الله يجزاك خير يا شيخنا ويجعل كل حرف كتبته في ميزان حسناتك في الجنة .
والله أني محتاجة موضوعك واستشاراتك . قال لي زوجي عن موضوعك ذا وما صدقت خبر .
لقيت في استشاراتك هنا جواب على كثير من الاسئلة اللي في راسي
سؤالي هو يا شيخ حرف
عيالي واحد منتقل من اولى لثاني وواحد منتقل من ثاني لثالث ابتدائي
مسجلينهم في حلقات التحفيظ بعيدة عن البيت بس فيه باص يجي ياخذهم تابع للحلقة ولا نعرف حلقة أحسن من هذي أقرب منها للبيت .
الللي لاحظته أن عيالي يحفظون ، بس الصغير يقول أن المدرس يقول كل واحد يجلس يحفظ ثم يجي يسمع عندي ، لكنه ما يقريهم وكل واحد له منهجه الخاص عند نفس الشيخ فواحد يسمع سورة النازعات والثاني يسمع سورة إقرأ وهذا الحاصل . طيب ليه ما يحفظهم بنفسه ويضع منهج ويعلمهم طريقة التلاوة وأحكام التجويد ؟
سؤالي الثاني يا شيخ هو أني أخاف من رفقة السوء من نفس الحلقة خاصة لما يجتمعون في الباص ما أدري وش يصير ، فالوحدة تخاف على عيالها يتعلمون ألفاظ قبيحة أنا ما أسمح أنها تكون في بيتي .
أحيانا يقولون فلان من الزملاء يضربنا في الباص ويأمرنا وأشكال بعضهم ما ارتحت لها .
اتصل زوجي مرة على المشرف على الحلقة وقال له عن اللي يضرب ولدي في الباص . طبعا زوجي يبغى ينبهه ينتبه للي يصير في الباص . رد على زوجي وقال والله لأكسر يدين هاللي ضرب ولدك !!
وين حنا فيه يا شيخ ؟ المسألة ضرب !! وين التربية !! نبي حلقات تربية مو ضرب باكر والا بعده بيجي عيالي ويقولون ما نبغى هالحلقة لأن الشيخ يضربنا وبيكرهون الحلقات كله سبة شيخ يتعامل بالضرب .
أبي آرائك الله يجزاك خير