بصى يا حبيتى أنا حطيت نفسى مكانك وفكرت كتير جدا قبل ما أقولك الرد ده . لأنك إحتمال ما تقبليش التصرف ده ( لكن كلمتك لما قلتى أخاف أقول لأ يحصل إنفصال ) وضحت لى إنك فعلا خايفة من الإنفصال ... علشان كده تشجعت و قولت رأيي .
أولا : ليه تخلى قرار طلاقك إنتى هو القرار السهل ؟ ليه ما يكونش قرار طلاقك هو القرار الأصعب ؟
إزاى ؟
واضح جدا إن زوجك عامل حساب كبير لزوجته الأولى ( و إحتمال كبير جدا يكون كلامه صحيح بخصوص إنه أعادها لعصمته علشان وجد إن مسئولية 5 أولاد مسئوليه صعبه عليه جدا ) وخايف فعلا إنه لما يقولها خبر زواجه منك إنها تروح عند بيت أهلها ( وتسيب الأولاد له ) ومايلاقيش حل.
إذن قبل ما تطلبى منه إخبار زوجته الأولى بزواجه منك لازم توضحى له إنك واقفه معاه .
يعنى ؟ وضحى له إن أولاده هما أولادك و إنك مش عندك مانع إنك تساعديه فى تربيتهم و الإشراف عليهم . حتى لو ساكنين فى شقة تانيه وعندهم شغالة - طبعا فيه منهم بنات و أطفال - ومش كلهم ولد عنده 19 سنة .
وضحى له إن بناته و أطفاله هيكونوا زى بنتك و هتكونى زى أمهم . وهتتعاملى معاهم بما يرضى الله مهما كانت الظروف .
ووضحى له إنك خايفة على بيته و أولاده زى ما إنتى خايفه على بيتك وبنتك .
وبعد كده لما يقول لزوجته الأولى - لو عملت مشاكل وراحت عند بيت أهلها - هو وقتها هيكون مطمئن إنه هيلاقى ( الزوجة و الأم البديلة ) .
أما لو أصرت وفضلت فى البيت اللى هتتجوزى فيه ( وفضلت تعمل مشاكل ) خليكى إنتى العاقلة و إنتى اللى تستحملى (عارفه ليه ؟ ) لانه معنى إنه طلقها قبل كده .... إن إحتمال طلاقها مرة تانية وارد ( لما يلاقى الإنسانة العاقلة )
و إنتى لما تزوجتيه ... تزوجتيه على أساس إنك زوجته الوحيدة ( ومش زوجة تانيه ) إذن فمن حقك إنك تدافعى عن زوجك وبيتك بكل السبل ( بس يكون بالعقل )
يعنى من الآخر وافقى على إنك تسكنى معاها فى نفس العمارة ( وحاولى إن يكون لك مدخل منفصل ) زى ما قالت الأخت فى رد قبل كده .
على فكرة أنا كل ردى كان على أساس إن ( مراته كانت راعية مشاكل وحتى هو ما سلم من شرها ).
وربنا يصلح لكم الحال ويهديكم ويهدى أولاده عليكى