السلام عليكم ورحمة الله وبركاته
زوجي من النوع اللي لمن تحصل مشكله او يزعل من شي يخرج من البيت
واذا رجع رجع قالب وجهه ويجلس كم يوم على دا الحال
رحت راضيته واعتذرت له
رجع بالقوة
طيب
وتستمر الحياة وتستمر المشاكل
بس في كل مشكله واحنا على دا الحال الين متى ..........ما ادري
صارت بيننا مشكله قبل اسبوعين تافهه وما تستاهل وعصب عليا وكعادته في الشارع وتحت البيت وكسر قزاز باب العمارة كمان....
وانا نزلت قبل كدا موضوع عن اسلوبه معايا لمن يعصب
طنشته وصرت قالبه نومي عشان ما اشوفه ولا اكلمه وكل شي يجيه لحده ان من اكل ولبس
ولمن صفيت الامور بيننا شويه اقوله ليش زعلت داك اليوم
يقولي انتي عارفه
قلت له ايش اللي انتي عارفه
وطبعا حاولت فيه انه يهرج مو راضي وعلى نفس كلمته
حاولت لانه لمن تصير بيننا مشاكل
لا يهرج ولا يتكلم
مو حال دا يا ناس
ابغى اعرف كيف يفكر ابغى اعرف المشكله من وجهة نظره
بس احسه ما يبغى يهرج عشانه هو غلطان
يا جماعة الخير ساعتها حسيت بقهر وقلت ايش رايك انا آدميه شايفه نفسها ما تغلط ابدا
وانا ماني غلطانه ابدا
الصراحه مرررة انقهرت منه
مشيت الايام
طيب
صارت مشكله ثانيه الليله
ممكن اكون غلطانه فيها لاني اتصرفت من راسي
وعرف هو وزعل وشال نفسه و خرج القهوة يشيش
بس انا خلاااااااااااااااااص طقت في راسي
لانه بدال ما يخرج المفروض يجلس معايا عشان يفهم ليه اتصرفت كدا
وخلاص قررت اني اطنشه واقول له اني ماني غلطانه واكابر كله عشان يجلس يتفاهم معايا
واذا ما جلس يتفاهم حتظل مشاكلنا معلقه الى اجل غير مسمى
مدري صح انا ولا غلطانه
كيف اقدر احل مشاكلي لوحدي
معليش كلامي ملخبط من القهر بس انا ما استغني عن نصايحكم