السلام عليكم ورحمة الله وبركاته
توهمت عندما كتبت قصتي بأن كل من يقرأها من بلدي ، ولذا فهو يعرف العادات والتقاليد السائدة فيه لمثل هذه الأمور ، ولكن تبين خطأي عندما وجدت من ردود بعض الأخوة أن أكرر الزيارة وأدخل معها أو مع أهلها في نقاش حتى أتعرف عليها أكثر
لذلك فكرت بأن أبين لكم الوضع السائد في مثل هذه الحالات حتى تكونوا في الصورة (وغيرت من أسلوب حديثي ولهجتي عنوة)
في بلدي ما في شي عندما إسمو اختلاط .. يعني الرجال مع الرجال والحريم مع الحريم .. من يوم ونحن صغار .. في كل شيء .. المدرسة المناسبات الزيارات العائلية العمل ... إلخ
وهذا يعني إن الرجل ما يعرف في الدنيا دي غير الرجال وشوية الحريم اللي حواليه زي أمه وأخواته .. وكمان البنت نفس الشيء
وإذا الولد يبغا يتزوج .. أمه وأخواته وقريباته يدوروا على البنت بالمواصفات اللي يبغاها الولد .. وإذا حصلوها .. يسألوا عن البنت .. وهنا أكبر مشكله من نظري .. لأنه ما في طريقة تسأل فيها عن البنت غير من الناس اللي دلوك عليها .. وبعض الأحيان من زميلاتها في الجامعة إذا كانت لسه تدرس وهذا قليل .. عشان كده الولد ما يعرف كثير عن البنت اللي راح يخطبها .. غير بعض الكلام العام .. وهنا تكون المغامرة
بعدين إذا البنت ناسبت الجماعة .. تدق الأم على أم العروسة .. وإذا وافقوا أهل العروسة تروح أمي عشان تشوف البنت .. وإذا عجبتها .. تقلهم إن نحن راغبين نخطب بنتكم .. وبعدين هم يسألوا عن الولد .. لكن بتوسع .. في العمل و في الحي والمسجد والزملاء والأصدقاء .. مو كده وبس لا ممكن كمان يسوي معاك (مقابلة شخصية) مرة مع أبوها ومرة مع أخوها ومرة مع جدها و و و ... يعني بالعربي يسألوا عنك ويفحصوا فيك زي الناس ومرة كثييييييييير .. ولمن خلاص يرتاحوا ويحددوا بعض الشروط المستقلبة لما بعد الزواج .. والبنت تكون مواااااافقه عليك بشكل كبير .. تجئ إنت يالعريس حضرتك عشان تشوف البنت
وهنا ركزوا معايا كثيييييير .. تدخل البنت على الولد في حضور محارمها .. وكلها تقدملك كاسة العصير .. وإذا كترت جلست شوية بعيييييد عنك ..
في هذه اللحظة لأن البنت ما هي متعودة على مواقف زي هادي .. تلقاها مرة خجولة .. وإذا كلمتها إمكن ما ترد عليك أو تتكلم بصوت مره ضعيف .. لا وبعضهم من قوة الحياء تتلخبط وممكن تنخبّط في مشيتها أو حتى تكب العصير عليك .. وإنت كمان يالولد تكون خجول ومش متعود .. لكن لأنت رجل حتكون أقوى منها ومتماسك نفسك أكثر
طبعا درجات الخجل تختلف من بنت لبنت ومن ولد لولد .. لكن يظل في الأخير في خجل ولو شويه
بس خلاص .. وكلها على بعضها ما تجئ دقيقة ولاّ دقيقتين بالكثير .. وتلقى البنت خارجة زي الهوا .. وخلصت الشوفة يعني النظرة الشرعية .. وجا الدور عليك يالولد .. تبغاها ولاّ ما تبغاها
أتمنى إني وضحت الصورة
والسلام