كيف حالك يا حلوتنا وحبيبتناأنا أمس مادخلت على المنتدى كنت طالعه وحاولت في اليل أدخل بس الويب يفصل عندي مدري إيش فيه المهم حبيبتي شخبارك عساك طيبه تراني أشتقت لك أنت والبنات والحين
يوم دخلت حصلت ردود شيخة البنات بصراحه روعه وتجنن من وينك ياعسل عنا من زمان ياشيخه الله يوفقك ويرزقك ويارب تنجحي بإختباراتك وتتفوقي فيها والحلوان عليه أنا
أطلبي آمري جلكسي وإلا ماكنتوش وإلا فريروروشيه وإلا أي نوع تحبينه ثاني آمري تدللي أنا جاهزه ولوبغيتي عزيمه هم أنا جاهزه تستاهلين ياشيخه أحط لك حاشي والله قدرك أنت وصابره أكبر وأغلى من كذا
يالغالين وأنت ياصابره ليش مضيقه خلقك علشان رقم جديد لاتضايقين نفسك ولا شئ ياعمري لو أنت ماتبينه جيبيه حنا ناخذه عنك بس لاتزعلين نفسك ههههههه الله يعينك ياصابره أنتي حساسه مره يا أختي هدي أعصابك وريحي بالك مو أي شغله يسويها زوجك تتنرفزي منها وتحسين إنه قاصد يزعلك فيها ليش ماتريحي بالك وتعيشي حياتك مع زوجك وتنسي الماضي بحذافيره أنت حاولي تتحكمي في أعصابك وردات فعلك وأنا نفسي الحين وأنت بعيده عن زوجك إنك تلعبين دور العاشقه الولهانه على حبيبها ومثل ماقالت لك شيخة البنات راسليه وكلميه وحاولي تكون رسائلك كلها حب وغرام ووله وشوق وغزل خليه مثل الزبده يسيح من كلامك وأنتي الحين موكل ما أتصل فيك وقال لك سالفه تردين عليه ناشف وتبينين له إنك زعلانه لا يا قلبي هاذي الطريقه ماتصلح أبد ولا رايحه تفيدك بشئ بالعكس بيصير ماعاد يقول لك شئ وحتى إتصاله بيخف عليك
وزوجك قال لك على الرقم على أساس ماتزعلي مثل سالفة السفرفحب يقول لك عن الرقم علشان ماتحطي في خاطرك منه صابره زوجك يحبك ويبغاك بس مو عارف إشلون يرضيك وأنت بعد تحبينه وتموتين عليه وأنا بسألك ياصابره الحين طول هاذي المده عند أهلك ما تحسين بشوق وحنين لزوجك أكيد إنك مشتاقه له ولشوفته بس تقولي ما أقدر الماضي يحاصرني ما أقدر أحس إني نفسي متحطمه داخليا وبعد خايفه من المستقبل
حبيبتي صابره أنت إنسانه مؤمنه بقضاء الله وقدره ومايصير عليك شئ إلا اللي الله كاتبه لك
لاتخلين الشيطان يحبطك ويحبط نفسيتك بوساوسه عليك
ما أحد يعلم بالغيب إلا ربنا عزوجل أنت حطي أملك بالله كبير وعلقي قلبك ونفسك برجاء ودعاء الله خالقك سبحانه وتعالى وربنا عزوجل ماراح يخيب ظن عبده به أنت الحين لورجعتي لزوجك وش يدريك ياصابره يمكن ربنا يكتب لك السعاده في رجعتك هاذي لزوجك ومايدريك يمكن حياتك تتغير وتكوني أسعد إنسانه في حياتها الزوجيه أنا لاحظت عليك أشياء كثيره منها إنك عصبيه وحساسه جدا وماعندك صبر أو إحتمال للأموروعندك فقد الثقه بالآخرين وتحاسبين نفسك بكثره على تصرفاتك وردات فعلك السريعه .
وفي نفس الوقت مع عصبيتك قلبك طيب وحنون وعندك مشاعر فياضه أنت مثل الشخص إللي ينقال عنه الكلمه إللي بقلبه على إلسانه لاكن مشكلتك عدم ضبط النفس وقت وقوع المشاكل وإحساسك بالظلم الذي يقع علىيك وتصيري تعصبي وتتنرفزي وتصدر منك ردات فعل قويه وكلام تقولينه حتى من غير ماتحسي فيه أنت إنسانه طيبه وقلبك نظيف ياصابره ولازم إنك تحاولي بقدر المستطاع بالتحلي بالصبر
والرويه وهدوء الأعصاب وضبط النفس عند وقوع المشاكل وأتركي لنفسك مساحه لتفكير قبل ماتقولي لزوجك أي كلام أوردة فعل في أي مشكله تحصل بينكم وأتركي التسرع بالرد أثناء وقوع المشكله لاتردين عليه إلا بعد ماتفكري بكلامك إللي تقولينه له
بعيدا عن العصبيه والصراخ حتى تقدري تسيطري على نفسك وتنجحين في حياتك الزوجيه وتتعودين على هاذا الأسلوب بالنسبه لزوجك أنت خليه وقت ما يقارن بينك وبين زوجته أو يذكرهابشئ عندك أنت أتركيه ولاتعصبي بالعكس أبتسمي وأضحكي وقولي له الله يعيني وأسعدك مثلها وأرضيك ياأحلا زوج بالدنيا كلها
شوفي أنا الحين مشغوله شوي جايتني جارتي مسيره أرجع لك باليل إن شاء الله تعالى وأسأل الله في هاذا اليوم المبارك أن يجعلك خير زوجه لزوجها وأسعد زوجه في حياتها وأسأله عزوجل أن يألف بين قلوبكم أنتى وزوجك ويصلحكم حق بعض ويارب إن بعد رجعتك هاذي تحملي وربي يرزقك طفل أو طفله تملأ عليك حياتك وتنسيك هموم الدنيا وما فيها وتنسين في وجودها ماضي الآلام والأحزان الله يشرح صدرك ويفرح خاطرك ويعطيك ما تتمنينه بحياتك ويسعدك ربنا سعادة لاتوصف ويحفظ لك زوجك ويجعله لك قرة عين ويجعلك له كما يتمنى وأسأل الله أن يسعدكم ويهنيكم ويزيد محبتكم في بعض وتعلقكم في بعض ويجمعكم على البر والتقوى والصلاح وصفاء ونقاء القلوب في ما بينكم اللهم آمين .
__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق
اشهد ان لا إله إلا الله وأن محمد رسول الله