموع و داخل خاص على حساب زوجي طبعا.. و ناوي باذن الله يحج بوالديه السنة دي او اللي بعدها .... يعني صرف صرف صرف

وان ماعاد ازعل و لا اشيل بقلبي لاني وصلت لقناعة . .طالما و انه مو مقصر بحقي و حق بيته ... فاليش اشتكي

وحتى هذه كانت نصيحة امي من يوم اتزوجت .. ابدا لا تدخلي بينه و بين اهله .. و ابدددا لا تدوري وين يصرف
اذا كان كافيك و مو مقصر عليك ...


تلخيييصا لكل الهدرة اللي فوق ...

**بطلي تستحي و اطلبي منه مصروف شهري يرسل لك ياه وقولي له صراحة
مكافأة الجامعة ماعاد تكفي ...

**كملي دراستك كلها سنتين و تخلللصي .. حاسة بشعورك و عارفة البعد و نكده .. بس صدقيني كله يهووون
غمضي عين و فتحي الثانية تلاقي الشهادة معاك .. صح زوجك مهم وله الاولوية بحياتك .. بس برضو دراستك مهمة
و ماباقي الا شوي .. و بكرة تنفعي نفسك و كمان تنفعيه و تسااعديه اذا لاقدر الله احتاج مساعدة
ولو تشوفي كمية النقد اللي لاقيتها ليش انا ادرس بعيد عن زوجي .. سمعت تعليقات لين شاب شعري
رغم انه ماحد له دخل دام انا و زوجي راضيين .. و الحمدلله خلصت و اخذت شهادتي و زوجي فرحااان و مفتخر فيني
ولو تشوفيه يوم تخرجي .. موداري ايش يعمل من فرحته ... و اهلي فرحانين فيني بشكل ماتتصوريه .. و اللي كان اول يعلق الحين.. يضرب فيني المثل لبنته .. و تبقى الشهادة شي للزمن
وقت ما احتاح زوجي شمرت عن ساعدي و دورت شغل ينفعني و ينفعه ....

**النقطة المهمة .. اهله .. انتي نصحتيه و كلمتيه .. خلاص عقله في راسه يعرف خلاصه .. زوجك رجال و عارف اللي ليه و الي عليه .. المهم خذي مصروفك منه .. و دام انه مو مقصر معاك .. خلاص فلوسه وهو حر فيها حتى يحرقها... مش عارفة كيف علاقتك مع اهله .. بس ممكن اذا كانت علاقة حلوة و بينكم سوالف .. و سالتك امه عن اوضاعككم . قولي لها صراحة و الله ياعمة الاوضاع مش ولابد .. الدنيا ناار ناار.. اللي يعين بس و اسكتي ؟؟ يعني وصلي لها رسالة غير مباشرة بانكم مو فوق الريح و ترموا الفلوس .. فهموا كان بها . ولو مافهموا .. خلاص حبيبتي .. مو معقول تعيشي نفسك بمشاكل و نكد .. انسي و احتسبي الاجر .. ووالله صدقيييني يااعفراء
انه ربي يبارك في المال لما الواحد يعطي منه ... زوجي ماشاء الله كم يعطيهم ..و بالمقابل رزقه يزيد ماشاء الله
وتصدقي اننا و بالرغم من دا الصرف وفرنا ماشاء الله تقريبا نص حق البيت خلال 3 سنوات .. ادعي لنا بالنص الثاني

**انتي غلطتي طبعا بالتفتيش بعده .. ارجعي اعتذري منه و اقلبيها مزح انك غرتي عليه و خفتي لتكون وحدة بتخطفه منك ... و بالنسبة للاتصالات .. دام انه دايما يتصل و استجد جديد معاه . اعذرية يمكن مضغوووط
اتصلي عليه انتي ... مادري انتو باي دولة ..ولا كنت بقولك كيف كنا نتواصل انا وزوجي ببلاش من خلال الرسائل
كوني داايمة التواصل حتى لو قطع هو او انشغل .. استمري من خلال الرسايل و اتفنني و جننيه و لا عاد اوصيك
ماينخاف عليك ....

**بكرة ان شاء الله بتستقري عنده و ربي بيرزقكم اطفال و لحاله بينتبه على موضوع الصرف ...
الحين هو لحاله و ماعنده مسؤليات كثيرة فا طبيعي يدق صدره عند اهله .. لكن بكرة لما تكثر مسؤلياته بتلاقيه يحسبها
كويس ... اشوف هذا الشي على زوجي .. صاار احيانا يسالني ايش رايك ارسل 500 و لا 300 كفاية
اقوله اللي ريحك اعمله .....

اعذريني على الاطالة ياعسل و على اللخبطة .. اكتب و يوسف فووق راسي يدور مكرونة


تالينا ..ياغالية ما يوحشك غالي حبيبتي . احنا تمام التمام بس الثقل عامل عمااايله .. دعواتك
اتفق معااك لازم ما تشيل عنه مسؤليتها ... ولو بالقليل .

__________________
سبحان الله... الحمدلله ... لا اله الا الله .. الله اكبر
سبحانك لا اله الا انت اني كنت من الظالمين
استودعكم الله