عشان يتعلم المرجله ومن خلال تجربه شفتها..


انك تعاملينه مثل الرجل.

اقصد بالحوار والسواليف
لا تاخذونه على قد عقله..لا

مثلا ادخلي الصاله معك الشاي والقهوه
ونادي ابنك معكم..قولي له تعال اجلس جنب ابوك يا رجال..
وسولفوا معه...حسسوه بأنه رجال..اذا مثلا طاحت عليه الكاسه لا تصرخين عليه.
قولي له الله يهديك ياابوفلان وش سويت..(اللي هو ابنك)ترى اسلوب التلقيب يسوونه خوالي بأطفالهم وماشاء الله الآن عيالهم رجـــــــــال ميه ميه

واذا ماانكسرت..خليه هو بنفسه يقوم يرجعها مكانها

--


ثانيا :

غرفته هو اللي ينظفها..يرتب سريره
بس بإسلوب..مو تجينه بالأوامر لا

مثلا قام من النوم قولي له يلا حبيبي خلي رتب سريرك يا بطل ( حطي بالجدار عالي..7 اكياس وكل كيسه فيها :

ريالات - لعبه - حلويات - نجمه كبيره

واذا رتب وكل شي...اعطيه ( هالجدول لمدة اسبوع )


اذا رحتي بيت ناس...لا تخلينه يجلس عندك...خليه يروح يجلس عند ابوه بالمجلس لبسيه ثوب وشماغ وعقاب وسبحه واقرئي عليه المعوذات وحصنيه كل يوم



خلي له كلمه...بدون مايكون متسلط
مثلا اذا كان مع طفل ثاني...وتهاوشوا على لعبه
لا تهاوشين ولدك...وتقولين له عطه اللعبه...او خذ اللعبه

قولي لهم من حقته: اذا حقت ولدك..قولي له ياولدي تسمح لفلان يلعب بلعبتك شوي عشانك كريم زي بابا
او تبي تصير بخيل زي الشيطان..انت اختار يلا
اذا قال مارضى يرد وفهمتي انه يبيها
قولي له خذها لكن انت مو كريم...واعطيه لعبته اما الطفل الثاني راضيه بكم كلمه



اهم شي عشان يصير رجال اجتماعي وبذرة خير

ابتعدوا كل البعد عن : العنف - الضرب - الصراخ - كثرة العقاب - احراجه قدام الناس

الله يرزقكم خيره وبره ويسعدكم فيه