اسمحلي ماقدرت اكمل ردود الاعضاء واقتبست ردك هذا بالتحديد عشان ارد عليه...

اغلبكم يحسبني اتكلم عن الزواج بشكل عام ، نعم الزواج هو اكمال لنصف الدين وهو استقرار وبه يبنى المجتمع لكن انا اتكلم عن الزواج في الزمن هذا ، صار كل شي شكليات يعني تلقى الحرمه ليل نهار بس تفكر تروح السوق الفلاني و تلبس الساعه الفلانيه و وش بيقولون علينا الناس و الرجال همه وش يشتري سياره و سهر باليل في الاستراحات
ياعزيزي الحرمه اللي تفكر ليل نهار وش تلبس وش تحط واي ساعه واي شنطه هذي انسانه غيورة هدفها في الحياة المظاهر وفيه رجال بنفس الشاكله هذي وفيهم مرض الغيرة اعوذ بالله وهذا شئ مومرتبط نهائي بحالتهم الاجتماعيه يعني سواء متزوجين اوعازبين خلاص هذا طبعهم
خلوني اسوي لكم مقارنه بين حياة العزوبي و حياة المتزوج
1- العزوبي ماوراه احد ينام متى مايبي و يقوم متى مايبي (بدون تضييع صلوات) اما المتزج بما انه مسؤول عن زوجته يعني لازم يضبط جدوله و وقته مع وقتها فلو صارت تبي تروح عرس لازم يسهر تحى يوديها ويجيبها و اذا صارت قايمه لازم ماينام حتى مايتركها وتطفش (وتشوفون كثير مشاكل بالمنتدى زوجه تقول زوجي يرجع من الشغل وينام ويتركني)
انا وحده من الناس اشوف ان الزوجه اللي تسوي مشاكل عشان زوجها نام لماجا من الدوام هذي زوجه تافهه ومااقدر اعمم عليها حتى عشرة في الميه من الزوجات لان زي مالزوج عنده مسؤوليات الزوجه بعد عندها مسؤليات وتنتهز فرصة نوم زوجها او خروجه عشان تخلص مسؤولياتها... واما فكرة ارتباطك بزوجتك في الزواجات وفي العزايم فانا اشوف ان حتى العزوبي يرتبط بامه وباخواته ولاتقولي ان مرة اخوك ومرة انت خلاص ممكن مرة ترجع مع اهلها ومرة مع اختها وهكذا والعرس يااخي موكل يوم واذا انت مرة ماودك ترتبط لاباهلك ولابزوجتك خلاص اغسل ايدك وحطلها سواق ... ولاخليها تسوق وافتك

2-العزوبي يطلع و يدخل وغير مرتبط باحد يعني لو اني معزوم اروح ولا افكر في احد و ارجع في الوقت اللي يريحني لكن المتزوج بما انه مربوط بزوجته فلازم مايكثر طلعات و اذا طلع لازم مايتاخر لان هذا حق من حقوق زوجته.
(ترى ماعندي طلعات كثيره و ترى ما احد معبرني بالعزايم بس انا اتكلم بشكل عام)
انا معك انه حق من حقوق الزوجه ان زوجها يبقى معها لكن مواربع وعشرين ساعه في اليوم يعني من حقها تروح لاهلها وانت من حقك تطلع ومن حقها تروح لصديقتها وانت بعد روح واستانس واذا هي بيتوتيه فخلاص عندها اشغال في اليت لازم تخلصها وانت رجل من حقك تروح وتجي بالمعقول لكن الحياة الزوجيه موارتباط ولصقه في البيت زي ماانت تتوقع

3-العزوبي مرتاح من شي اسمه مشاااكل ، صحيح مافيه حياه بدون مشاكل لكن حنا العزوبيه اكبر مشكله ممكن نواجهها هي وش الغدا اليوم ولا كفر السياره مبنشر ولازم اصلحه اما المتزوج هو وزوجته حرب تعايره و يعايرها و همز ولمز
يااخي وش هالنظرة السوداويه ... ترى حتى المتزوجين همهم وش الغدا اليوم ليش التشاؤم اللي انت عايش فيه بالله عليك بايش راح يعايروا بعض وليش يهمزون ويتهامزون ليش ماتتخيل ان قلوبهم على بعض ورحومين في بعض ولو ماكان كلامي واقعي كان شفت االعالم كلها تطلقت لان المثل يقول اشرب مر واكل مر ولااقابل مر

4-العزوبي يسوي اللي يبي في بيته ولا لازم يحسب اي حساب لحركاته يعني مثلا انا لو رجعت من الدوام متنرفز ارجع البيت و اسوي اللي يريحني و في اسوأ حاله ادق راسي بالجدار اما المتزوج يرجع من مسؤوليه الدوام و يدخل في مسؤوليه حقوق الزوجه انه لازم مايعصب عليها و لازم يقعد معاها و تعرفون ان الواحد يبي يرتاح ببيته لكن في نفس الوقت مايحق له يبرم بوزه على زوجته المسكينه لان عنده مشاكل بالشغل! لا وحتى وقت الجلسه على الكمبيوتر صارت هالايام محسوبه على الزوج
بالعكس ليه ماتقول بتجي البيت بتلقى وحده تواسيك وصدر حنون يضمك وينسيك همومك ...ليه ماتقول في انسانه بتشاركك همك وبتشيل عنك حزنك ...

5- المتزوج حركاته محسوبه عليه يعني لو حب يعطي امه هديه لازم يعطي ام زوجته هديه بنفس القيمه ولا تقوم الدنيا و ماتقعد
بعطيك معلومه احتفظ فيها لبعد زواجك ... ترى محد في هالدنيا كلها يقدر يحاسبك على علاقتك في امك تجيب وتحط على كيفك محد له شغل وام زوجتك مهما كانت عزيزة وغاليه فعلاقتك معها شي وعلاقتك مع امك شئ ثاني... اذا تبي نصيحتي لاتسمح لاي انسان في العالم انه يقارن بينه وبين امك لان الام محد يساويها ...

6-وآخر شي هو المصاريف العزوبي تكفيه ريالات معدوده و يعيش احسن عيشه اما اذا تزوج لو يستلم عشره ماتكفي وكل هذا بسبب الشكليات و فلانه سوت وانا ليش ما اسوي.
ارجع واقولك ان الشكليات والمظاهر صفه في مالها شغل بالزواج يعني من البدايه اخطب لك وحده على قد مقدرتك الماديه

البعض ممكن يقرأ كلامي ويحسبني طايش و لا كسول ، للعلم انا اغسل ملابسي و اكويها و انظف و اطبخ (طبخي يجيب المرض ) واجلي الصحون يعني لو عندي زوجه بارتاح من كل هذا.

هذا بعض من ما يدور في خاطري و العذر و السموحه على الإطاله.


[/quote]