موضوعك رائع وجا بوقته الصراحه
انا الان لي تقريبا اسبوع ماخذه جنب من زوجي واحاول ابعد عنه بكل الاشكال حتى عيد الاضحى طلبته يحجز لي واسافر عند اهلي ابي ابعد واغير جو
الموضوع عباره عن تراكمات وغضب في داخلي ماعطيته حقه او عبرت عنه في وقته جروح اطبطب عليها وامشي الحياه
هو تعدل ما انكر في اشياء كثير ويقول ان صبري وحلمي هم السبب والدافع لتغيير بعض الاشياء
لكن مازالت فيه خصله اكرهها وهي ثورانه على اتفه الاسباب ويعطي نفسه الحق في انه يفضفض ويرفع صوته بينما انا لا تكبر السالفه لو قابلته بالمثل فكنت اطنش عشان ماتصير مشكله وهو يرجع من نفسه عادي
لكن كنت اطنش من هنا وتكبر في خاطري من هنا
الى الاسبوع الماضي يوم الثلاثاء بالضبط خربت شغله في البيت قلت تحتاج تصليح طبعا كالعاده ليه خربتوها وانتو غير مهتمين وماني مصلحها و و و و
ثرت عليه وقتها وبعدها التزمت الصمت الى اليوم
وطبعا كان مطنش بس هزه طلبي اني ابي اعيد عند اهلي
جا يناقشني بهدوء واسلوب راقي غير كل مره ومع ذلك التزمت الصمت وبعدها بكل هدوء افرغت مافي جعبتي وصدمته بالمواقف اللي كان يصارخ فيها من غير سبب وقلت انها تجرحني حتى لو مابينت لك
اليوم نفس الشي يحاول يراضيني بالكلام ومازال مصر اني غلطانه ومالي حق اشيل بخاطري
وبرضه لازلت رافضه وقلت له بكل هدوء انا تعبانه وابي ارتاح واجلس مع نفسي شوي وفعلا مالي خاطر باي شي
اكيد انه متضايق مره لانه يشوف انه نزل نفسه وحاول ياخذ بخاطري وانا صاده
واكيد بيقول في نفسه انا عطيتها وجه بس من جد مو قااااااااااااادره فعلا ابي اخذ مساحه كافيه حتى اصفي قلبي