صدقت يا أخي أبوحكيم يوجد رجال من هاذا النوع وأبوي الله يرحمه تزوج أمي وهيه أرمله وكانت مخلفه بنت أمي أول ماتقدم لهاالوالد إشترطت عليه رعاية بنتها
وتربيتها فوافق علاشروطها وبنتها يوم الوالد تزوجها كان عمرها سنه فيوم عرفوا أعمام البنت بزواج أمهاإعترضوا وطالبوا بالبنت فقام الوالد وأرسل عليهم جاهه وإجتمع معاهم وقال لهم أنا برعاها وأعتبرهابنتي والبنت هاذي أمانه في ذمتي وبأنفق عليها وأتحمل مصاريفها ويوم الله يكتب لهابولد الحلال والنصيب أرسل عليكم تجون تملكون بها لزوجها بعد محاولات معاهم وافقوا وقام شيخ القبيله وأعيانها كتبوا شروط بينهم والوالد تزوج أمي وخلفتنا وجابت لبوي إثنى عشر طفل سته ذكور وست إناث عددنا وكان الوالد متزوج قبل أمي وعنده أربعه عيال من زوجته الأوله وأقسم بالله الذي لا إله إلا هوإن أبوي كان يهتم بأختي إللي من أمي أكثر منا وكانت طلباتها مجابه ولوجاب لنا شئ يقول وين بنتي الكبيره خلوها تجي ومايوزع فينا الأشياء إللي جايبهالنا إلا قد إختارت هيه قبلنا سوا ملابس حلويات بسكوت هدايا وكان يحبها ويفضلها علينا
دايماوعندما كبرنا صار لها مكانه أكثر وأكبر في قلب الوالد والله إني ما أذكر إنه قد زعلها أوتكلم عليها وتقدم لها شخص كان متزوج وحاول في أبوي يبغاه يوافق قاله أبوي البنت طبعا رافضه إنها ترتبط بشخص متزوج وأنا حرام ماودي أظلمها في حياتها قال حاولوا فيها قال له أبوي هاذي أمانه برقبتي مارايح أغصبها أو أجبرها علاشئ ماتبيه وتقدم لها شخص ثاني كان عزابي فوافقت البنت وزوجها أبوي طبعا بعد ما أرسل لعمامها حسب الشروط وملكوا بها وأعرست والحين متزوجه لها حول عشرين سنه ومخلفه خمسه أولاد وثلاث بنات وعايشه ومبسوطه بالنسبه لأمي الله يرحمها كان دايما تجيب طاري زوجها الأول قدام أبوي وتعددمحاسنه ولاعمري شفت ردة فعل أو غيره من أبوي تجاه زوجها السابق بالعكس يتبادل معاها السوالف عنه وكأنه أخيه ولاعمره جاب طاريه إلابلخيرحتى دايما يقول لأمي أعمام بنتك ماشفت منهم خلوق وطيب إلا المرحوم أبو فلانه قصده زوج أمي السابق ويكون بعلمك أخوي أبو حكيم إن أبوي الله يرحمه ماقد دخل مدرسه ولايعرف يقرأء ولايكتب ماعنده غير السور القصار من القرآن الكريم حافظها
يقراها وقت صلاته لاكن أنا بالنسبه لي أشوفه عنده أعلا الشهادات الجامعيه لأنه كان شخص يتعامل في المواقف بحكمه وتفكير كبير قبل إتخاذه أي قراروعندالمواقف المحزنه كان قلبه طيب وشفوق وكثير أوقات أشوف الدمعه بعينه بالذات يوم تتزوج الوحده منا وتغادرلبيت زوجها دايما يذكرنا بالخيرويسأل عنا وعن عيالنا
الله يرحمهم ويغفر لهم هو والوالده ويجمعنا بهم في جنات الخلود بارك الله فيك أخوي أبوحكيم علاطرح هاذا القصه ودايمافي مشاركاتك وردودك أشوف الحكمه من بين أسطرها الله ينور دربك ويشرح صدرك ويزيدك علما تنتفع به وتنفع به إخوانك المسلمين.












ب
‏ ‏


ب

__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق




اشهد ان لا إله إلا الله وأن محمد رسول الله