الحياة الزوجية أكبر من مجرد إتقان الزوجة للطبخ أو معرفة الزوج لقيادة السيارة
أن اعارفة انك تقصد أهمية إن البنت تتسنع وتتعلم تطبخ قبل لا تروح بيت زوجها
وهذا شيء طيب يكون في ايجابيات العروس ولا خلاف على ذلك
ومو حلو إن الشخص لين يتزوج يكون كل أكله من بره
لكن انه يصير شغله الشاغل مشكلة
وبعدين هو يجرب ويشترط الشيء هذا قبل زواجة عادي جدا ومن حقه
والناس قناعات
قبل زواجي خطبوني ناس ومن بين الكلام أم العريس تسأل أمي وأنا جالسه بنتك تعرف تطبخ
السؤال هذا كان بالنسبة لي سلبي مع إني كنت أطبخ وما عندي مشكلة
ومن حقهم يسألونه ومن حقهم يتشرطون وبالعكس أشكرهم على صراحتهم
لكن عندي الأخلاق ما تتعوض أما الطبخ الوحده ممكن تتعلم وتمشي أمورها
مع إن التفنن فيه والوصول إلى أعلى درجات الاتقان موهبة فوق كونها مهارة
وطبعا الناس يختلفون في تقدير الأمور
والحمد لله كنت ومازالت أطبخ لزوجي وأحب أطبخ له لأنه يقدر النعمة قبل كل شيء
ولا يزعل ويهاوش ويسب الساعة اللي أخذني فيها لو ماطلع الأكل زين
لأن في بعض الرجال توصل عندهم لهذه المواصيل
ولين يكون الاهتمام الأكبر منصب على الأكل وكيفيته وكيف طلع
وحتى لو الوحده تعرف تطبخ يعقدها في حياتها ويقارن أكلها بغيرها بتكره الطبخ وسنينه
وبالمناسبة في رجال ما يحبون طبخ البيت
أذكر قريت مشكلة وحده انه زوجها يعشق أكل المطاعم ولا يحب أكل البيت
يقول أكل المطهم أريح وأوفر وألذ
حتى ما يعطيها مجال تجرب وتتفن يقولها لا تتعبين نفسك وإذا سوت يقول كان قلتي جبنا من مطعم
فهي ودها تطبخ وهو لا
على كل أقول للبنت تعلمي تطبخين بتفيدين نفسك قبل غيرك