قلت له ، ليه أول يوم سألتك قلت لي ما عرف ؟ و ما عمري دقيت عليها ؟
و دحين يوم سمعتني أقول لها فين أخوك طيب ؟ افتكرت ؟؟؟؟

قالي من الصدمة نسيت و تلخبطت و دحين افتكرت ..
قلت له ، و أخوها إيش اسمه طيب ؟ إيش يدرس ؟ إيش مادري إيه ؟؟؟

يقول زوجي ، و الله ما أدري ، بس كنت مسجل اسمه بإسم المدينة اللي هم فيها
و كان هو يتابع معاي أوراق أخته ، و قبل لا يسافر قلت له إنه قبولها ما راح يمشي فصار يطلب الفلوس ترجع لهم
و كنت صرفت الفلوس ، و صار يرسل لي أرجع الفلوس و ما قلت لك عشان لا تزعلي عشان حكاية الديون

و من شهرين ما دقيت عليه لإنه أرسل لي ، يا فلان ترى الجوال مع أختي بيكون ، فمسحت الرقم من جوالي
و كانت تجيني رسايل من الرقم كل شوي يا فلان رجع لي فلوسي و ما أرد عالرقم

( زوجي طبعا ، يتهرب كان من اللي يستدين منهم بالتططنيييييش بالكذب و كذا ، يعني مرة يقولهم معليه كنت مسافر
و ما شفت ، المهم يصرفهم )

فيقولي ، أمس بس اللي عرفت إنه هي اللي كانت ترسل من شهرين على جوالي تبغى فلوسها
و كنت ما أرد عليها أحسبه أصلا أخوها و ماكانت معاي فلوسهم عشان ظروف النقل من بيتنا و السفر ..
فيقولي ، أمس اللي عرفت إنه هي اللي ترسل من شهرين و ما كنت أرد عليها فهي انقهرت و أرسلت رسالة بالمنتدى

سألته كيف عرفت أمس ؟ يقول كانت صيغة الرسالة قبل ( بشكل عام ) مثل رجع لي فلوسي ..
بس أمس كان بصيغة أنثى ( يعني مثلا ، أنا محتاجة لفلوسي ) .. و يقول ما قلت لك عشان لا تصير بدل المشكلة
مشكلتين ، و نحن متفقين ما أجيب قبول لبنات عشان الحكاية هذه اللي حذرتيني منها من قبل ..
و يقول خفت كمان أقول لك إنه أخوها اللي كنت أعرفه ، و تقومي تقولي لي مرة ثانية أخوها ؟؟؟؟ و ما تصدقيني

قام يبكي و يجيب القران و يقسم و يحلف و يوعد و يدعي على نفسه باالهلاك و الويل و الثبور ووووو إلخ

::::::

رجعت هي تكلمني و تقول أسألي زوجك إيش العلاقة اللي بيننا و أنا ما راح أتكلم
و هو طلب فلوس لنفسه و قال محتاجها ووو إلخ

قلت لزوجي إذا إنت صادق ،، تدق عليها من جوالك و تسبها و تشتمها ..

قالي ، لا ما يصير ..
( قلت لكم ، زوجي مو متعود على المواجهة حتى لو كان معاه الجق ، و يراعي مشاعر الناس على حساب نفسه )

قلت له ، تهزأها لو إنك صادق و هي بتخرب بيتي ..

دق عليها من جواله و أنا ساكتة ما كأني جنبه ، و هي ردت بس قالت ( نعم ) ..
و كان ردها ( رسمي .. مافيه ميوعة يدل على مثلا إنه هناك شئ بينهم )

قال لها ، إنت بأي حق تتصلي على حرمتي و تكذبي عليها و تقولي هناك علاقة ،، زوجتي أحبها و ما تسوى و لا مليون
وحدة مثلك .. و الله ياخذ حقي منك .. قامت هي قفلت السماعة ..

:::::::

جلسنا سوا أنا و هو .. قالي اللي تطلبيه تحت أمرك و أنا من يدك هذه ليدك هذه ..
قلت له أول شئ معليه .. خلي جوالك معاي بس يومين رجاءً .. عشان أرتاح و خليني أنا اتفاهم معها بطريقتي ..

قالي خذي الجوال و لا راح أقرب منه ..

( فيه شئ براسي كنت بأعمله عشان أتأكد )

:::::

تاني يوم بالقووووووووووووووة إلا ،، قام حجزلي رحلة لمدينة هنا مع بنتنا و يومين رحنا هناك و دلعني اخر دلع ..
مع إني ما عمري أطلب منه أي شئ و كنت رافضة و هو أصر علي ..
( عاد أنا الشئ هذا خلاني أستغرب أكثر ؟ لو كان معاه حق ما كان بكي ؟ ما كان لأول مرة ياخدنا وو يمشينا زي كذا ؟
الواحد ما يعمل كذا إلا لو كان متندم على شئ ..؟؟؟ )
و نفس الوقت يقولي ، أنا بأريح أعصابك لإنك تعبتي مني كثيييييير و أوعدك كيف .. إلخ

::::

بعد ما رجعنا من التمشية ، كانت يومين ،، جاني اتصال من البنت كمان على جوالي ..
طبعا زوجي تارك جواله معاي .. و جاء في بالي ممكن لو هناك شئ لا سمح الله ، إنه بيدق عليها من أي رقم
و يقول لها إنه ترى جوالي مع زوجتي ..

اتصلت علي هي و قالت كلام كثيييييييييييييييييييييييييييييييييييييييير يمكن ساعتين جلست تتكلم ..
دحين بأكتبه ، لإنه هو اللي خرب حياتي و خلاني أجي هنا يوم حسيت إني خلاص مو قادرة أسيطر على نفسي