حبيبتى
مع احترامى لرأى الاخوه جميعا الا انى لاحظت انهم كلهم ينصحونك بالاتصال المباشر بالفتاه ......وانا لى اعتراض على ذلك وارجو انك تتفهمى كلامى
اولا زوجك عاجباه القصه ومش هينهيها ابدا لانه لو كان عاوز ماكان خلاها ويقول مش فاضى بصراحه عذر اقبح من ذنب
تانى حاجه انتى سلبيه يعنى جوزك حس منك انك قابله لضعف فيكى مثلا انك مش بتحبى الفضايح او مالكيش حته تروحيها او انك خايفه تبقى مطلقه مثلا بعد الشر يعنى عارف اخرك ....وحافظك وبيلاعبك على الاساس ده ما تزعليش منى انتى مش فارقه معاه لحد دلوقتى
بالنسبه بقى لنصايح الاخوه حضرتك لو حصل بينك وبين البنت دى اى تواصل هتفتحى على روحك نار جهنم بجد .......ليه بقى هقولك.
دلوقتى على الاقل انتى معمول لك حساب عندها انك ما تعرفيش فهى الى حد ما حريصه شويه فى تعاملاتها مع جوزك
وجوزك مهما ان جاهر على الاقل ماوصلش لمرحله البجاحه انه يقولك ناولينى الموبايل دى فلانه او اطلعى من الغرفه عاوز اكلمها مثلا
حضرتك لو اتصرفتى تصرفات النسوان العاديه واتعرضتى لها بأى شكل هتقربى بينها وبين جوزك اكتر بكتير ويمكن تتطلقى ويتجوزها وتبقى جنابك قدمتيه لها بإيدك
هتعملى مشاكل هتجرى عليه تقولله مراتك عملت وسوت وهتعيش فى دور البريئه والمظلومه وجوزك هيعمل فارس مغوار وفى الاخر هيصب كله على نافوخك
هو مش هيبقى عاوز يبان قدامها ضعيف ....وبدل ماهو كلام فى الفاضى بينهم حضرتك هتخلى الكلام شكوته لها من معاملتك السيئه وشكوتها ليه من تعرضك لها ........ويعيشوا بقى القصه مع بعض وتطلعى انتى الشرير بتاع الفيلم اللى لازم نتخلص منه
لو كلمتى اهلها ممكن عشان بنتهم والفضايح يجوزوها له
وممكن كمان لو خليتى راجل من عندك يكلمها يهددها ويكلم جوزك كمان مين قال لك ان الراجل ده ما يبتزكيش بعد كده
ولو عملتى روحك بتكلمى حد زى ماهو بيعمل ده منطق مجنون انتى ست محترمه ما تشبهيش روحك وتحطى نفسك فى وضع مش تمام
لو كلمتيها ممكن بجد تسمعك كلام يوجعك اوى اوى ........مش هتتحمليه صونى كرامتك ونفسك وبلاش الحلول دى صدقينىممكن القصه تتحل بشكل تانى وعندك 3 حلول اختارى منهم
اما انك تقفى مع جوزك وقفه حازمه وتفهميه انه انتى ما تقبليش الوضع ده وعليه انه يحله بأى شكل وانتى دى مش قصتك يحلها ازاى لو رفض قولى له اوكى انا عند اهلى لحد ما تلاقى لك صرفه ولو ابوكى عايش قولى له الوضع وما تخليهوش يتدخل الا لما انتى يفيض بيكى الكيل
او انك تقولى له مش هى صاحبتك عادى اخوه عرفنى عليها ....ونبقى اصحاب احنا التلاته عادى يعنى .
او بصراحه كده قولى له عاوزها يا سيدى اتجوزها اكرم لك وسرحنى بأحسان او على حسب بقى ان كنتى انتى تقبلى او لا ده رأيك أنتى
فكره بقى تسيبى شغلك دى فكره عقيمه بصراحه والله تلاته لو عملتى له القرد فى البيت وهو كلامه للست دى فى دمه ما هيأثر فيه لو حتى عملتى أيه ، فبلاش تخسرى شغلك عشان حاجه مش مضمونه
وبرضه بلاش تقولى له ايه مش عاجبك فى ، لانه بصراحه هيحط ده فى كفة نقط ضعفك وكل ما يحب يضغط عليكى هيقولك ما انتى مقصره وده مش مبرر بصراحهمعلش طولت عليكى بس ده اللى ربنا قدرنى عليه
سلام
وربنا يهدى لك الحال