بعد ما اطلع اللي في خاطري من الزعل و الضيق

مرات كنت اسبه .. اقسى كلمه كانت ( ثور ) عشان لا تشطحون بعيد في خيالاتكم

كان يضحك مني ويقول عاااااااااااااااااااادي ثورين بعد بس انتي ترضين


كنت استحي منه مره مره مره مره


وتكررت المكالمات صارت تقريبا كل يوم وماتقل عن ساعتين ابدا

وكانت تجي الفواتير شي محتتتتتتتتتتتتتتترررررررررررررررم

مره من المراريت قال لي شفتي فاتورتك كم؟ قلت ايه قال انا دبل

قلت يووووه الله يعينك ع المصاريف

بس والله تستاهل محد قال لك انا جنبك ولاعن خامس جد عندي .. والحين يوم ابتعدت صرت وش حلاتي ... وهو يضحك ويقول والله لو تبغين اي شي ما اقصر وياشيخه خلي الفواتير تجي كذا الله يجزاها خير الاتصالات موصلتني فيك انا بالعكس بروح ادخل اسهم عندهم انا احب هالشركه الله يسعدهم ومن هالكلام

( النقطه الخامسه ...حسسني انه مستعد لأي صعوبات ومنها الماديه مقابل اني ارجع )

صارت حدة المكالمات تخف ... وصرت اتقبل كلمة عمري وحبي وقلبي ... حتى لما قالها اول مره وانا ماعصبت قال الله ام وليد ماعاد تزعل منها

قلت اولا لا تنق على النعمه .. ثانيا صرت فعلا احسها صدق مو بس املأ الفراغ ...ثالثا حتى انا اشتق لها .. وانت قلبي بعد


من بعد هذا السطر الجميل الظريف جدا ... اخذت المكالمات منحى اخر من الكلام وانتو ادرى باللي اقصده

( النقطه السادسه ...لابد للطرف المسكين المظلوم من لحظات يسمح فيها للطرف الاخر الغلطان انه يعبر هو بعد عن مشاعره اللي من زمان كاتمها ... اقلها هذي الالفاظ ... لانها زي البلسم ... بس لا تسمحين الا بعد قطع 90 % من مشوار حل المشاكل بعد ماتعطينه على راسه عشان لا عاد يتعاودها ابدااااااااااااااااااا وهو بعد يحس بقيمتها .. يعني لا تنتظرين تنحل المشاكل ميه ميه وبعدين تبدين تحلين لسانك...اتمنى فهمتوا )


صار يقول لي من بعد تقريبا مكالمات شهر ( كل ليله يتصل ونحل مشاكل )
صار يقول تعالي نطلع نتمشى
ما باخذك البيت .. بس تعالي نتمشى .. مشتاق للطلعات معك
وانا اقول لا الله يخليك ابوي بيزعل


نسيت اقول
امي وابوي كانوا يموتون الف مره لما يشوفون اني اكلمه وبالساعات حتى ابوي صار يقول ها خير .. وش عنده بالساعات
وانتي ليش تعطيه وجه ... لاتخربين شغلنا

وانا اقول افا عليك يابوي .. انا اخرب عليك ؟؟؟ بس جالس يتناقش في المشاكل وانا طنشته كثير في الاخير حدني اتكلم معاه

مابلع السالفه بس مشاها لي ... ابوي قصده لا عاد يكلمك ولا يسمعك ولا يحلم فيك
وفي نفس الوقت كنت لما اقول لأبوي طلقني منه كان يصيح فيني ... عيب عليك .. صحيح هو مجنون بس ماعندنا بنات يطلبون في الطلاق ..ياقليلة الادب !!!!!!!!!!!!!!!!!

طلعت قليلة ادب اني اطلب في حق من حقوقي

يعني لا ابوي اللي سعى يحل مشكلتي ولا زوجي اللي طلقني فعلا من اول .. وكل واحد منهم يتعاند مع الثاني وانا في النص


المهم


جا يوم من الايام ودق علي الصبح سبعه
كان يوم خميس
اجازه عنده

قال تعالي نفطر

وانا بدون ادنى تفكير ولا تمحيص ولا شي .. قلت يالله

والله ياناس مافكرت ابدا ... اللهم طالعت في اختي قلت غطوا علي وقولوا اني نمت متأخره ... لأن امي وابوي دايم يشيلون هم نومتي وقومتي واكلي وشربي ..يبوني مرتاحه ... الله لا يحرمني منهم

المهم قالت اختي الله ياخذك لا تفضحينا ... ابوي بينجلط لو درى... قلت خلك اخت صدقيه وغطي علي ولا بينجلط ان شاء الله


وفعلا طلعت على اساس اننا بنطلع ساعتين ويمكن ارجع حتى قبل لا يصحون امي وابوي
يعني كنت مطمنه

يوم طلعت ما وقفنا ضحك ابدا
وناسه وبسط

فعلا انغسلت القلوب من اللي كان فيها
لسا باقي في القلب غصه بس خفت عن اول

رحنا فطرنا
قال ترجعين. ؟ قلت لا لسا اهلي ماصحيوا ( صرت انا اللي اتلصق )

وهو انبسط
قعدنا نفرفر في المجمعات كل ماقال ارجعك ... ابوك لا يزعل ونخرب على انفسنا .. انا اقول لا ماني راجعه .. ابي اجلس معك ..وعموما اصلا مرات ما اصحى الا العصر

الساعه 2 الا اختي تدق وتلعني وتقول ابوي وامي حمقانين علي وعليك الله ياخذك انتي واياه دخلتوني في مشاكلكم

حزت علي اختي
قلت يعني خلاص صاروا عارفين ؟

قالت ايه تعالي

قلت ليش ارجع خلاص عرفوا

الله يستر عليكم اجل ... وهي تصيح بنت يامصفوقه ارجعي...

زوجي صارت عيونه مو مصدق اني اسوي كذا

قال ياقوى قلبك
والله ابوك يخرع اذا عصب
قلت والله حياتنا هي اللي تخرع يوم خربت
صح؟




دقت علي امي ... وهي مسكينه مررررررررره مصدومه ... ام وليد ليش تسوين كذا؟ قلت والله يا امي مافكرت وطلعت اوتوماتيك.. وبعدين ابوي مره مقفل لاهو اللي تفاهم معاه ولا مخليني احل مشكلتي ... خلاص انا اعرف وش قاعده اسوي سلمي لي على ابوي وانا راجعه الليله ماني بايته برا ...انصدمت من ردي وقفلت منها .. زوجي منصدم من ردودي مررررررررره قال والله انك قويه
قلت معليش بيعصب شوي ويرضى
كل شوي يابنت قومي ارجعك لا تذبحين ابوك
قلت ياخي خلاص ابوي في ذمتي ماعليك

وفعلا والله قفلت الجوال ولا عاد فتحته الا 11 ليل

زوجي مسكين هو كان حتجيه الجلطه من خوفه من ابوي
وانا ولا كأن فيه شي


خلاص كلمت امي ومطمنه انها وصلت الرساله

الساعه 11
دقيت على امي
قلت وين ابوي
وهي تقاطعني كيف حالك يابنت لا يذبحك لا يسوي بك شي
وانا اضحك اقول يا امي الله يصلحك وين ابوي

يوم كلمته بغيت اموووووووت قلت ابوي قلبي والله مافكرت وقصدي ارجع قبل لا تصحون وقلت لأختي اللي طلعت مو كفو انها تغطي علي .. صدق انها مو كفو ...
قام ابوي يضحك ( دخلته في الجو زي ما ابو وليد دخلني في الجو )

قال يابنتي انتي زعلتيني .. بس انتي مبسوطه؟
قلت جدا

قال الله يستر عليك
لا تجين باتوا برا
قلت لا بأجي البيت
قعد يضحك
قال يابنتي ما انتو حولنا نلموا برا وغداكم بكره عندنا .. سمك ( اللي يحبه زوجي )

دعيت له
وقفلت

قلت لزوجي
كان حينجلط مره ثانيه من المفاجأه
قلت قوم نحجز في اي مكان ابوي قال نبات برا ومو زعلان وبكره غدانا عندهم سمك اللي يحبه قلبك

قال يا الله من جدك؟

بهذي السهوله

قلت عشان تعرف البلا لا فيني ولا في اهلي
البلا في راسك انت
انت يوم تعوذت من الشيطان وغديت رجال صدق
ماصار فيه اي مشاكل

استحى مررره وقام يسلم في راسي وكفوفي ويقول والله انتي سويتي موقف انا لن انساه لك مدى العمر

عاكستي اهلك وزعلتيهم وكامتيني وطلعتي معاي
وتدرين ان ابوك مايتحمل
وبرضو جالسه طول اليوم وماعليك من حد

انتي كبرتي في عيني مره وهذا معروف اشيله لك مدى الحياه
وصدقيني ما اكسفك قدام اهلك واصير فعلا الرجل اللي يرفع راسك

( والله لا زدت ولا نقصت في الموقف ياجماعه)


رحنا الغدا ثاني يوم
و اهلي كأنهم بيستقبلون عرسان جدد
العود والبخور والحركات

سلمنا على ابوي قال والله ان فيكم عروق هنود بس يالله دامكم مرتاحين انا ماابغى شي
بس للأسف ماتاخذها منطقتك لازم انا اتأكد برضو انك صرت رجااااال اطمن على بنتي معك

جلسوا وتناقشوا وطولوا بس ماقاموا الا متصافيين مره
( هذي النقطه مدري كم ... التنازلات ... لا ابوي غلط عليه ... ولا هو اللي اخذته العزه بالإثم وقال ما اجلس مع ابوك.. تفاهموا والحمد لله )المهم جلست يمكن شهرين عند اهلي بعد هالموقف .. بس اطلع مع زوجي كل اربعاء خميس وارجع الجمعه عند اهلي

لحد ما اعلن ابي عن موافقته الكريمه ورجعت لبيتي

اي تساؤل انا حاضره

__________________
[/IMG]