المشاركة الأصلية كتبت بواسطة maimai

العزيزة (almond flower) ...مش سهل انك تلاقي صديقات بالنوعية التي تحتاجيها .. وربما جزء من صعوبة تكوين الصداقات انك وحسب احساسي انسانة متحفظة نوعا ما وبتحترمي مشاعرك وافكارك وصعب تعرضيهم بسهولة لأي حد وهاد وضع طبيعي .

بس صدقيني وهاد عن تجربة الدنيا فيها ناس كويسين كتير ومتل ما بقولو ان خليت بليت ...

بدي استأذنك ما تزعلي ولا تتحسسي من حكي لأني بقوله لنفسي قبل ما اقوله الك ... يعني انا مش كاينة افهم هو ليش بيعمل هيك ؟؟؟ .. يعني ضعيف لدرجة انه ما يرتبط فيكي ويواجه كل الصعوبات ... وبنفس الوقت مش هاين عليه يبعد ويخليكي تتابعي حياتك وتنتبهي لنفسك !

يعني متصل فيكي حتى يتطمن ؟؟ لا والله فيه الخير ويطمنك انه مبسوط في حياته الزوجية ؟؟!! يا سلام !! .. انا ما بلومك لأنه نفس ردة الفعل بتحصل معي في وقتها بكون فرحانة متل الطفل الصغير علما اني تعديت الاربعين !!

بس لما افكر شوي بشوف لأي درجة هو اناني ... يعني قادر يكون مبسوط ومرتاح في بيته ؟؟ وصدقيني جزء كبير من استقراره الاسري مرتكز على علاقتك معاه لأنه منك عنده اشباع عاطفي وفكري وحاسس نفسه انه مرغوب ..

شوفي كلام بقوله لنفسي قبل ما اقوله لك حلو الواحدة تكون طيبة بس مش لدرجة التضحية مع انسان اقل ما يقال عنه مش مقدر انسانة راقية بشاعرها واخلاقها متلك ..

بطلب منك رجاءً تستمري في الكتابة وما تنقطعي وقولي اي شي بيصير معك حتى نقدر ننسى سوا .. حبي نفسك ولو جزء على مية من حبك اله .. ولا تقولي ما في صديقات !! ، انا شخصيا مستعدة اناقش معك كل المواضيع في العالم ما في عندي اي حدود للنقاش الفكري ولا اي ممنوعات .. وحتى لو مجرد فشة خلق .. حبيبتي لا تخليه هو الملجأ الوحيد لافكارك وانفعالاتك هيك بيزيد تعلقك فيه

وان شاء الله عيدكم مبارك جميعا

وان شاء الله ربنا يفرجها عليكي وعلى المسلمين اجمعين