مدري ليه تحمست مع مشكلتك لدرجة وانا اقرا جلست اكتب عندي رؤوس اقلام عشان ارد عليك
لاحظت فيه ردود متعاطفة جدا مع زوجتك و ردود قاسية ..
أنا من رأيي انك لا ترخي مرة ولا تشد مرة
ملاحظة قبل كل شي: لازم انتم يارجال تحطون في بالكم ان احنا غير الجيل السابق، ما كنا متعودين على شي وفجأة تنحط أمامنا مسؤوليات عديييدة وصعبة (زوج- طبخ- غسيل اواني- غسيل ملابس- كوي- تنظيف بيت ترتيب مسح تلميع وشغللل لا يطاق )
اللي في وضع زوجتك بصراحة يكسرون الخاطر، اقصد طالبة ومتزوجة
ومع ذلك المفروض انها تزوجت وهي عارفة وش بيقابلها من صعوبات ومسؤوليات
وفي المقابل انت مطلوب منك تتعاون وتتساهل معها ..
ببدأ معك وحدة وحدة ،
بالنسبة للنوم هذي النقطة ما معها حق فيها ابدا !
ماشاء الله لو محلها استغليت ان زوجي يتأخر وقدرت انام وأطبخ وأخلص أشغالي
ببساطة وضح لها انك تبغاها تكون صاحية اول ما تجي من دوامك
لو فرضنا انها وصلت البيت 2 ونامت لحد 4 بيكون قدامها ساعتين تتجهز وتطبخ فيهم قبل ما تجي
بس ضروري تشد على انها تصحى ، لو في البداية تجيبها بطريقة حلوة.. مثلا تقول لها انا اجي البيت و نفسي اشوفك لأني اكون طفشان من الشغل وانتي اكيد بتغيرين نفسيتي ..
و سالفة الخوف ابدا لا تعطيها وجه فيها عشان ما تستفحل، لأن هذي امور نفسية تزيد اذا ما وئدت في مهدها 
كل الناس في بيوت لحالهم و مو طول الوقت معهم رجالهم .
وأحيانا احنا يالحريم نبالغ في سالفة الخوف او حتى نختلقها لأسباب نحتفظ فيها لأنفسنا
نجي لموضوع الكوي،
أنا معها بصراحة هالشي ما يطااااق والان صار فيه ادوات تساعد عليه
اهمممم شي جب لها نشاف (يجي لوحده مو مع الغسالة) والله انه من اكثر الأجهزة فعالية في البيت و ملابسي البيت كلها و ترنقات زوجي وملابسه الداخلية وملابس ولدي ما صرت اكويها، تطلع منه مفرودة ما تحتاج غير طوي
أما الثياب البيضاء يكويها زوجي برا مع الشمغ
يعني صرت ما اكوي الا ناااادرا وهالشي اراحني كثير لأن الأعباء كثيرة لازم يخف منها شي .
غسيل الثياب برضو احرص هي تغسلهم و مافي مانع تساعدها مرات وأكيد غسالتكم اوتوماتيك ولو كانت غير ذلك فضروري الاوتوماتيك تريّح .
اما عن الطبخ بما انها تجي بدري فعندها وقت كثير يمديها تطبخ
وأنا مع اللي قالوا مو كل يوم لأنه شغلة مملة جدا وتجهد الذهن بالاضافة الى الجسد
يوم تطبخ ويوم تسخن حق أمس (هالشي يريح خصوصا اذا كانت مرقة او رز لو تسخنت ما يتغير طعمها) وانت تساهل معها قلها احيانا اطبخي حق يومين ومرات تجيب من برا ومرات تطبخ حاجة خفيفة مثلا توست محشي او برقر .. بس لا تتعود انها ما تطبخ ابدا أقلها مرتين في الاسبوع دامها تدرس .. و بما انك تجي متأخر فصارت عليها وجبة وحدة غداء عشاء يعني لو انت حاب ما تاكل اول ما ترجع احيانا فتكون ما تطبخ الا المغرب ويكون عشاء ..
جلي الصحون سهل مقارنة بالأشياء الثانية. لو فيه امكانية غسالة الاواني يمدحونها بس ما أحس الموضوع يستاهل اذا هي ما تطبخ كثير والاواني قليلة ، تاحسها تنفع اذا الاواني كثيرة .
تنظيف البيت عموما ممكن كل شهر تجيب يوم خادمة بالساعات للتنظيف العميق ..
وفي النهاية الله يسخركم لبعض
وجميل جدا تقديرك لوضعها الله يكثر من أمثالك
وبالتأكيد الحزم مطلوب في أوقات لأن اذا تعود الشخص على الكسل صعب تغييره
كما أن اللطف مطلوب في أوقات أخرى، والله اني أقدر زوجي كثيرا ويعجبني منه انه لا يدقق في هذه الأمور رغم أني جالسة في البيت، واذا كنت غاضبة منه لأمر ما (عنده عيوب) فإني مباشرة افكر في هذه الميزة وهي انه ما يطالبني بما فوق طاقتي ولا يدقق وراي مثل بعض الرجال، وبصراحة هذه الميزة رغم بساطتها إلا انها رفعت رصيده كثيييرا و خففت عني عيوبه الباقية ..
يرجى كتابة (ما شاء الله) كما بين أقواس و شكرا /الاشراف
التعديل الأخير تم بواسطة ماريا ; 02-11-2009 الساعة 10:45 PM