في حاجات كتيرة تتعمل ...
ابسطها تحفيظ القرآن .. وكتير ستات اعرفها اتبسطت بتحفيظ القرآن جدا اولا عشان الاجر والثواب وثانيا عشان كمان بيقابلوا ستات كويسين هناك وبيكونوا علاقات حلوة ...
بس انتي المهم تبقي عارفة انتي بتحبي ايه .. يا ترى انتي بتحبي ايه ونفسك تكوني ايه ؟؟
يعني بتحبي اللغات ؟؟؟ واخبار مستواكي فيها ايه ؟؟ بتحبي الاشغال اليدوية ؟؟ الرسم واللوحات الفنية ؟؟ التطريز ؟؟ الخياطة ؟ بتحبي الكومبيوتر والبرمجة ؟؟؟ بتحبي التصميم ؟؟؟ بتحبي كتب تطوير الذات والحاجات دي ؟؟
على فكرة الهوايات لو بتعمليها بمزاج ...بتطلع طاقة رهيبة منعشة تفرفشك اسبوع قدام .. وممكن كمان الهواية تقلب بزنسس..!! ليه لا
مالكيش في دول ونفسك تاخدي شهادة حلوة في اي حاجة .. دوري على النت .. الجامعات الكبيرة برة عاملة حاجات وفي مجالات كتير تدرسيها اون لاين وتاخدي شهادة فيها كمان .. ومعترف بيها عالميا
كمان لو فكرتي هتلاقي جوزك بيكتسب خبرات وحاجات وثقافة بحكم شغله .. وممكن كمان تكوني اتأخرتي عنه في الحاجات دي .. يا ترى بتستقي ثقافتك منين ؟؟.. وياترى عارفة تجاريه في الحاجات دي ..
بس انتي اسعي وحطي في دماغك وربنا هيوفقك بإذن الله
اعملي خطة محكمة ماتخرش الماية .. شوفي هواياتك واعيدي اكتشاف ذاتك .. وممكن تحولي الغربة دي لكنز .. بإذن الله .. ولو في حاجة مش عارفة توصليلها او عاوزة تبتدي فيها اسألي ودوري ولو معجبتكيش شوفي تاني وتالت...
هقولك على حاجة تانية كمان بالنسبة لحياتك الاجتماعية .. هتيجي ازاي ؟؟!!
اسألي على صحباتك انتي وابعتيلهم مسجات .. وجيبلهم هدايا رمزية وانتي نازلة وتواصلي معاهم لما تنزلي.. واقعدي قوليلهم انا لوحدي ابعتولي مسجات وعبروني .. ومسدات عشان نتطمن على بعض .. وافضلي وراهم .. مش عيب يعني
ولازم لازم تعملي علاقات هنا .. احنا الستات بنحب نطلع طاقتنا السلبية عن طريق الكلام مع بعضينا ولا إلا ننفجر ... انتي عارفة اصلا ازواجنا بيرجعوا البيت وطاقة الاستماع عندهم بتكون انتهت .. وياريت كمان هيسمع حاجة جديدة ده بيحس ان انتي بتشتكي وخلاص فبلاش تتقلي عليه .. هو لو شافك مبسوطة وبتعملي حاجات هيجيله فضول يعرف ايه سبب التغيير وبتعملي ايه ..ويمكن تقربوا من بعض أكتر ...
وسيبك من جيرانك وشوفي مراتات اصحاب جوزك مثلا وهكذا .. وانتي قاعدة في عيادة اتعرفي على الناس وكدا ..
لازم تعيشي حياتك وترضي بقسمة ربنا وتطوعي حياتك على قدر مقدرتك ..
ومتكتئبيش كلنا معاكي
التعديل الأخير تم بواسطة helwaya ; 22-07-2008 الساعة 03:28 AM