حزينة جدا الله يسعدك

موكلين امرنا لله



انا ما أخرني عن الزواج لين صرت على مشارف الثلاثين الا التكاليف الزايده

محد يرحم الشاب التقاليد والمجتمع كلها تفرض عليك اشياء انت في غنى عنها

تخيلوا لو كان الزواج ابسط من كذا كان كثير من الشباب تزوجوا وخففوا من العنوسه الي قضت على آمال البنات



الحين الكل يقول نعين ونعاون واي شي حنا حاضرين وفي الخدمة واذا جا وقت الجد ماشفت احد

انا ضد الاعتماد على الغير خاصه في هذا الموضوع الاجمل ان الشاب يتزوج من كده وتعبه لكن المحبط
انه يشوف تعبه يروح هدر في اشياء اقرب شكليه لاتقدم ولا تؤخر

نسمع كثير يقولون حنا نشتري الرجال وماهان تبارك ومن هالكلام ولا جات ساعة الجد شفت غير

كل هذا يعتبر هين ؟

لاجيت مخصص مبلغ راح تجلس خمس سنوات تسدد فيه يعني اجمل سنين عمرك مديون تطلع عليك مصاريف ماتدري عنها

واذا دروا اخوانك ان عندك مبلغ الله يعينك ياجماعه هذا مو لي هذا حق الزواج يارجال ماعليك حنا نعين ونعاون ولسى زواجك بدري عليه

هذا متورط في ايجار البيت ولازمه اربع الآف شهرين وارجعهم لك

والثاني عنده اقساط سياره متأخره فزعتك وانا اخوك تراك ماخذ قرض ولا جاء زواجك ماراح نقصر معك

والثالث وده يسجل في كلية اهليه وناقصه فلوس ولايهون القرض

وانت يالعريس لازمك اشياء واشياء

يبي لك عيادة اسنان عشان تصلح ما افسده الدهر مايصير فشله عند بنت الناس

ويلزمك نادي صحي عشان اللياقه والنظافه تراك مغبر من سنين

واكيد فواتير التلفون عشان سواليف آخر الليل مع الخطيبه

و و و و .. الخ

على طاري الخطيبه مالقاها الا الخطيبات فترة الملكه سوالف ودلع واحلام وردية مالهن هم الا الانتظار
الغريب انه كيف هن ينحفن من الهم اصلا ليش مهمومات

اها صحيح عندهم هم الحوسه في الاسواق واختيار الملابس والعطورات والكريمات

اما حنا همنا كيف تلقى شقه بسعر مناسب وكيف تحصل استراحه للزواج وكيف تلقى اثاث ومصاريف حفل الزفاف
وكيف تبقي مبلغ لشهر العسل وكيف وكيف وكيف


والله مانبي شي يخرب فرحتنا بايام الخطوبه بس الحلو مايكمل لازم شي يوشوش لك دماغك




الظاهر انا نسيت نفسي وقمت اهذر

هذي مجرد فضفضه للتنفيس وارجوا الا تاخذ مأخذ الجد في بعض نقاطها

وسامحونا

__________________

اللهم اني أردت البائه والعفاف فاغنني بحلالك
اللهم يسر امور زواجي واتمه على خير
واكتب لي الخير والسعاده وارضى عني