الله يهديك بس هذا اللي اقدر اقوله ..
بصراحه انفقعت مرارتي من أغلب تصرفاتك ..
اسمحي لي انا اعتبرك أخت لكن واللي خلقني ما ألوم أميرات يوم تقول كلامها .. بصراحه فيه أمور كثيره يبي لها تعديل في شخصيتك وأطباعك ..
أنا اتمنى أنك تثقفين نفسك من ناحية الزواج وتعرفين وش دورك ووش اللي لك ووش اللي عليك تجاه الزوج ..
الشي الثاني زوجك مبين عليه محترم وطيب وما أحملك سبب كل اللي صار لكن لاحظتك حصرتي الموضوع على مشكلة الافلام والعاده , وكأنك ملك منزل أو نبي مرسل , وكأنك مالك ذنب في أي شي ..
لا وتقولين أنا اذا انتهت هالمشكلتين كل أمورنا بتصير تمام .. وأنا الللي فهمته انك تتهربين وتحطين اللوم عليه ..
الرجال ترا يحب المرأه الخاضعه , مو المرأه اللي كأنها رجال , كل رجال ما يتمنى ياخذ له وحده كأنها حفارة قبور وقلبها حجر , والله أني ما ألوم المسكين في أمور كثيره , وبالنسبه لمشكلته من ناحية الافلام والعاده بيتركها لو عرفتي له وكلها علاجها بسيط ..
وبعدين يوم تركك عند اهلك من دون علم مسبق لك فما ألومه لأنه يبي الفكه من دوامة المشاكل اللي يعيشها والهم والقرف , وواضح عليه انه ما يحب يقول فيك وفيك وفيك وحاب يخليك هناك علشان تعرفين قدره إذا غاب عنك ..
لكن أنتي ما شاء الله ما عرفت لك , مره تقولين الشوق ذابحني عليه ومتقطعه , ومره تقولين قاعد اعيش واتخيل حياه جديده وزوج جديد ومستقبل مدري كيف جاي , أختي ترا الاستهبال ما ينفع في هالأمور , والشي الثاني مو كل من هب ودب من قرايبك تعلمينه بالتفاصيل لأن كل حلولهم بتكون أنه هو الغلطان وخصوصاً أراء النسوان ..
معليش قسيت عليك كثير بس أنتي المفروض ابوك يقسى عليك , ويحدك عليه , مو المسأله أنه ما يبيك , لكن المسأله أن ابوك كبير سن والمفروض يكون عارف أن ( العاقله من النساء كالدائخه من الضأن ) ..
وأنا أجزم أنه لو جاء زوجك لبيتكم وأبوه وجلسوا مع أبوك وجابوك وكلٍ قال اللي عنده , أنك تطلعين غلطانه وتفشلين أبوك قدام الرجال ويضيع وجهه , وهذي مشكلة بعض الآباء الله يهديهم وهي أن العاطفه تأخذه لبنته ويفكر أنها كامله ونازله من السماء ..
أنا صار لأختي سالفه بس بسيطه طبعاً مو مثل سالفتك , وكانت تشتكي ومدري ايش وحنا ما كنا نعطيها وجه ولا نلتفت في هالأمور لأننا واثقين من زوجها والشي الثاني عارفين أمور النساء , وفالأخير يوم جبناه البيت طلعت هي الغلطانه وطلعت ميته عليه وتبيه , وطلع كل شيء ضدها وطلع الأخ مدللها آخر دلال ومعطيها اللي تبي , وقلنا لها قدامه لو تجين تشتكين مره ثانيه ما راح تلاقين أحد يوقف معك , ومشت أمورهم تمام ..
لكن اللي استنتجته أنها كانت تشكي لأمي والبنات اللي حولنا من بنات عم إلى بنات خال وكانوا يزيدونا على الطين بله ويولعون النار بزياده .. ( بصراحه أغلب النساء فاشلات في أخذ المشوره ومخربات في هالأمور إلا من رحم ربي ) مع فائق احترامي لك ولأخواتي في المنتدى ..
أنا اتعجب من أغلب البنات , ألا تعلم أنه كما في معنى الحديث أن اي امرأة ماتت وزوجها راض عنها دخلت الجنة !!
يا أختي شوفي أقوال الرسول صلى الله عليه وسلم والله ثم والله أنه الحل الوحيد والمرشد الصحيح ..
قال رسول الله صلى الله عليه وسلم : ألا أخبركم بنسائكم من أهل الجنة؟ الودود الولود العؤود على زوجها التي إذا آذت أو أوذيت جاءت حتى تأخذ بيد زوجها ثم تقول والله لا أذوق غمضا حتى ترضى ...
والله انها امتلأت عيوني بالدموع عندما قرأت هذا الحديث , وتخيلت لو صار بيني وبين زوجتي زعل وطبقت اللي في الحديث , والذي نفسي بيده أني راح أحطها فوق راسي ..
عموماً أنا حتى متعجب من نكك ( أبي رضاه ) , صدقيني إذا تبين رضاه أنك قادره وأمور حياتك خليها سريه لأني مدري ليه أحس أنك تعلمين بكل شي يصير لك وتجيك حلول هي اللي تخرب عليك ..
أخيراً سامحيني واعذريني يا أختي أحس اني زودت عليك لكن والله انفعلت , وانتي الله يوفقك ويهديك ان شاء الله واذا حابه موضوعك يتعذرني أنا ما عندي مانع , بس اللي حاب اقوله ان زوجك مبين عليه طيب وابن حلال ولا تفرطين فيه ..
نسأل الله السلامه