قبل كل شئ ، لا أحد يتريق علي .. أنا وحدة ما أعرف أطبخ ..
حتى يوم قريت موضوع هنا في المتزوجين ، متى أول مرة طبختي بعد زواجك..
استحيت أرد و أقول بعد سنتين .. و تستلموني ..

أمي الله يخليها لنا ، يوم كنت صغنونة و أرجع من المدرسة و الأبلة تعطينا درس في التدبير
أدخل المطبخ و أنا متحمسة أبغى أطبخ و أمي ما تخليني أدخل .. و أقوم أدخل من وراها و تطلعني برة
و ما تحب أحد يدخل معها المطبخ و تخاصمنا .. و إذا أصريت و رضيت و طلعت النتيجة خبيصة ،تقوم تذلني عليها و تتريق علي قدام الأقارب و تقارني بطبخها .. و أمي ماشاء الله عليها من عمرها 7
سنوات و هي في المطبخ تطبخ .. فمافيش وجه للمقارنة ، بس كنت طفلة و كنت أنجرح من أي
تريقة .. و قررت ما أطبخ خلاص ..

و هي تعترف لزوجي و تقول ما أحب أحد يدخل المطبخ معاي و حتى الشغالة أمي تطردها
من المطبخ وقت الطبيخ .. لها مزاج خاص في الطبخ و ماشاء الله كل مين ذاق طبخ أمي مدح فيه
حتى زميلاتي يتريقوا علي و على أخواتي، يقولوا خسارة أمكم كذا طبخها و ماتعلمتوا منها شئ ..

أول سنتين زواج ماعندي مطبخ و كانت عند زوجي ظروف و لخبطة في بداية زواجنا ..
فكنت أروح بيت أهلي و أكل من طبخ أمي ، لإني أعشق طبخها و زوجي يعشق طبخها كمان ..
أو غالبا المطاعم أو أكل من برة زوجي يجيبه ..

سافرنا للخارج و الحمد لله قلت يالله أشد حيلي و أطبخ فرصة، و الحمد لله تعلمت أشياء خفيفة من
نفسي صح مو هذاك الشئ .. بس أحسن من زمان و بديت أعرف أساسيات الطبخ و أنواع البهارات و
كذا .. و ما يتقارن مع طبخ أمي .. جات الشغالة و انشغلت أنا مع الدراسة و هي اللي تطبخ صارت و
أكلها مررررررررة ما يتاكل بس أحسن من أكل برة عالأقل ، لإنه هنا عندهم فيش أند شيبس وو غالي
أكلهم و مو طعم أبدا ..

الصراحة ، قلبي يتقطع على زوجي بس كنت من جددددد مضغوطة مع الدراسة ..
و تفرغت حاليا بنسبة أفضل من قبل .. فمشتاقة أطبخ و حاسة إني رجعت ما أعرف أعمل شئ ؟؟؟؟
أحس إني جاهلة في الطبخ ، و متضايقة من نفسي مرررررررة .. بس الحلو إذا تعلمت شئ بأضبطه
الحمد لله و بشهادة زوجي و حتى مرة زميلتي جات عندي مع بنتها و زوجها و أكلوا مكرونة اسباجيتي
عملتها و من يومها و هم يطلبوها مني و يقولوا ماعمرنا دقنا مثلها <- يعني فيا أمل

.. فما أعرف إيش أعمل في حالي ؟ لمتى راح نستمر كذا ناكل من برة و من أكل مطاعم
و إذا الشغالة راحت .. إيش راح أعمل ؟؟؟؟؟؟؟؟

بس أنا ما أحب أكل طبيخي ، ما أشتهيه ماعرف ليش ؟؟؟؟
و الشئ الثاني ماعندي ثقة في طبخي ، يمكن لإني أقارن دايما بطبخ أمي ؟
و أمي صار لها 60 سنة تطبخ ماشاء الله ، حتى إذا أخواتي طبخوا ، ما تاكل شئ مو من صنع يدها ..
أمي كذا لاحد يسألني ليه ؟

و بما إنه زوجي يعشق الرز و يحزنني إذا شاف صورة رز في النت ،، لعابه يسيل هههه ..
فما أعرف ليش الرز يطلع معاي و مع الشغالة برضو ، يطلع لاصق في بعضه ؟؟؟؟
مو زي الرز تبع أمي و أخواتي و لا زي الرز اللي في المطاعم ؟؟؟
مع العلم إنه البوتجاز تبعي بالكهرباء مو غاز .. يعني العين تاخد وقت لحد ما تحمى و العكس ..
هل نوعيةة الرز اللي نستخدمها لها دور ؟؟؟؟؟ يجي لاصق في بعضه
و أنا بأشتري رز بسمتي .. بس هناك أنواع بس مو مثل اللي في السعودية طبعا

أحد يساعدني .. و يوجهني ؟؟؟؟؟

* كيف أضبط الرز ؟؟؟؟ زي المطاعم ؟؟؟؟؟ و إيش السبب في إنه يطلع لاصق ؟؟؟؟
* كيف أبدأ أتعلم أطبخ و أعمل أشكال منوعة في الطبخ ؟؟؟؟

حتى يوم أروح السوبر ماركت ما أعرف أشتري غير بصل و طماطم وو رز و لحم هذه الأساسيات
لإن الرز أكل زوجي المفضل بكل أنواعه المهم من غير خضار ..

و أقوم من راسي أجيب أي خضار قدامي ، زي جزر أو باذنجان و بطاطس و كذا ..
من جدددددد مرات أطالع في الخضار و أقول ياربي ايش اعمل فيهم ؟؟؟؟
كيف أبدأ و أصير طباخة زي باقي الحريم ؟؟؟؟