يا أختى هونى على نفسك والله الدنيا كلها هموم ولا المتجوزين مرتاحين ولا المطلقين مرتاحين ولا العزاب مرتاحين. والواحده تحمد ربنا على حالها اى كان. طيب تصدقى انى أوقات كتير بأتمنى يرجع بى الزمن وأعيش تانى فى بيت بابا معززه مكرمه من غير مسؤوليه. انتى عارفه بمناسبة دخول رمضان كل سنه وانتى طيبه أنا بأقعد بينى وبين نفسى افتكر ذكرياتى مع رمضان ايام ما كنت فى بيت أهلى وقد ايه كانت جميله لمتنا انا واخواتى علشان نشوف الرؤيه فى التلفزيون ودخلت بابا علينا بالياميش والمكسرات وحاجات رمضان ولمتنا على الفطار والسحور. بعد الجواز اتغربت مع جوزى وهو دايما مشغول فى عمله ( مناوبات وبيات بالعمل) وانا لوحدى بين اربع حيطان لحد ما خلفت ابنى ربنا يخليه لى بس برده بأبقى دايما خايفه عليه وقلقانه من قعدتنا وحدنا فى البيت . شفتى بقى ان فعلا ما فيش حد مرتاح. واحنا داخل غلينا شهر مبارك صلى وادعى ربك واستغفرى وربنا يبعت لك ابن الحلال اللى يفرحك ويتقى الله فيكى.