المشاركة الأصلية كتبت بواسطة ام محمد 07

حبيبتي انا في شغلة تانية كنت بدي احكيلك اياها امبارح بس نسيت، انا بأكدلك انك ما تخربي بيتك ولا تفكري تتركي زوجك، لانك ببساطة بتسمحيلها تنتصر عليكي، وواضح من طرقها الرخيصة انها بدها تصيد زوج باي طريقة، حتى لو عحساب بيت تخربو، بس بالمقابل بدي اطلب منك انك تكوني واعية ومصحصحة، وما تخلي ثقتك العمياء والكلام المعسول يعطلو باقي حواسك، لانو انا رجعت قرات المشكلة الاصلية كمان مرة ولقيت انو يمكن زوجك ما بصدها وهالشي من خلال كلامها لإلو: حبيبي وحياتي وهالكلام.... يعني لو صدها من اول رسالة منها ، ما تكررت كلماتها هاي في الرسائل اللي بعد هيك، دليل على انو متقبل هالكلمات منها وما صدها من اول رسالة، ومن هون مندخل على لب المشكلة الاصلي وهو انو زي ما فهمت منك انو انتي خجولة، وهي مطلقة اذا انا مو فاهمة غلط، هالشي بيعني انو زوجك حابب النوع الجريء من النساء ، يعني عكسك، و اول ما صادف امراة ادعت حبها لألو وعرضت هالحب بالجرأة اللي هو بحبها، انبهر بهالشي واثار اعجابو لانو يمكن مفتقدو، وبدي احكيلك الرجال بختلفو، في بحبو الزوجة اللي بتستحي وبتخجل، وفي بموتو بالجرأة، بس انتي كنتي ماخدة الامور ببساطة.. هلأ طالما انا تقريبا شخصنا شو المشكلة لازم تلجأي للحل وهو كالتالي برايي:
* وضحيلو انو كلامو ما مشي عليكي من خلال النقط اللي وضحتلك اياها في هالمشاركة واللي قبلها باتزان وثبات وثقة ومنتهى الهدوء، وابدا ما في مجال للانهيار والبكاء لانو زي ما حكيتلك اذا شافك منهارة ما رح تأدري تفهمي منو الحقيقة.
* على فرض انو ما اعترف او طلع فعلا ما في شي بينهم( وبتمنى هالشي من قلبي وممكن جدا يكون بريء) بتكوني استفدتي من الخطوة السابقة انو عرف انك بتعرفي تحللي المواقف وما بينضحك عليكي وبتسامحي بمزاج مش عن طريق انو يضحك عليكي بكلمتين، وبالتالي رح يحسب حساب لعقلك المتيقظ.
* غيري اسلوبك، تحلي بالجرأة الانثوية اللي بحبها وكونيلو زي ما بدو، وما تخليه يدور عهالشي بره، وما تسمحيلها تسرقو منك.
* مع احترامي لبعض الردود، انا برايي ابدا ما تفكري للحظة انك تحكي معها او تتصلي عليها، لانو هالشي معناه انك بتعطيها حجم اكبر من حجمها، وهي ببساطة اقل كلمة بتنحكي عنها انها خرابة بيوت عمرانة وخطافة رجال، ترفعي عنها، وخليكي اكبر منها بمستواكي، لانو انتي الاصل وهي الدخيلة.

يارب الله يسعدك ويوفقك ويطمن بالك.
بحيات الله طمنيني عليكي واحكيلي شو بسير معك..