السلام عليكم يا اختي الحبيبه
حبيبتي انتي قريبه مني في حاجات كتيره في حياتي انا كنت زعلانه اوي من امي وأختي كمان بس كل واحده فيهم كان ليها سببها تقدري تقولي اني طول عمري متعقده من اختي الكبيره لكن بفضل الله بقينا قريبين قوي من بعض دلوقتي بعد ما كنت بقولها انا بكرهك
اما امي فطول عمري انا اكتر واحده في اخواتي بخدمها برموش عينيا وانا اكتر واحده في اخواتي عمري ما حسيت منها انها حنونه عليا او قريبه مني لدرجة اني كنت بسمع من الناس انها بتشكر فيا وبتدعيلي وكنت بستغرب
لكن برضه هقولك اني بقيت دلوقتي اقرب واحده في اخواتي ليها بقولها كل حاجه
اما مراهقتي وطفولتي كانت من اتعس ما يكون ومريت بتجارب فاشله عقدتني اكتر
لكن فضل ربنا بقى اكبر ودلوقتي انا متزوجه من انسان عرفني بجد قيمتي
حبيبتي انا مش هقولك ان معاناتي اكبر منك ولا ان معاناتك قليله لأ ربنا يكون في عونك بس انتي مستنيه مين ياخد بايدك عارفه المشكله اللي فينا اننا كل ما تحصل مشكله مع اي انسان بنرميها عليه وبنقول ان احنا ملناش حظ
حبيبتي ربنا شايفك وحاسس بيكي بس مش معنى كده اننا نحط ايدينا على خدنا امتى حتستمتعي بشبابك, اولا مامتك مش قادره تفتكري ولا حاجه حلوه ليها حاولي لازم تحاولي
كنت بتفرج مره على التلفزيون وشفت مشكله زي بتاعتك بالظبط الدكتوره النفسيه قالتلها ابدئي انتي وروحي لامك وكوني حنونه معاها وحاولي توصليلها مشاعرك واستحملي اي حاجه تيجي منها وحاولي وحاولي وحاولي لاخر نفس في حياتك,
امال هي الجنه سهله لازم احنا اللي نجري وراها الجنه مش هتجيلنا لحد عندنا
انا عملت كده مع امي وكل ما الشيطان يقرب مني كنت ببعده واروح اجري عليها مره اشتكيلها ومره احكيلها, حبيبتي مامتك مستنياكي تعملي حاجه خصوصا انها بسبب مشاكلكم مع بعض فاكره ان انتي بتكرهيها لا حاولي قومي ومتسيبيش نفسك كده ومحدش هيحل مشكلتك مع امك الا انتي خليكي قويه وانا متاكده انك باذن الله هتكوني قدها
اما الانسان اللي كنتي هترتبطي بيه فهو زي الطياره الورق اتقطعت وزعلنا عليها لكن بايدينا نجيب زيها واحسن منها كمان ايه ده هو مش نصيبك زعلانه ليه هو الخسران لان خسر حب صادق وشريف وبكره باذن الله ربنا يعوضك زي ما عوضني الحمد لله
اما اختك فسامحيها وابعتيلها هديه وقربي منها وروحي زوريها ان كنتي تقدري وكلميها في التليفون حبيبتي مش كل عضو فينا بيوجعنا هنرميه ليه منعالجوش لانه في الاخر حته مننا اديلهم كل الحب انسي كل حاجه وسامحيهم مهما عملو اوعي في يوم تبعدي عنهم حتى بعد ما تتجوزي باذن الله ربنا قال كده في كتابه العزيز
اما اخوكي فليه بتجيبي اصحابك البيت حاولي تبعدي اصحابك عنه حاولي تقربي منه واقنعيه ان كل اللي بيعمله ده غلط ده حقه عليكي يا حبيبتي
حبيبتي كل مشكله ممكن تتحل بس عايزه قوه وصبر وشجاعه, لما تتضايقي اقعدي في اوضتك وابكي بس لربنا وكلميه واحكيله وادعيه ان يفرجلك همك هو وحده اللي قادر يحول حياتك لبستان فيه كل حب وحنان قربي من ربنا وادعي ربنا انه يقربك منه ربنا قادر يحيي الموتى وقادر يحيي حياتك
بس اياكي تسخطي وتجيبي سيرة الموت تاني تموتي دلوقتي طيب مين اللي هيبني الحب والحنان والامل والبيت السعيد اللي هيجمعك بزوجك الحبيب حبيبتي الفرج قريب باذن الله ربنا يفك كربك امين
__________________
( إِذْ قَالَتِ امْرَأَتُ عِمْرَانَ رَبِّ إِنِّي نَذَرْتُ لَكَ مَا فِي بَطْنِي مُحَرَّرًا فَتَقَبَّلْ مِنِّي ۖ إِنَّكَ أَنْتَ السَّمِيعُ الْعَلِيمُ (35))